ရခိုင်ပြည်နယ်ရှိ စာသင်ကျောင်းများ မဲရုံအဖြစ်သုံးရန် ရွေးကောက်ပွဲအမီ အောက်တိုဘာလ နောက်ဆုံးထားကာ အပြီးပြန်ပြင်မည်

ရခိုင်ပြည်နယ်ရှိ စာသင်ကျောင်းများ မဲရုံအဖြစ်သုံးရန် ရွေးကောက်ပွဲအမီ အောက်တိုဘာလ နောက်ဆုံးထားကာ အပြီးပြန်ပြင်မည်

စစ်တွေ ။ ။ ရခိုင်ပြည်နယ်တွင် ၂၀၁၅ ရွေးကောက်ပွဲ၌ မဲရုံအဖြစ် အသုံးပြုမည့် စာသင်ကျောင်းအချို့ ရေကြီးရေလျှံမှုကြောင့် ပြိုပျက်၊ ပျက်စီးမှုများ ရှိခဲ့သော်လည်း အချိန်မီ ပြန်လည်ပြုပြင်ကာ အသုံးပြုသွားမည်ဟု ပြည်နယ်ရွေးကောက်ပွဲကော်မရှင် ဥက္ကဋ္ဌ ဦးအောင်မြင့်က ပြောသည်။

ပျက်စီးသွားသော စာသင်ကျောင်းများကို အသစ်ဆောက်လုပ်ပြီး၊ ပြုပြင်စရာရှိသည့် ကျောင်းများကို ပြုပြင်ပြီး ရွေးကောက်ပွဲ မကျင်းပမီ အချိန်မီ ဆောင်ရွက်သွားမည်ဟု ပြည်နယ်ရွေးကောက်ပွဲကော်မရှင် ဥက္ကဌ ဦးအောင်မြင့်က သြဂုတ်လ ၂၄ ရက်က ပြုလုပ်သည့် ခရိုင်ရွေးကောက်ပွဲကော်မရှင်များနှင့် ပြည်ထောင်စု ရွေးကောက်ပွဲကော်မရှင် (ရခိုင်ပြည်နယ်) တာဝန်ခံနှင့် တွေ့ဆုံပွဲတွင် ပြောကြားခဲ့ခြင်းဖြစ်သည်။

ခရိုင်ရွေးကောက်ပွဲကော်မရှင် အဖွဲ့ဝင် တစ်ဦးဖြစ်သူ ဦးအောင်ကျော်သာက "အဲဒီရေဘေးဒဏ်ကြောင့် ပျက်စီးသွားတာကို ရွေးကောက်ပွဲမှာ အချိန်မီပြီးနိုင်ပါ့မလား။ မပြီးလို့ရှိရင် ကျနော်တို့ ကိုယ့်ဟာကို ဆောက်ရမလား။ ဆောက်ရ မယ်ဆိုရင် ဘယ်နှစ်ရုံဆောက်ရမယ် ဆိုတာ တွက်ချက်ပြီးတော့ တင်ပြလာပါတယ်။ အဲဒီတော့ မဲရုံတွေဆောက်ပေးဖို့ လိုပါတယ်။ " ဟု ပြောသည်။

မဲရုံအဖြစ် အသုံးပြုမည့် စာသင်ကျောင်းအရေအတွက်ကို စိစစ်နေအချိန် ကာလဖြစ်သောကြောင့် အတိအကျ မပြောနိုင်သေးကြောင်း ရခိုင်ပြည်နယ် ရွေးကောက်ပွဲကော်မရှင် အရာရှိတစ်ဦးဖြစ်သူ ဦးသူရိန်ထွဋ်က ပြောကြားသည်။ ရခိုင်ပြည်နယ် ပညာရေးမှူး ဦးလှစိန်ထွန်းက စာသင်ကျောင်းများကို ပြင်ဆင်ရာတွင် မဲရုံအဖြစ် အသုံးပြုမည့် စာသင်ကျောင်းကိုပဲ ဦးစားပေးရွေးပြင်မည် မဟုတ်ဘဲ ပျက်စီးသွားသော စာသင်များအားလုံးကို တပြေးညီ ရွေးကောက်ပွဲအမှီ ပြင်ဆင်မည်ဟု ပြောသည်။

ပြင်ဆင်ရာတွင် ပြည်ထောင်စုအစိုးရ ပညာရေးဝန်ကြီးဌာနက ဘတ်ဂျတ်ကို အသုံးပြုမည်ဟု ၎င်းက ပြောသည်။

အသစ်ဆောင်လုပ်ရမည့် ကျောင်းနှင့် ပြုပြင်ရမည့်ကျောင်းများအတွက် ဘတ်ဂျတ်ကို ပညာရေးဝန်ကြီးဌာန ထံ သန်းပေါင်း ၂၄၀၂.၄၇၂ ကျပ်ငွေကို တင်ပြတောင်းဆိုထားပြီး ယင်းငွေများမှာ လာမည့်အပတ်တွင် ပြန်ကျလာမည်ဖြစ်၍ စက်တင်ဘာလနှင့် အောက်တိုဘာလတွင် အပြီးဆောက်လုပ်သွားနိုင်မည်ဟု ဦးလှစိန်ထွန်းက ပြောကြားသည်။

ရခိုင်ပြည်နယ်အတွင်း ရေကြီးခဲ့မှုကြောင့် အသစ်ဆောက်လုပ်ရမည့် စာသင်ကျောင်းမှာ ၈၂ ဆောင်ရှိပြီး၊ ပြန်လည်ပြုပြင်ရမည့် ကျောင်းမှာ ၄၂၀ ရှိသည်။ ယင်းကြောင့် မင်းပြား၊ မြောက်ဦး၊ ကျောက်တော်၊ ပုဏ္ဏားကျွန်း၊ ဘူးသီးတောင်၊ မောင်တောမြို့နှင့် ရသေ့တောင်မြို့တို့တွင် မဲရုံလုပ်မည့်နေရာ အခက်အခဲဖြစ်လျက်ရှိသည်ဟု သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly