မတ် ၁၊ ပဲရစ်။ ။ ။ မာဆေးအသင်းကိုအနိုင်ရရှိသည့် ပြင်သစ်ဖလားကွာတားဖိုင်နယ်တွင် ခြေကျင်းဝတ်ဒဏ်ရာရသွားခဲ့သည့် အမ်ဘက်ပေး၏ ဒဏ်ရာပြင်းထန်မည်ကို ပီအက်စ်ဂျီနည်းပြ အမ်မရီကစိုးရိမ်နေသည်။
ချန်ပီယံလိဂ်တွင် ရီးယဲလ်မက်ဒရစ်အသင်းကို ၃-၁ ဂိုးဖြင့်ရှုံးထားရခြင်းကိုပြန်လည်ချေပမည့် ပီအက်စ်ဂျီအသင်း၏ မျှော်လင့်ချက်မှာ နေမာဒဏ်ရာရသွားပြီးကတည်းက ထိခိုက်နေရသည်။
အမ်ဘက်ပေးလည်း ဒဏ်ရာရသွားခဲ့ပြန်ရာ မတ် ၆ တွင် ကစားမည့် ရီးယဲလ်နှင့်ပွဲအမီပြန်ကောင်းလာရန် နည်းပြအမ်မရီက မျှော်လင့်နေခြင်းဖြစ်သည်။ အမ်ဘက်ပေးသည် မာဆေးကို ၃-၀ ဂိုးဖြင့်နိုင်သည့်ပွဲတွင် ပထမပိုင်းအပြီး၌ လူစားလဲခံခဲ့ရသည်။
“သူ့ခြေကျင်းဝတ်က ရောင်နေပါတယ်။ ဒုတိယပိုင်းမှာ မကစားပါရစေနဲ့လို့တောင်းဆိုခဲ့လို့ လူစားလဲခဲ့တာပါ။ ဒဏ်ရာမပြင်းဖို့ မျှော်လင့်ပါတယ်”ဟု အမ်မရီကပြောသည်။
နေမာနေရာကိုအစားထိုးနိုင်ကြောင်း ဒီမာရီယာကခြေစွမ်းဖြင့်သက်သေပြသနေပြီး မာဆေးနှင့်ပွဲတွင် နှစ်ဂိုးသွင်းနိုင်ခဲ့ကာ ကာဗာနီကလည်း တစ်ဂိုးသွင်းယူနိုင်ခဲ့သည်။
Ref; goal.com