ရန်ကုန်၊ မတ်လ ၆ ။ ။ စစ်ကိုင်းတိုင်းဒေသကြီး၊ ဗန်းမောက်မြို့နယ်ရှိ ချောင်းကြီးချောင်းအား ဖြတ်သန်းဖောက်လုပ်ထားသော တံတား ပေါ်မှ ဘတ်ဟိုးယာဉ်တင်ဆောင်ထားသော ၁ဝ ဘီးကားတစ်စီး ဖြတ်မောင်းစဉ် တံတားကျိုး ကျသွားမှုအပေါ် ကုမ္ပဏီမှ ပြန်လည်ပြုပြင်ပေးမည်ဖြစ်ကြောင်း ပြည်ထဲရေးဝန်ကြီးဌာနမှ ယနေ့ မတ်လ ၆ ရက်တွင် သတင်း ထုတ်ပြန်သည်။
မတ်လ ၄ ရက်နေ့၊ ည ၅ နာရီခန့်အချိန်တွင် ဂျီဟိုပလိမ်းလမ်းတံတားကုမ္ပဏီပိုင် ၁ဝ ဘီးကားမှ CAT အမျိုးအစား ၅ တန်အလေးရှိ ဘက်ဟိုးယာဉ် ကိုတင်ဆောင်ပြီး တံတားကို ဖြတ်ကူးစဉ် ကျိုးကျသွားခဲ့ခြင်း ဖြစ်သည်။
ထိုသို့ ကျိုးကျသွားခဲ့သည့်အတွက် ဂျီဟိုပလိမ်းလမ်းတံတားကုမ္ပဏီမှ အဆိုပါ တံတားကို ပြန်လည်ပြုပြင်ပေး သွားမည်ဖြစ်ကြောင်း သိရသည်။
ဘတ်ဟိုးယာဉ်တင်ဆောင်လာသော ကားကို အသက် ၅၁ နှစ်ခန့်အရွယ် ဦးဝင်းတင်ဆိုသူက မောင်းနှင်လာ ခြင်းဖြစ်ပြီး ယာဉ်မောင်းအပါအဝင် ကားပေါ်ပါရှိသည့် လူ ၇ ဦးမှာ ထိခိုက်ဒဏ်ရာရရှိခဲ့ခြင်းမရှိကြောင်း ပြည်ထဲ ရေး သတင်းထုတ်ပြန်ချက်တွင် ပါရှိသည်။
ထိုသို့ ယာဉ်ဖြတ်ကူးစဉ် ကျိုးကျသွားခဲ့သည့် ချောင်းကြီးချောင်းအား ဖြတ်သန်းဖောက်လုပ်ထားသော ကူးဆိပ် တံတားမှာ သံကူကွန်ကရစ်တိုင်၊ သံဘောင် လက်ရန်း၊ ပျဉ်ခင်း အမျိုးအစားဖြစ်ပြီး အရှည် ၁၄ဝ ပေ၊ အမြင့် ၂၁ ပေ၊ အကျယ် ၁၃ ပေ ၆ လက်မ ရှိသည်။