ကမ္ဘာ့ အကျင့်ပျက်ခြစားမှုအနည်းဆုံး နိုင်ငံများစာရင်းမှာ နယူးဇီလန်က ထိပ်ဆုံးမှာရှိနေပြီး မြန်မာက အဆင့် ၁၃၀ မှာ ရောက်နေ

ကမ္ဘာ့ အကျင့်ပျက်ခြစားမှုအနည်းဆုံး နိုင်ငံများစာရင်းမှာ နယူးဇီလန်က ထိပ်ဆုံးမှာရှိနေပြီး မြန်မာက အဆင့် ၁၃၀ မှာ ရောက်နေ

ဖေဖော်ဝါရီ ၂၂ ။            ။ ကမ္ဘာ့နိုင်ငံတွေရဲ့ အကျင့်ပျက်ခြစားမှုနဲ့ပတ်သက်တဲ့  တစ်နှစ်တာ အဆင့်သတ်မှတ်ချက် အညွန်းကိန်းတစ်ခုကို ဘာလင်အခြေစိုက် ခြစားမှု တိုက်ဖျက်ရေးအဖွဲ့ကြီးဖြစ်တဲ့ Transparency International (TI) က ထုတ်ပြန်သွားခဲ့ပါတယ်။

အဆိုပါ အညွန်းကိန်းထုတ်ပြန်ရာမှာတော့ ကမ္ဘာပေါ်က နိုင်ငံပေါင်း ၁၈၀ ကို ရမှတ် ဇီးရိုး နဲ့ ၁၀၀ ကြား အမှတ်ပေးတိုင်းတာခဲ့ပြီး ရမှတ် ဇီးရိုးကတော့ ခြစားမှုပိုင်း အဆိုးရွားဆုံး အဖြစ် သတ်မှတ်ပြီး ရမှတ် ၁၀၀ ကတော့ ခြစားမှု အနည်းဆုံး အဖြစ် သတ်မှတ်တာဖြစ်ပါတယ်။

အဆိုပါ အညွန်းကိန်းမှာတော့ နယူးဇီလန်နိုင်ငံက ရမှတ်ပေါင်း ၈၉ မှတ်နဲ့ ထိပ်ဆုံးမှာ ရှိနေပြီး ကမ္ဘာပေါ်က အကျင့်ပျက်ခြစားမှု အနည်းဆုံး နိုင်ငံအဖြစ် ရပ်တည်နေလျက်ရှိပါတယ်။

မြန်မာနိုင်ငံကတော့ အဆိုပါစာရင်းမှာ နိုင်ငံပေါင်း ၁၈၀ အနက် ရမှတ် ၃၀ နဲ့အတူ အဆင့် ၁၃၀ မှာ ရပ်တည်နေတယ်လို့ သိရပါတယ်။

အဆိုပါ ကမ္ဘာလုံးဆိုင်ရာ အကျင့်ပျက်ခြစားမှု သဘောထားအမြင် အညွန်းကိန်းထုတ်ပြန်ရာမှာတော့ ဘာလင်အခြေစိုက်လုပ်ငန်းကြီး အနေနဲ့ ကမ္ဘာ့ဘဏ်၊ အာဖရိကန် ဖွံ့ဖြိုးရေးဘဏ်နဲ့ ကမ္ဘာ့စီးပွားရေးဖိုရမ်တို့လို နိုင်ငံတကာအဖွဲ့အစည်းတွေကနေတဆင့် ဒေတာအချက်အလက်တွေကို အခြေပြုပြီး တိုင်းတာထုတ်ပြန်ခဲ့တယ်လို့ သိရပါတယ်။

ဒါ့အပြင် ယခု အညွန်းကိန်း အဆင့်သတ်မှတ်ချက်ကတော့ နိုင်ငံတကာက ကျွမ်းကျင်သူတွေရဲ့ အကဲဖြတ်သုံးသပ်မှုတွေနဲ့ စီးပွားရေးလုပ်ငန်းရှင်တွေရဲ့ ထင်မြင်ချက်တွေကိုပါ ဖော်ပြထားတဲ့ စစ်တမ်း ၁၃ ခုကိုလည်း အခြေခံတိုင်းတာခဲ့တယ်လို့ သိရပါတယ်။

၂၀၁၇ ခုနှစ်အတွက် ကမ္ဘာပေါ်မှာ ခြစားမှု အနည်းဆုံး နိုင်ငံတွေထဲမှာကတော့ နယူးဇီလန်ရဲ့ နောက်မှာ ဒိန်းမတ်၊ ဖင်လန်၊ နော်ဝေ၊ ဆွစ်ဇာလန်တို့ အသီးသီး ရပ်တည်နေနိုင်ခဲ့ပြီး အာဆီယံဒေသက စင်ကာပူကလည်း အဆင့် ခြောက်နေရာထိ တက်လှမ်းရပ်တည်နိုင်ခဲ့တယ်လို့ သိရပါတယ်။

ဆိုမာလီယာကတော့ အဆိုပါ အညွန်းကိန်းမှာ ရမှတ် ၉ မှတ်နဲ့ အောက်ဆုံးမှာ ရှိနေပြီး အဆိုးရွားဆုံး ခြစားမှု ရှိနေတဲ့ နိုင်ငံအဖြစ် ရှိနေတယ်လို့လည်း သိရပါတယ်။

ယခု ၂၀၁၇ အကျင့်ပျက်ခြစားမှုအညွန်းကိန်းအရလည်း ကမ္ဘာ့နိုင်ငံအများစုအနေနဲ့ ခြစားမှု တိုက်ဖျက်ရေးမှာ ထိထိရောက်ရောက်လုပ်ဆောင်ထားနိုင်ခဲ့ခြင်း မရှိသေးတာကို တွေ့ရတယ်လို့လည်း TI က ပြောကြားသွားပါတယ်။

Mizzima Weekly