မကွေးတိုင်းဒေသကြီး မကွေးမြို့ နတ်မောက်လမ်း၊ ကံရွာလေးကျေးရွာအနီး မြို့ဝင်ဂိတ်တွင် နိုဝင်ဘာ ၂၂ ရက်နေ့က တရားမဝင် ရေနံစိမ်း များသယ်ဆောင်လာသော (၁၂)ဘီး ဘောက်ဆာယာဉ် တစ်စီးဖမ်းဆီး အရေးယူထားကြောင်း မကွေးမြို့မရဲစခန်းမှ သိရသည်။
မကွေးခရိုင်ရဲတပ်ဖွဲ့မှူးရုံးမှ ရဲအုပ်အေးမင်းထွန်း ဦးစီးသော ရပ်တပ်ဖွဲ့ဝင်များက သက်သေများနဲ့အတူ မကွေးဘက်မှ နတ်မောက်လမ်း အတိုင်း ယာဉ်မောင်းဇော်လတ် မောင်းနှင်လာသည့် YGN-8F/7828၁၂ ဘီး Hino-Boxer ယာဉ်အား ရပ်တန့်စစ်ဆေးရာ ယာဉ်နောက်လိုက် နိုင်ထွန်း နဲ့ အေးမင်းထွန်းတို့ လိုက်ပါလာကာ ရေနံစိမ်း ပေပါ (၇၀) ခန့် တင်ဆောင်လာသည်ကို စစ်ဆေးတွေ့ရှိရကြောင်း ရဲအုပ်အေးမင်းထွန်းက ပြောသည်။
"သယ်ယူခွင့်မျှောလက်မှတ် မပါဘဲ ယာဉ်မောင်း အမည် လွဲနေတာ တွေ့ရတယ်။ အဲဒီယာဉ်ရဲ့ အောက်ခံ နံပါတ်ပြား MDY-1D/4561 ပေါ်မှာ YGN-8F/7828 နံပါတ်ပြားကို ကပ်ခွာနဲ့ ကပ်ထားတာ တွေ့ရတဲ့အတွက် ယာဉ်မောင်းဇော်လတ်ကို စစ်ဆေးပါတယ်၊ တရားမဝင် ရေနံစိမ်းတွေ သယ်လာကြောင်း စစ်ဆေးပေါ်ပေါက်တဲ့အတွက် ဥပဒေအရ အရေးယူပေးဖို့ မကွေးမြို့မရဲစခန်းမှာ တိုင်တန်းခဲ့ခြင်းဖြစ်ပါတယ်" ဟု ရဲအုပ်အေးမင်းထွန်းက ပြောသည်။
အဆိုပါဖြစ်စဉ်နှင့် ပတ်သက်၍ ဇော်လတ်၊နိုင်ထွန်း ၊အေးမင်းထွန်းတိုအား မကွေးမြို့မရဲစခန်း (ပ)၃၄၀၃/၂၀၁၇၊ ၁၉၈၉ နိုင်ငံတော် စီးပွားရေး ဥပဒေပုဒ်မ -၉ အ ဖြစ် အမှုဖွင့် အရေးယူ စစ်ဆေးလျက်ရှိကြောင်း မကွေးမြို့မရဲစခန်း အမှုစစ် ဒုရဲအုပ် သိန်းစိုးကပြောသည်။
