ရန်ကုန် ၊ နိုဝင်ဘာ ၁၁ ။ ။ နယူးဖိုးဝ ရုပ်ရှင်ထုတ်လုပ်ရေးမှ ပထမဆုံး ပွဲဦးထွက် တင်ဆက်လိုက်သည့် အမည်ပေါက်နှင့်ကျူး ရုပ်ရှင် ဇာတ်ကားကြီးကို နိုဝင်ဘာ ၁၀ရက်မှ စတင်ပြီး မြန်မာတစ်နိုင်ငံလုံးရှိ ရုပ်ရှင်ရုံများတွင် စတင် ပြသနေပြီ ဖြစ်သည်။
ဇာတ်လမ်း ဇေယျာ ၊ ကိုငယ်လေး (DV5) ဖြစ်ပြီး ဇာတ်ညွှန်း မြမြင့်မိုရ် ၊ နေစိုးသော် ဖြစ်ကာ ဒါရိုက်တာ ဇော်မျိုးမှ ရိုက်ကူးပုံဖော်ထားပြီး သရုပ်ဆောင်များ အဖြစ် မြင့်မြတ် ၊ အိချောပို ၊ မေကဗျာ ၊ ဇင်ဝိုင်း နှင့် တခြား သရုပ်ဆောင်များစွာတို့ ပါ၀င် သရုပ်ဆောင်ထားကြသည်။
အမည်ပေါက်နှင့်ကျူး ရုပ်ရှင် ဇာတ်ကားသည် ကျူးကျော်ရပ်ကွက်တွင် နေထိုင်သူများ၏ ဘဝကို ပုံဖော် ရိုက်ကူး ပြသထားသည့် ဒရာမာ ရုပ်ရှင်ကားဖြစ်ပြီး တကယ့်ကျူးကျော်ရပ်ကွက်တွင် သွားရောက် ရိုက်ကူးထားခြင်း ဖြစ်သည်။
ထိုဇာတ်ကားသည် ငွေမရှိသော်လည်း ပျော်ပျော်နေတတ်သည့် ကျူး ရပ်ကွက်သားများ ၊ အကူအညီလိုရင် အချိန်မရွေး ကူညီ ပေးတတ်သည့် မြန်မာလူမျိုးတို့၏ စိတ်ဓါတ် ၊ အခက်အခဲနှင့် ရင်ဆိုင်ရလည်း စည်းစည်းလုံးလုံး ညီညီညွတ်ညွတ် ရင်ဆိုင် ဖြေရှင်းဖို့ လိုအပ်ကြောင်းတွေကို ရိုက်ကူးပြသထားသည်။
အမည်ပေါက်နှင့်ကျူး ရုပ်ရှင်ဇာတ်ကားတွင် မြေလုတိုက်ပွဲများနှင့် မိသားစုရေးရာပြသနာများကြောင့် တရားရုံး တွင် ဖြေရှင်းကြရသည့် ဇာတ်ဝင်ခန်းများပါရှိပြီး ထိုဇာတ်ဝင်ခန်းများ အတွက် တရားရုံးအစစ်တွင် ရိုက်ကူးရန် အခက်အခဲ ရှိခဲ့တာကြောင့် ထိုဇာတ်ကားတွင် တရားရုံး ဆက်တင်တစ်ခုလုံးကို တရားရုံး အင်္ဂါရပ်နှင့်အညီ အတုတည်ဆောက်ကာ ရိုက်ကူးခဲ့ကြသည်။
အငိုမင်းသား ဟု လူသိများခဲ့သည့် သရုပ်ဆောင် မြင့်မြတ် သည် ယခုနောက်ပိုင်းတွင် စျေးကွက် အခြေအနေ အရ ဟာသကားတွေ အရိုက်များလာခဲ့သည့် သရုပ်ဆောင် မြင့်မြတ်ကို အမည်ပေါက်နှင့်ကျူး ရုပ်ရှင်ဇာတ်ကားတွင် ၎င်း၏ မူလပင်ကိုစတိုင်ဖြစ်သည့် ဒရာမာဇာတ်ရုပ်ကို ကြည့်ရှုရမည် ဖြစ်ကာ လက်ရှိတွင် ပရိသတ် များ မှ အကယ်ဒမီ ရနိုင်သည် ဟု ထင်ကြေး ပေးခံနေရသည်။