ရန်ကုန်၊ ဇန်နဝါရီ ၂၄ ။ ။ ရှစ်လေးလုံးပါတီအနေဖြင့် နိုင်ငံရေးပါတီမှတ်ပုံတင်လျှောက်ထားခဲ့သည်မှာ တစ်လပြည့်မြောက်ခဲ့သော်လည်း ပါတီမှတ်ပုံတင်ရန် ရွေးကောက်ပွဲကော်မရှင်မှ အကြောင်းပြန်ကြားခြင်းမရှိသေးကြောင်း ပါတီပြောရေးဆိုခွင့်ရှိသူ ဦးမင်းဇေယျာက မဇ္ဈိမသို့ အတည်ပြုပြောဆိုသည်။
"မကျသေးဘူး။တစ်လလည်း ကျော်သွားပြီ။ သတင်းစာထဲမှာလည်း ပါတီနာမည်တို့အလံတို့တံဆိပ်တို့နဲ့ ပတ်သက်ပြီး ကန့်ကွက်ရန် ရှိမရှိ ကလည်း သတင်းစာထဲမထည့်သေးဘူး" ဟု ဦးမင်းဇေယျာက ဆိုသည်။
၂၀၁၈ ခုနှစ်အတွင်း ကြားဖြတ်ရွေးကောက်ပွဲပြုလုပ်မည်ဟု ကော်မရှင်မှ ကြေညာထားခြင်းကြောင့် ဝင်ရောက်ယှဉ်ပြိုင်ရန် ရှစ်လေးလုံးပါတီမှ ပြင်ဆင်နေသော်လည်း မှတ်ပုံတင်မကျသေးခြင်းကြောင့် အတိအကျပြောဆိုရန် ခက်နေသည်ဟု ဦးမင်းဇေယျာက ဆိုသည်။
ရှစ်လေးလုံးအမည်ဖြင့် ပါတီမှတ်ပုံတင်ရန် ပြီးခဲ့သည့်နှစ် ဒီဇင်ဘာ ၁၉ ရက်နေ့၌ နေပြည်တော်ရှိ ရွေးကောက်ပွဲ ကော်မရှင်ရုံးတွင် ဦးကိုကိုကြီးမှ ဦးဆောင်ပြီး စာရင်းပေးသွင်းခဲ့ခြင်းဖြစ်သည်။
ရှစ်လေးလုံးပါတီ မှတ်ပုံတင်ခွင့်ပြုချက် ကြန့်ကြာနေသည့် ကိစ္စ မည်သည့်အတွက်ကြောင့် ဆိုသည်ကို သိရှိရန် ရွေးကောက်ပွဲ ကော်မရှင် ဥက္ကဋ္ဌ ဆက်သွယ်မေးမြန်းသော်လည်း မရရှိခဲ့ပေ။
၈၈ မျိုးဆက် မှ ဦးကိုကိုကြီး၊ ဦးမင်းဇေယျာ စသည့် ပုဂ္ဂိုလ်များမှ ဦးဆောင်ပြီး ရှစ်လေးလုံးအမည်ဖြင့် နိုင်ငံရေးပါတီ ထူထောင်ခြင်းအပေါ် နိုင်ငံရေးအသိုင်းအဝိုင်းမှ ဝေဖန်မှုများရှိနေသလို ထောက်ခံမှုများလည်း ရှိနေသည်။
