သူရဦးရွှေမန်းနှင့် နိုင်ငံရေးကိစ္စဆွေးနွေးခဲ့ဟု ဒေါ်အောင်ဆန်းစုကြည်ပြော

သူရဦးရွှေမန်းနှင့် နိုင်ငံရေးကိစ္စဆွေးနွေးခဲ့ဟု ဒေါ်အောင်ဆန်းစုကြည်ပြော
သြဂုတ် ၁၈ရက်က လွှတ်တော်တွင်း မီဒီယာများ နှင့် တွေ့ဆုံနေသည့် ဒေါ်အောင်ဆန်းစုကြည်ကို တွေ့ရစဉ်။ (ဓာတ်ပုံ-မင်းမင်း)

နေပြည်တော် (မဇ္ဈိမ) ။ ။ အာဏာရပါတီ၏ ပူးတွဲဥက္ကဋ္ဌရာထူးမှ ဖယ်ရှားခံထားရသည့် သူရဦးရွှေမန်းနှင့် ယမန်နေ့က တွေ့ဆုံစဉ် ပါတီကိစ္စ အပြင် နိုင်ငံရေးကိစ္စများ ဆွေးနွေးခဲ့သည်ဟု ဝါရင့်အတိုက်အခံခေါင်းဆောင် ဒေါ်အောင်ဆန်းစုကြည်က ပြောဆိုလိုက်သည်။
 
သို့သော် ဆွေးနွေးမှုအသေးစိတ်ကို ဒေါ်အောင်ဆန်းစုကြည်က ထုတ်ဖော်ပြောဆိုခြင်းမရှိပေ။
 
“ဘာဆွေးနွေးတယ်ဆိုတာကို ဘယ်တော့မှ ကြေညာလေ့ မရှိဘူး။ ပုံမှန်ပေါ့။ ပါတီကိစ္စတွေ၊ နိုင်ငံရေး ကိစ္စတွေ ဆွေးနွေးတာ” ဟု ဩဂုတ် ၁၈က ပြည်သူ့လွှတ်တော်အစည်းအဝေးအပြီး သတင်းထောက်များ၏ မေးမြန်းမှုကို ဒေါ်အောင်ဆန်းစုကြည်က ပြန်ဖြေခဲ့သည်။
 
သူရဦးရွှေမန်းနှင့် ဒေါ်အောင်ဆန်းစုကြည်တို့ ဩဂုတ် ၁၇ရက်က နံနက်ပိုင်းက လွှတ်တော်အဆောက်အဦ အတွင်း တစ်နာရီကျော်ကြာ သီးသန့်တွေ့ဆုံဆွေးနွေးခဲ့ခြင်းဖြစ်ပြီး ယင်းတွေ့ဆုံမှုသည် ကြံ့ခိုင်ရေးပါတီ၏ ပူးတွဲဥက္ကဋ္ဌရာထူးမှ သူရဦးရွှေမန်း ဖယ်ရှားခံရပြီးနောက် ပထမဆုံးအကြိမ် တွေ့ဆုံမှုဖြစ်သည်။
 
ကြံ့ခိုင်ရေးပါတီ၏ အပြောင်းအလဲသည် လွှတ်တော်သို့ ရိုက်ခတ်မှုမရှိသင့်ဟုလည်း ဒေါ်အောင်ဆန်းစုကြည်က မှတ်ချက်ပြုသည်။
 
“လွှတ်တော်ကို ရိုက်ခတ်မှု မရှိသင့်ဘူး။ ရှိလာပြီဆိုရင်တော့ ဒါလုံးဝမဖြစ်သင့်တဲ့ ကိစ္စပဲ” ဟု ဒေါ်အောင်ဆန်းစုကြည်က သတင်းထောက်များကို ပြောသည်။
 
သူရဦးရွှေမန်းကလည်း ကြံ့ခိုင်ရေးပါတီ၏ ပြောင်းလဲမှုဖြစ်ရပ်များကို လွှတ်တော်တွင်း သယ်မလာရန် ဩဂုတ် ၁၈ မွန်းလွှဲပိုင်းက ပြည်ထောင်စုလွှတ်တော်အစည်းအဝေးတွင် အမတ်များကို သတိပေးထားသည်။
 
လက်ရှိတွင် သူရဦးရွှေမန်းမှာ ကြံ့ခိုင်ရေးပါတီ၏ သာမန်ပါတီဝင်တစ်ဦးအနေဖြင့်သာ ဖြူးမြို့နယ်၊ ပြည်သူ့လွှတ်တော်နေရာတွင် ဝင်ရောက်ယှဉ်ပြိုင်မည်ဖြစ်သည်။
 
သူရဦးရွှေမန်း ရာထူးမှ ဖယ်ရှားခံရမှုသည် အတိုက်အခံခေါင်းဆောင် ဒေါ်အောင်ဆန်းစုကြည်နှင့် နီးစပ်သည့် ဆက်ဆံရေးရှိမှုကြောင့်ဟုလည်း ဝေဖန်ပြောဆိုလျက်ရှိကြသည်။

အမျိုးသားလွှတ်တော်အမတ် ဦးလှဆွေကမူ ကြံ့ခိုင်ရေးပါတီ၏ အပြောင်းအလဲအပေါ် သဘောကျသော်လည်း ပြောင်းလဲမှုပုံစံမှာ ဒီမိုကရေစီနည်းလမ်းတကျမဟုတ်ဟု ဝေဖန်ပြောဆိုသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required