ပုသိမ်၊ ဖေဖော်ဝါရီလ ၁၃ ။ ။ ဖွံ့ဖြိုးမှုကောင်းလာနိုင်သည့် ရွှေသောင်ယံကမ်းခြေတွင် ကမ်းခြေဆင်းလမ်းများ၊ တံတားများ လုပ်ဆောင်နေပြီ ဖြစ်ကြောင်း စည်ပင်သာယာရေးဝန်ကြီး က ဖေဖော်ဝါရီလ ၁၃ ရက်တွင် ပြောသည်။
လက်တလောတွင် ကမ်းခြေဆင်းလမ်း ၆ လမ်း လုပ်ဆောင်ရန် သတ်မှတ်ထားပြီး မြေပိုင်ရှင်များနှင့် ညှိနှိုင်းဆောင်ရွက်မှုများ ပြုလုပ်နေကြောင်း သိရသည်။
"ဒေသခံတွေ တင်ပြတဲ့အတွက် ကမ်းခြေဆင်းလမ်းဖြစ်မြောက်ရေးကော်မတီ ဖွဲ့လိုက်တယ်၊ကော်မတီက နေရာ ၆ နေရာ သတ်မှတ်ပြီး တိုင်းဒေသကြီးအစိုးရသို့ပြန်လည်တင်ပြတယ်၊နေရာတွေကို ဟိုတယ်ခရီး၊ စည်ပင်၊ လမ်းဦးစီးတို့ အုပ်ချုပ်ရေးတို့နဲ့ ဆင်းပြီး စိစစ်လိုက်တဲ့အခါ ဒီနေရာတွေဟာ ကမ်းခြေဆင်းလမ်း ကြိုကြိုတင်တင် သတ်မှတ်ထားရမယ်နေရာတွေလို့ အားလုံးက ဆုံးဖြတ်တယ်” ဟု စည်ပင်သာယာရေးဝန်ကြီး ဦးကျော်မြင့်က ပြောသည်။
အဆိုပါ ကမ်းခြေဆင်းလမ်း ၆ လမ်းအနက် ၃ လမ်းသည် လမ်းနယ်နမိတ်သတ်မှတ်၍ ရပြီး ၁ လမ်းသည် စည်ပင်သာယာမှ ပိတ်သိမ်းထားသော သချိုႋင်းမြေတွင် ပါဝင်နေသည်။ ကျန် ၂ နေရာကိုမူ ကမ်းခြေဆင်းလမ်း အဖြစ်ဖော်ဆောင်ရန် မြေပိုင်ရှင်များနှင့်ညှိနှိုင်းနေကြောင်း သိရသည်။
“ ၃ လမ်းက လမ်းနယ်နိမိတ်သတ်မှတ်လို့ရပြီး ၁လမ်းက စည်ပင်သာယာကပိတ်သိမ်းထားတဲ့ သချိုႋင်းမြေ ဖြစ်နေတယ်၊စည်ပင်ပိုင်မြေက စွန့်လွတ်ပြီး အစိုးရစီမံခန့်ခွဲခွင့်ရှိတဲ့မြေအဖြစ်ရောက်မှ လမ်းအဖြစ် သတ်မှတ်လို့ ရမယ်၊ ကျန်တဲ့နှစ်နေရာက မြေပိုင်ရှင်တွေက သူတို့မြေကို လမ်းအဖြစ်အသုံးပြုမယ်ဆို ခွင့်မပြုနိုင်ပါဘူး၊ လျော်ကြေးနစ်နာကြေးပေးလည်း ခွင့်မပြုခြင်းပါဘူး တုံ့ပြန်မှုတွေရှိနေလို အဲဒီနှစ်နေရာက ဆက်လက် ညှိနှိုင်း ရမယ့်နေရာအဖြစ် သတ်မှတ်ထားတယ် ”ဟု စည်ပင်သာယာရေးဝန်ကြီးက ပြောသည်။
အဆိုပါ မြေပိုင်ရှင်များ၏ မြေအကျယ်မှာ ၁၀ ပေအကျယ်၊ အရှည် ပေ၄၀၀ ခန့်ရှိပြီး ခွင့်ပြုပါက ဟိုတယ် လုပ်ငန်းရှင်များက မြေလျော်ကြေးပေးအပ်ရန် ရှိကြောင်း တိုင်းအစိုးရထံမှ သိရသည်။
လက်ရှိတွင် ပုသိမ်မြို့နယ်၊ရွှေသောင်ယံကမ်းခြေသို့ ဆက်သွယ်သည့် တံတားအား ဆောက်လုပ်နေပြီ ဖြစ်ပြီး တံတားပြီးစီးပါက ကမ်းခြေဒေသများသို့ ခရီးသွားဧည့်သည် ဝင်ရောက်မှု များလာနိုင်ကာ ရင်းနှီးမြှုပ်နှံမှုများ တိုးတက်ရန် တိုင်းအစိုးရက မျှော်မှန်းထားသည်။
ရွှေသောင်ယံကမ်းခြေဒေသသည် ချောင်းသာမှ ကားဖြင့် သွားလျှင် ၄၅ မိနစ်ဝန်းကျင်ခန့်သာရှိပြီး၊ ရွှေသောင်ယံ ကမ်းခြေသည့် ၄ မိုင်ဝန်းကျင် အကျယ်အဝန်းရှိကာ အသစ်ဖော်ဆောင်နေသော ကမ်းခြေတစ်ခုလည်း ဖြစ်သည်။
