ရန်ကုန်၊ဒီဇင်ဘာ ၅။ ။ အခမဲ့ရုပ်သံလိုင်းများအဖြစ် ထုတ်လွှင့်ရန် ပြန်ကြားရေးဝန်ကြီးဌာနမှ ရွေးချယ်ထားသည့် ပုဂ္ဂလိကမီဒီယာကုမ္ပဏီများတွင် မသန်စွမ်းများအတွက် ထည့်သွင်းစဉ်းစားပေးစေလိုကြောင်း အကြားအာရုံချို့တဲ့သူများအတွက်သတင်းအချက်အလက်များရရှိပိုင်ခွင့်သေချာစေရေးစီမံကိန်း၏ နည်းပညာအကြံပေးဒေါ်ယုယုဆွေက ပြောသည်။
အကြားအာရုံချို့တဲ့သူများအတွက်သတင်းအချက်အလက်များရရှိပိုင်ခွင့်သေချာစေရေးစီမံကိန်းမိတ်ဆက်ပွဲအခမ်းအနားကို ယနေ့ဒီဇင်ဘာ၅ရက်နေ့၌ ရန်ကုန်မြို့Green Hill Hotelမှာကျင်းပခဲ့သည်။
၄င်းစီမံကိန်းတွင် ရုပ်သံလွှင့်မီဒီယာများဖြစ်သည့် DVB တီဗီသတင်းဌာနနှင့် MRTV တို့တွင် ထုတ်လွှင့်ပေးလျက်ရှိသော Sign Language အစီစဉ်များပိုမိုတိုးတက်ကောင်းမွန်လာစေရန်ရည်ရွယ်ထားသည်။
“မည်သို့ပင်ဖြစ်စေမသန်စွမ်းသူတွေထဲကအထူးသဖြင့်နားမကြားသူတွေအတွက် တစ်ခုခုသောအစီအစဉ်မှာ Sign Language(လက်ဟန်ဘာသာစကား)နဲ့ထည့်ပေးနိုင်မယ်ဆိုရင် ဒါဟာသူတို့ရဲ့မသန်စွမ်းသူတွေအပေါ်မှာအလေးထားမှုကိုတွေ့ရတာပေါ့နော် အဲဒီတော့သတင်းတွေမှာ Sign Languageနဲ့ထည့်ပေးတာမျိုးဖြစ်ချင်ဖြစ်ပါမယ် ဒါမှမဟုတ်မသန်စွမ်းသူတွေနဲ့ပတ်သတ်တဲ့ အသိပညာပေးတာတွေကိုအစီစဉ်တစ်ခုကိုလုပ်ပေးတာမျိုးအဲဒါမျိုးတွေအတွက်သွားပြီးဆွေးနွေးကြည့်ချင်ပါသေးတယ်”ဟုနည်းပညာအကြံပေးသူဒေါ်ယုယုဆွေက ပြောသည်။
Young Investment၊ ကောင်းမြန်မာအောင်၊ DVB၊ Mizzima၊ Fortune International စသည့် မီဒီယာကုမ္ပဏီများကိုဧပြီ(၁၁)ရက် တွင် Content Providerအဖြစ် ပြန်ကြားရေးဝန်ကြီးဌာနမှ Free To Air(အခမဲ့ရုပ်သံလိုင်း)များအဖြစ် ထုတ်လွှင်စေရန် ရွေးချယ်ခဲ့သည်။
အဆိုပါလိုင်းများတွင် အကြားအာရုံမသန်စွမ်းသူများနားလည်စေရန် Sign Languageများဖြင့် တင်ဆက်ပေးစေလိုသည့်အပြင် အဆိုပါအလုပ်အကိုင်နေရာများအတွက်လည်းမသန်စွမ်းများကိုခန့်ထားစေလိုသည်ဟုပွဲတက်ရောက်လာသူအကြားအာရုံမသန်စွမ်းတစ်ဦးမှ ပြောသည်။
“ဘာသာပြန်မယ့်နေရာမှာထည့်လိုက်မယ်ဆိုရင် နားမကြားတဲ့သူတွေအတွက် အလုပ်အကိုင်အခွင့်အလမ်းလည်းရရှိစေမှာဖြစ်ပါတယ်”ဟု ၄င်းမှ ဝင်ရောက်ဆွေးနွေးခဲ့သည်။
လက်ရှိအချိန်တွင် ရုပ်သံလိုင်းများဖြစ်သည့် DVB နှင့် MRTV တို့တွင်သာအကြားအာရုံမသန်စွမ်းများအတွက် Sign Languageဖြင့် တင်ဆက်ပေးလျက်ရှိသည်။
၂၀၁၄ခုနှစ် သန်းခေါင်စာရင်းစစ်တမ်းများအရလူဦးရေစုစုပေါင်း ၂,၃၁၁,၂၅၀ဦး သည် မသန်စွမ်းသူများဖြစ်ကြပြီး ၄င်းတို့ထဲမှ ၁.၃ရာခိုင်နူန်း၊ လူဦးရေ၆၅၃,၁၇၉.၃၄၉သည် အကြားအာရုံမသန်စွမ်းများ ဖြစ်နေသည်။