နာမည်ကျော် Iron Man ဇာတ်ကားများနှင့် Jungle Book ဇာတ်ကားတို့ကို ရိုက်ကူးခဲ့သော ဒါရိုက်တာ ဂျွန်ဖက်ဗရိုသည် ဝေါ့တ်ဒစ္စနေးမှထုတ်လွှင့်ပြသမည့် Star Wars ရုပ်သံစီးရီးများကို ကိုယ်တိုင်ရေးသား၍ ရိုက်ကူးမည်ဟု ယင်းကုမ္ပဏီက ကြာသာပတေးနေ့၌ အတည်ပြုကြေညာခဲ့သည်။
ဖက်ဗရိုသည် ယခင်က “Star Wars: The Clone Wars” အန်နီမေးရှင်းစီးရီးတွင် နောက်ခံအသံသရုပ်ဆောင် အဖြစ်ပါဝင်ခဲ့ဖူးပြီး ၂၀၁၈ မေလတွင်ထွက်ရှိမည့် “Solo: A Star Wars Story” ရုပ်ရှင်၌လည်း ပါဝင်သရုပ်ဆောင်ထားကြောင်း သိရသည်။ လက်ရှိအချိန်တွင် သူသည် ဒစ္စနေးမှပြန်လည်ထုတ်လုပ်မည့် The Lion King ရုပ်ရှင်အတွက် ဒါရိုက်တာအဖြစ် တာဝန်ယူဆောင်ရွက်လျက်ရှိသည်။
“ ကျနော်အသက် ၁၁ နှစ်အရွယ်တုန်းက တစ်ချိန်ချိန်မှာကျနော်ဟာ Star Wars ကမ္ဘာကြီးအကြောင်းကို ပုံဖော်ခွင့်ရရှိမယ်လို့ ခင်ဗျားတို့ပြောလာခဲ့မယ်ဆိုရင် ကျနော်ယုံကြည်မိမှာမဟုတ်ပါဘူး။ ဒီလိုစိတ်လှုပ်ရှားဖွယ် ရာ စွန့်စားခန်းခရီးစဉ်ကြီးကို ဖြတ်သန်းဖို့ မစောင့်နိုင်လောက်အောင်ဖြစ်နေပါပြီ” ဟု ဖက်ဗရိုက ပြောခဲ့သည်။
ယင်း Star Wars ရုပ်သံစီးရီးအား ထုတ်လွှင့်ပြသမည့်အချိန်ကို ဒစ္စနေးဘက်မှ မထုတ်ပြန်ရသေးကြောင်း သိရသည်။
Ref: Reuters