သွားလာခွင့်ပိတ်ပင်ခံရမှုအပေါ် သက်ဆုုိင်ရာက အမြန်ဆုံုး ဆောင်ရွက်ပေးရန် ဝ နုုိင်ငံရေးပါတီများတောင်းဆုုိ

သွားလာခွင့်ပိတ်ပင်ခံရမှုအပေါ် သက်ဆုုိင်ရာက အမြန်ဆုံုး ဆောင်ရွက်ပေးရန် ဝ နုုိင်ငံရေးပါတီများတောင်းဆုုိ

ချင်းမိုင်(မဇ္ဈိမ)၊ဖေဖော်ဝါရီလ ၂၂  ။            ။ မြန်မာနိုင်ငံသား မှတ်ပုံတင်ကတ်ပြား ကိုင်ဆောင်ထားသော ဝ တိုင်းရင်းသား လူမျိုးများကို ခရီးသွားလာခွင့် ပိတ်ပင် ကန့်သတ်ခံရမှုနှင့် ပတ်သက်၍ သက်ဆိုင်ရာမှ အမြန်ဆုံး အဆင်ပြေအောင် ဆောင်ရွက်ပေးရန် ဝ ဒီမိုကရက်တစ်ပါတီနှင့် ဝ အမျိုးသားစည်းလုံး ညီညွတ်ရေးပါတီတို့က တောင်းဆိုလိုက်သည်။

“ကျွန်တော်တို့ မနေ့ကအထိတော့ သွားလာလို့ မရသေးဘူး။ အစိုးရကဘာမှအကြောင်းမကြားလာသေးဘူး။ ကျွန်တော်တို့ဝလူမျိုးတွေကို သူတို့က ပိတ်ပင်ထားတာကိုး၊ ဝ လူမျိုးထဲမှာ ဝ အချင်းချင်းပဲနော် မှတ်ပုံတင်ထဲမှာ လ၊ လွယ်လတို့ ရေးထားရင်တော့ ဖြတ်ခွင့်ပေးတယ်။ မှတ်ပုံတင်မှာ လူမျုးိနေရာမှ ဝ လို့ ရေးထားရင် ပိတ်ထားတယ်”ဟု ဝ အမျိုးသားစည်းလုံး ညီညွတ်ရေးပါတီ ဥက္ကဌ ဦးညီပလိတ်က ပြောသည်။

ဝ တိုင်းရင်းသားများ သွားလာခွင့် မရရှိဘဲ တားမြစ်နေရသည့်ကိစ္စနှင့် ပတ်သက်၍ ပြည်ထောင်စု ငြိမ်းချမ်းရေး ကော်မရှင်မှ ညှိနှိုင်းဆောင်ရွက်ပေးနေကြောင်း ကြားသိရသော်လည်း ယနေ့ထိ ခရီးသွားလာမှု ပိတ်ပင်ထားဆဲ ဖြစ်ကြောင်း ဖေဖော်ဝါရီလ ၂၁ ရက်က ဝ ဒီမိုကရက်တစ်ပါတီနှင့် ဝ အမျိုးသားစည်းလုံး ညီညွတ်ရေးပါတီတို့ သဘောထား ထုတ်ပြန်ချက်တွင် ဖော်ပြထားသည်။

သူက ဆက်လက်၍ “သွားလာရတာ တအားခက်ခဲတယ်။ ဥပမာ ကျိုင်းတုံမှာနေတဲ့လူဆိုရင် ဥပမာ ဝ ဒေသ ပန်ဆန်းမှာ သူတို့ အမျိုးတွေဆီသွားရင် လမ်းမှာ ပြန်လို့ မရဖြစ်တော။ အခုချိန်ဆို ကျောင်းလည်းပိတ်တော့ ကလေးတွေ သွားလာဖို့ ခက်ခဲတယ်။ အဲဒီလို ပိတ်ရင် ဒုက္ခတွေ့တယ်။ အခက်အခဲတွေ့တာပေါ့နော်။ အဲဒါကြောင့် ထုတ်ပြန်တာပါ”ဟု သူက ပြောသည်။

ယနေ့ ဝ ဒီမိုကရက်တစ်ပါတီနှင့် ဝ အမျုးိသားစည်းလုံး ညီညွတ်ရေးပါတီတို့ ကြေညာချက်ထုတ်ပြန်ပြီးနောက် တစ်စုံတစ်ရာ လုပ်ဆောင်ပေးခြင်း မရှိပါက နိုင်ငံတော်သမ္မတနှင့် နိုင်ငံတော် အတိုင်ပင်ခံသို့ထံ ဆက်လက် တောင်းဆိုသွားမည် ဖြစ်ကြောင်း သူက ပြောသည်။

ဝ တိုင်းရင်းသားအတွင်းရှိ ဝ မျိုးနွယ်စုများဖြစ်ကြသော “လ၊ လွယ်လ” စသည့် မြန်မာနိုင်ငံသား စိစစ်ရေး ကတ်ပြား ကိုင်ဆောင်သော သူများကို သွားလာခွင့် ပေးထားပြီး မြန်မာနိုင်ငံသား စိစစ်ရေးကတ်ပြား ကိုင်ဆောင်ထားသော ဝ ဟူသည့် မျိုးနွယ်စုများကို တားမြစ် ပတ်ပင်ခံနေရသောကြောင့် ဝ မျိုးနွယ်စု အချင်းချင်း စိတ်ဝမ်းကွဲပြားအောင် ဆောင်ရွက်နေခြင်း ဖြစ်သည်ဟု ထုတ်ပြန်ချက်တွင် ဖော်ပြထားသည်။

ထိုသို့ ခရီးသွားလာမှု ပိတ်ပင်တားဆီးမှုနှင့် ခွဲခြားဆက်ဆံခြင်းသည် ပြည်တွင်း ငြိမ်းချမ်းရေး၊ အမျိုးသား ပြန်လည်သင့်မြတ်ရေးလုပ်ငန်းစဉ်ကို များစွာ အဟန့်အတား ဖြစ်ပေါ်စေကြောင်း အဆိုပါထုတ်ပြန်ချက်တွင်ထည့်သွင်းထားသည်။

ရှမ်းပြည်နယ် ပန်ဆန်းမြိုကမှ သွားလာနေသော ဝ လူမျိုးများကို ဖေဖေဝါရီလဆန်းပိုင်းမှစတင်၍ ရှမ်းပြည်နယ် မိုင်းယန်း-မိုင်းခတ်-ကျိုင်းတုံ ကားလမ်းကြောင်းပေါ်ရှိ စစ်ဆေးရေးဂိတ်များတွင် ဝ လူမျုးိများ ပုံမှန်သွားလာခွင့် မရဘဲ တားမြစ် ခံနေရသဖြင့် ပြည်ထောင်စု ငြိမ်းချမ်းရေးကေ်ာမရှင်မှ အဖွဲ့ဝင် ဦးအောင်စိုးက ညှိနှိုင်းနေကြောင်း ဖေဖော်ဝါရီလ ၁၇ ရက်က သတင်းထောက်များကို ပြောဆိုထားသည်။

ဝ ကိုယ်ပိုင်အုပ်ချုပ်ခွင့်ရတိုင်းကို အုပ်ချုပ်နေသော ဝ ပြည်သွေးစည်းညီညွတ်ရေးပါတီ၊ ဝ ပြည် သွေးစည်း ညီညွတ်ရေး တပ်မတော်(UWSP/UWSA)သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA)ကို လက်မှတ်မထိုးသေးဘဲ NCA လမ်းကြောင်း မဟုတ်ဘဲ နိုင်ငံရေးဆွေးနွေးမှုဖြင့် သွားရန် မြောက်ပိုင်း မဟာမိတ်အဖွဲ့ ၇ ဖွဲ့ဖြင့် ဖွဲ့စည်းထားသော ပြည်ထောင်စု နိုင်ငံရေးဆွေးနွေးရေးကော်မတီ (FPNCC)တွင် ခေါင်းဆောင်အဖြစ် တာဝန်ယူထားသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required