ဗြိတိန်မှကမ္ဘာကျော် ပေါ့ပ်ရော့ခ်ဂီတအဖွဲ့ Coldplay သည် Head Full of Dreams ခေါင်းစဉ်ဖြင့် ကမ္ဘာလှည့် ဖျော်ဖြေခဲ့သည့် သူတို့၏ဖျော်ဖြေပွဲများမှ ဝင်ငွေဒေါ်လာ သန်း၅၀၀ ကျော် ရရှိခဲ့သည်ဟု ဂီတသတင်းဝက်ဘ် ဆိုက် Billboard က ဖော်ပြခဲ့သည်။
Coldplay အဖွဲ့သည် ဖျော်ဖြေပွဲပေါင်း ၁၁၄ ခုကျော်မှ စုစုပေါင်းလက်မှတ် ၅.၄ သန်းခန့်ရောင်းချခဲ့ရပြီး နေရာပေါင်း ၈၃ နေရာခန့်တွင် ဖျော်ဖြေခဲ့ကာ ဘရာဇီးနိုင်ငံ ဆော်ပေါ်လိုမြို့မှ အေလီယန်နက်ဇ်ပါကွေး အားကစားကွင်းကြီးထဲ၌ ကျင်းပခဲ့သော ဖျော်ဖြေပွဲမှာ ကြီးကျယ်ခမ်းနားဆုံးဖြစ်ခဲ့သည်ဟု Billboard ၏ အဆိုအရ သိရသည်။
ထို့ကြောင့် Couldplay အဖွဲ့သည် ဂီတလောက၌ နယ်လှည့်ဖျော်ဖြေပွဲများမှ ဝင်ငွေအများဆုံးရရှိထားသော တီးဝိုင်း ၁၀ ခုစာရင်းထဲ၌ နံပါတ် ၃ နေရာ၌ ရပ်တည်နေပြီး ၎င်းတို့၏နောက်တွင် နာမည်ကျော်ရော့ခ်တီးဝိုင်း Guns N’ Roses က နံပါတ် ၄ နေရာမှ ရပ်တည်နေသည်။
ဝင်ငွေအကောင်းဆုံး တီးဝိုင်း ၁၀ ဝိုင်း၏ ထိပ်ဆုံး နှစ်နေရာမှ တီးဝိုင်းနှစ်ဝိုင်းမှာ U2 နှင့် The Rolling Stones တို့ဖြစ်ကြသည်။
Ref: BBC