အပစ်ရပ်လက်မှတ်ထိုးရေး UNFC နှင့် အစိုးရ ၈ ကြိမ်မြောက်တွေ့

အပစ်ရပ်လက်မှတ်ထိုးရေး UNFC နှင့် အစိုးရ ၈ ကြိမ်မြောက်တွေ့

ရန်ကုန် ၊ နိုဝင်ဘာ ၈ ။           ။ တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) တွင် လက်မှတ်ရေးထိုးနိုင်ရန်အတွက် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ(UNFC) မှ ဖွဲ့စည်းထားသည့် နိုင်ငံရေးဆိုင်ရာညှိနှိုင်းဆွေးနွေးရေးအဖွဲ့(DPN) နှင့် ငြိမ်းချမ်းရေးကော်မရှင်(PC) တို့၏ (၈) ကြိမ်မြောက်တွေ့ဆုံဆွေးနွေးပွဲကို ရန်ကုန်မြို့ ရွှေလီလမ်းရှိ NRPC ရုံးတွင် ယနေ့ ပြုလုပ်နေသည်။

ယနေ့ တွေ့ဆုံဆွေးနွေးပွဲ၌ နိုင်ငံရေးဆိုင်ရာညှိနှိုင်းဆွေးနွေးရေးအဖွဲ့(DPN) ဘက်မှ အဆိုပြုထားသည့် အချက်(၈)ချက် အနက် တပ်ပိုင်းဆိုင်ရာနေရာချထားရေးကိစ္စရပ်များကို အဓိကထား ဆွေးနွေးသွားမည်ဟု သိရသည်။

၁၅လ ကြာ အစိုးရနှင့်ဆွေးနွေးလာခဲ့သည့် ဆွေးနွေးပွဲတွင် တပ်ပိုင်းဆိုင်ရာ နေရာချထားရေးကို အဓိကဆွေးနွေး ပြီးပြတ်ပါက ကျန်သည့်အချက်များသည် လွယ်လွယ်ကူကူ ဆွေးနွေးပြီးပြတ်နိုင်မည်ဟု   ဆွေးနွေးပွဲအဖွင့်မိန့်ခွန်းတွင် DPN အဖွဲ့ခေါင်းဆောင် ခူဦးရယ်က ထည့်သွင်းပြောဆိုခဲ့သည်။

"ဒီဆွေးနွေးပွဲဟာ နောက်ဆုံးဖြစ်မယ်လို့ နှစ်ဘက်စလုံးက ယုံကြည်ပါတယ်" ဟု ဆွေးနွေးပွဲအဖွင့်မိန့်ခွန်း၌ ခူဦးရယ်က ထည့်သွင်းပြောဆိုခဲ့သည်။

ယနေ့ဆွေးနွေးပွဲကို DPN ဘက်မှ အဖွဲ့ဝင်များ ၊ ငြိမ်းချမ်းရေးကော်မရှင်ဘက်မှ အဖွဲ့ဝင်များ ၊ တပ်ပိုင်းဆိုင်ရာ ကိုယ်စားလှယ်များအပြင် အပစ်ရပ်လက်မှတ်ရေးထိုးထားသည့် အဖွဲ့များမှ ကိုယ်စားလှယ်များပါ တက်ရောက်ခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly

Tags