ရန်ကုန်တိုင်းတစ်ခုလုံးတွင် ကာရာအိုကေ (KTV) လုပ်ငန်း ၃၀၀ ကျော်ရှိ

ရန်ကုန်တိုင်းတစ်ခုလုံးတွင် ကာရာအိုကေ (KTV) လုပ်ငန်း ၃၀၀ ကျော်ရှိ
ဓာတ်ပုံ - နော်ပန်းသဉ္ဇာမျိုး facebook

 

ရန်ကုန်၊ ဖေဖော်ဝါရီ ၇ ။               ။ ရန်ကုန်တိုင်းဒေသကြီးအတွင်း၌ KTV( ကာရာအိုကေ) လုပ်ငန်းပေါင်း ၃၂၆ ခု ကို လိုင်စင်ချထားပေးခဲ့သည်ဟု ယနေ့ ဖေဖော်ဝါရီလ ၇ ရက်နေ့တွင် ကျင်းပသည့် တိုင်းဒေသကြီးလွှတ်တော်၌ ကရင်တိုင်းရင်းသားရေးရာ ဝန်ကြီး နော်ပန်းသဉ္ဇာမျိုးက ပြောကြားသည်။

"ရန်ကုန်တိုင်းဒေသကြီးအတွင်း (၁.၂.၂၀၁၈) ခုနှစ်အထိ ခွင့်ပြုထားတဲ့ ကာရာအိုကေလုပ်ငန်းလိုင်စင်ပေါင်းဟာ ၃၂၆ ခု ရှိပြီး အရှေ့ပိုင်းခရိုင်မှာ ၁၁၆ ခု၊ အနောက်ပိုင်းခရိုင် ၁၁၂ ခုရှိပြီးတော့ မြောက်ပိုင်းခရိုင် ၇၈ ခု ၊ တောင်ပိုင်းခရိုင် ၂၀ ခု ဖြစ်ပါတယ်" ဟု တိုင်းဒေသကြီးအစိုးရအဖွဲ့ဝင် ကရင်တိုင်းရင်းသားရေးရာဝန်ကြီး နော်ပန်းသဉ္ဇာမျိုးက ပြောသည်။

ကျောက်တံတားမြို့နယ် ၊ မဲဆန္ဒနယ်အမှတ်(၁) တိုင်းဒေသကြီးလွှတ်တော်ကိုယ်စားလှယ် ဒေါ်ကြည်ပြာ၏ "ရန်ကုန်တိုင်းဒေသကြီးအတွင်း လုပ်ကိုင်ဆောင်ရွက်ခွင့်ပြုထားသော ကာရာအိုကေ လုပ်ငန်းပေါင်း မည်မျှရှိပါသနည်း။ လုပ်ငန်းလိုင်စင်ခွန်အား မည်မျှသတ်မှတ်၍ ၂၀၁၇-၁၈ ဘဏ္ဍာနှစ်အတွက် အခွန်မည်မျှရရှိခဲ့သနည်း" ဆိုသည့် မေးခွန်းကို ပြန်လည်ဖြေဆိုခဲ့ခြင်းဖြစ်သည်။

"၂၀၁၇-၁၈ ဘဏ္ဍာနှစ်အတွက် ကာရာအိုကေလုပ်ငန်းလိုင်စင်အသစ် ထုတ်ပေးခြင်းနှင့် သက်တမ်းတိုးမြှင့်ခြင်းများမှ ဝင်ငွေစုစုပေါင်း ကျပ် ၄၁ ဒဿမ ၁ သန်း ပေးသွင်းထားပြီး ဘဏ္ဍာရေးနှစ်ကုန်ဆုံးပါက ကာရာအိုကေလုပ်ငန်းများမှ ကျပ် ၅၄ ဒဿမ ၈ သန်းခန့် ပေးသွင်းနိုင်မည်ဖြစ်ပါတယ်" ဟု ကရင်တိုင်းရင်းသားရေးရာ ဝန်ကြီး နော်ပန်းသဉ္ဇာမျိုးက ဆိုသည်။

လုပ်ငန်းလိုင်စင်ကြေးအဖြစ် ကာရာအိုကေစက်တစ်လုံးလျှင် မြန်မာကျပ်ငွေ သုံးသောင်းကောက်ခံပြီး သက်တမ်းတိုးမြှင့်ခ အဖြစ် စက်တစ်လုံးလျှင် ကျပ်ငွေနှစ်သောင်း ကောက်ခံကြောင်း၊ လုပ်ငန်းလိုင်စင်သက်တမ်းသည် စတင် ထုတ်ပေးသည့် နေ့မှ တစ်နှစ်တိတိသက်တမ်းရှိသည် ဟု နော်ပန်းသဉ္ဇာမျိုး၏ ဖြေဆိုချက်အရသိရသည်။

 

Mizzima Weekly