ရန်ကုန်၊ ဒီဇင်ဘာ ရ ။ ။ ရှမ်းပြည်တပ်ဖွဲ့ SSPP/SSA နှင့် တအာဝ်းပလောင် တပ်ဖွဲ့တို့ နမ္မတူမြို့နယ်၊ မိုင်းရင်ကျေးရွာအုပ်စုအနီးတွင် ဖြစ်ပွားခဲ့သည့် ပစ်ခတ်မှုမှာ မတော်တဆ နားလည်မှုလွဲမှားကြခြင်းသာဖြစ်သည်ဟု TNLA ဘက်မှ ပြောသည်။
ပြီးခဲ့သည့် ဒီဇင်ဘာလ ၅ ရက် ည ၉ နာရီမှ ဒီဇင်ဘာလ ၆ ရက် မနက် ၁ နာရီအထိ နမ္မတူမြို့နယ် အတွင်းရှိ မိုင်းရင် ကျေးရွာအုပ်စုနားတွင် တိုက်ပွဲဖြစ်ပွားခဲ့ခြင်းဖြစ်ကြောင်း ဒေသခံများက ပြောသည်။
အဆိုပါကိစ္စနှင့် ပတ်သက်ပြီး PSLF/ TNLA အဖွဲ့မှ အထွေထွေအတွင်းရေးမှူး ဗုုိလ်မှူးချူပ် တာ့ဘုုန်းကျော် က “ တိုက်ပွဲဖြစ်တာ မဟုတ်ပါဘူး။ နှစ်ဖက်မှာနားလည်မှု နည်းနည်းလွဲမှားပြီး ဟိုဘက် ဒီဘက်ပစ်ကြတာ။ မတော်တဆ။ အခုက ဘာမှမဖြစ်တော့ပါဘူး အတူတူနေကြပါတယ်။ ကျွန်တော်တို့နှစ်ဖွဲ့က “ ဟုပြောဆိုသည်။
တိုက်ပွဲကြောင့် ထွက်ပြေးတိမ်းရှောင်လာသည့် စစ်ဘေးရှောင်များမှာ လတ်တလောတွင် လာရောက်ခြင်းမရှိသေးကြောင်း နမ္မတူစစ်ရှောင်စခန်း တာဝန်ခံ ဦးအောင်မြင့်စန်းက ဆိုသည်။
“ လောလောဆယ်တော့ IDP မရှိလာပါဘူးခင်ဗျ “ ဟု ၄င်းကဆိုသည်။
တအာဝ်းနှင့် SSPP တို့ ထိတွေ့မှုနှင့်ပတ်သက်ပြီး SSPP/ SSA ဘက်မှ အမြင်ကိုမေးမြန်းရန် ဖုန်းဖြင့် ဆက်သွယ် ရန်ကြိုးပမ်း သောလည်း ပြန်လည်ဖြေဆိုခြင်းမရှိခဲ့ပေ။
SSPP/SSA နှင့် TNLA တို့သည် တပ်မတော်နှင့် တိုက်ပွဲအချို့ဖြစ်ပွားနေသည့် အဖွဲ့များလည်းဖြစ်ပြီး UWSA ဦးဆောင်သည့် လက်နက်ကိုင် ရ ဖွဲ့ဖြင့် ဖွဲ့စည်းထားသော ပြည်ထောင်စု နိုင်ငံရေး ညှိနှိုင်းဆွေးနွေးရေး ကော်မတီ (FPNCC) အဖွဲ့ဝင်များလည်း ဖြစ်ကြသည်။
ယင်းကော်မတီအနေဖြင့် အစိုးရလက်ရှိလုပ်ဆောင်နေသည့် NCA ကိုလက်ခံခြင်းမရှိဘဲ နိုင်ငံရေးဆွေးနွေးခွင့် ရရှိရန် ကြိုးစားနေပြီး လက်ရှိတွင် ကော်မတီအဖွဲ့ဝင်များဖြစ်သည့် တအာဝ်းလွတ်မြောက်ရေး အဖွဲ့(TNLA)၊ ရခိုင်အဖွဲ့(AA)၊ ကိုးကန့်အဖွဲ့ (MNDAA)၊ ကချင်လွတ်လပ်ရေးအဖွဲ့( KIO) တို့နှင့် တပ်မတော်အကြား တိုက်ပွဲများဖြစ်ပွားနေသည်။
