ရန်ကုန်၊ ဖေဖော်ဝါရီလ ၂၄ ။                ။ ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ ခရေပင်လမ်းခွဲ၊ တပ်မတော်လေ့ကျင့်ရေးဘောလုံးကွင်းအနီး၊ တပ်မတော်ဆေးအိမ်ထောင်သည်လိုင်းခန်းရှေ့တွင် YBS ၂၁ ယာဉ်နှင့် ၁၂ ဘီးယာဉ်တိုက်မှုဖြစ်ပွားခဲ့ပြီး တစ်ဦးသေဆုံးကာ ၄ ဦးဒဏ်ရာရရှိခဲ့ကြောင်း သိရသည်။

အဆိုပါ YBS ၂၁ ခရီးသည်တင်ယာဉ်နှင့် ကြက်စာပုဇွန်မှုန့်အိတ်များတင်ဆောင်လာသည့် ၁၂ ဘီးယာဉ်မှာ ယနေ့ ဖေဖော်ဝါရီလ ၂၄ ရက်၊ နံနက် ၅ နာရီ၊ မိနစ် ၂ဝ ခန့်အချိန်တွင် ယာဉ်တိုက်မှု ဖြစ်ပွားခဲ့ခြင်းဖြစ်သည်။

“YBS ၂၁ က မင်္ဂလာဒုံဘက်ကနေ တညင်းကုန်းဘက်ကိုလားရာ၊ ကုန်ကားက တညင်းကုန်းဘက်နေ မင်္ဂလာဒုံ ဘက်ကို လားရာပေါ့။ YBS ၂၁ ယာဉ်က ကုန်ကားရဲ့ ယာဉ်ကြောထဲကိုဝင်တိုက်တာ။ လမ်းပြောင်းပြန်ပေါ့။ ဒဏ်ရာရရှိသူ ၄ ဦး၊ ကုန်ကားက စပယ်ရာ သေဆုံး။ နေရာမှာတင် ပွဲချင်းပြီး”ဟု သွားရောက်ကူညီပေးခဲ့သည့် ပုလဲမြို့သစ်အရန်မီးသတ်တပ်ဖွဲ့မှ စခန်းမှူး ဦးထင်လင်းအောင်က ပြောသည်။

လက်ရှိတွင် YBS ၂၁ ယာဉ်မောင်းဖြစ်သူအား တပ်မတော်ကုတင် ၁ဝဝဝ ဆေးရုံသို့ ပို့ဆောင်ထားပြီး ကုန်ကား ယာဉ်မောင်းနှင့် သေဆုံးသူ ရုပ်အလောင်းအား မေဓါဝီဆေးရုံသို့ ပို့ဆောင်ပေးထားကြောင်း သိရသည်။