ကုမ္ပဏီဥပဒေသစ်အရ ပေးအပ်ထားသည့်အခွင့်အရေးကို အသုံးချကာ အရင်းအနှီး၊ နည်းပညာနှင့် ဈေးကွက် မြှင့်တင်ရေးများ ဆောင်ရွက်သွားရန် ဒုတိယသမ္မတတိုက်တွန်း

.

ဒီဇင်ဘာ ၃၀ ။          ။ ပုဂ္ဂလိကလုပ်ငန်းရှင်များအနေဖြင့် မြန်မာနိုင်ငံကုမ္ပဏီများဥပဒေအရ ပေးထားသည့် အခွင့်အရေးများကို ထိထိရောက်ရောက်အသုံးချကာ ပြည်ပလုပ်ငန်းနှင့်ပူးပေါင်းပြီး လိုအပ်နေသည့် အရင်းအနှီး၊ နည်းပညာနှင့် ဈေးကွက်မြှင့်တင်မှုများ ဆောင်ရွက်သွားရန် နိုင်ငံတော် ဒုတိယသမ္မတဦးမြင့်ဆွေက တိုက်တွန်း ပြောကြား လိုက်သည်။

ဒုတိယသမ္မတဦးမြင့်ဆွေက မကြာသေးမီက အတည်ပြုခဲ့သည့် မြန်မာနိုင်ငံကုမ္ပဏီများဥပဒေတွင် နိုင်ငံခြား ရှယ်ယာ ၃၅ ရာခိုင်နှုန်းပါဝင်ခွင့်ပြုထားသည့်အပေါ် ထိထိရောက်ရောက်အသုံးပြုနိုင်ရန် ဒီဇင်ဘာ ၃၀ ရက်က ကုန်သည်စက်မှုအသင်းချုပ်တွင် ပြုလုပ်သည့် နိုင်ငံတော်ဒုတိယသမ္မတနှင့် မြန်မာ့စီးပွားရေးလုပ်ငန်းရှင်များ ပုံမှန်တွေ့ဆုံပွဲ (၁၃)ကြိမ်မြောက် အခမ်းအနားတွင် ပြောကြားခဲ့ခြင်းဖြစ်သည်။

ဒုတိယသမ္မတ ဦးမြင့်ဆွေက " မကြာသေးမီက ပြည်ထောင်စု လွှတ်တော်က အတည်ပြုခဲ့တဲ့ မြန်မာ နိုင်ငံကုမ္ပဏီများဥပဒေမှာလည်း နိုင်ငံခြားသားရှယ်ယာ ၃၅ ရာခိုင်နှုန်းအထိ ပါဝင်တဲ့ ကုမ္ပဏီကို မြန်မာ နိုင်ငံသား ကုမ္ပဏီအနေနဲ့ သတ်မှတ်တဲ့ မြန်မာနိုင်ငံသားပိုင်ကုမ္ပဏီတွေ အနေနဲ့ လိုအပ်တဲ့အရင်းအနှီး၊ နည်းပညာ၊ ဈေးကွက်မြှင့်တင်မှုတွေကို ပြည်ပ လုပ်ငန်းရှင်တွေနဲ့ ပူးပေါင်းလုပ်ကိုင်ခွင့် ရလာမှာဖြစ်တဲ့အတွက် ပုဂ္ဂလိက လုပ်ငန်းရှင်တွေအနေနဲ့ ဥပဒေအရ ပေးထားတဲ့ ဒီအခွင့်အရေးတွေကို ထိထိရောက်ရောက် အသုံးချနိုင်ဖို့လည်း တိုက်တွန်း ပြောကြားလိုပါတယ်" ဟုဆိုသည်။

အလားတူလက်ရှိဘဏ္ဍာနှစ်အတွင်း နိုင်ငံခြားရင်နှီးမြှုပ်နှံမှုပမာဏဟာ အမေရိကန်ဒေါ်လာ ၄ ဒသမ ၇၁၇ ဘီလီယံ ၀င်ရောက်ခဲ့ပြီး အစိုးရသစ်လက်ထက် အများဆုံးဝင်ရောက်ခဲ့သည့် လုပ်ငန်းကဏ္ဍများအနေဖြင့် ပို့ဆောင်ဆက်သွယ်ရေးကဏ္ဍတွင် ၃၃ ရာခိုင်နှုန်းနှင့် ကုန်ထုတ်လုပ်မှုကဏ္ဍတွင် ၂၄ ရာခိုင်နှုန်း ၀င်ရောက်ခဲ့ကြောင်း သိရသည်။

" ကုန်ထုတ်လုပ်မှုကဏ္ဍဟာ  ဒုတိယအဆင့်ကို ရောက်လာတာဟာ ပို့ကုန်မြှင့်တင်ရေးနှင့် သွင်းကုန်မြှင့်တင် ရေးလုပ်ငန်းများကို ပြည်တွင်းမှာ ရင်းနှီးမြှုပ်နှံနိုင်ရေးဆိုတဲ့ ရည်မှန်းချက်နဲ့ ရင်းနှီးမြှုပ်နှံမှုတွေ ဦးစားပေးမယ့် ကဏ္ဍတွေနဲ့ ချိတ်ဆက်အကောင်အထည် ဖော်နိုင်ခြင်းပဲ ဖြစ်ပါတယ်" ဟု ဒုတိယသမ္မတ ဦးမြင့်ဆွေက ဆိုသည်။

ယင်းအပြင် လက်ရှိဘဏ္ဍာနှစ် ဒီဇင်ဘာ ၁၅ ရက်အထိ ကုန်သွယ်မှုပမာဏမှာ အမေရိကန်ဒေါ်လာ ၂၂ ဒသမ ၆ ဘီလီယံကျော်ရရှိထားပြီး ယခင်နှစ်အလားတူကာလထက် အမေရိကန်ဒေါ်လာ ၃ ဒသမ ၈ ဘီလီယံနီးပါး ပိုမို ကုန်သွယ်နိုင်ခဲ့ခြင်းဖြစ်ကြောင်း သိရသည်။