စီရော်နယ်ဒို(သို့)ကြိုးစားမှုနဲ့ဘဝကို တည်ဆောက်သူ

စီရော်နယ်ဒို(သို့)ကြိုးစားမှုနဲ့ဘဝကို တည်ဆောက်သူ

စီရော်နယ်ဒိုဆိုတာ လက်ရှိဘောလုံးကမ္ဘာမှာ အကောင်းဆုံးဘောလုံးသမားတစ်ဦးဖြစ်ပါတယ်။ နိုင်ငံလက်ရွေးစင်ဘောလုံးသမား တစ်ယောက် ဖြစ်ဖို့ဆိုတာ မလွယ်ပါဘူး။ စီရော်နယ်ဒိုလို ကမ္ဘာ့ထိပ်တန်းဘောလုံးသမားတစ်ဦးဖြစ်ဖို့ဆိုတာက ပိုပြီးတော့တောင် မလွယ်ပါသေးတယ်။

စီရော်နယ်ဒိုဟာ ဒီအဆင့်ကို အလွယ်တကူရောက်လာတာ မဟုတ်ပါဘူး။ လေ့ကျင့်ပေးဆပ်မှုတွေ အများကြီးလုပ်ခဲ့ရပါတယ်။ အောင်မြင်လာတော့လည်း အောင်မြင်မှုတွေကို ဆက်ထိန်းဖို့ ကြိုးစားရပြန်ပါတယ်။

စီရော်နယ်ဒို မန်ယူအသင်းကိုရောက်စက ပုံစံကို မှတ်မိကြဦးမှာပါ။ နဖူးပေါ်ဝဲကျနေတဲ့ ရွှေရောင်ဆံပင်ကောက်ကောက်၊ ပိန်ပိန်သွယ်သွယ်နဲ့လျှင်မြန်တဲ့ သူ့ပုံစံက စောင့်ကြွားကြွားလေးပါ။ မန်ယူကို ရောက်စက စီရေ်ာနယ်ဒိုနဲ့ ရီးယဲလ်ကို ရောက်စက စီရော်နယ်ဒိုဟာ အများကြီးကွဲပြားခြားနားမှု ရှိခဲ့ပါတယ်။ အခုဆိုရင် ပိုလို့တောင် ခြားနားသွားပါပြီ။

တောင့်တင်းခိုင်မာတဲ့ သူ့ရဲ့ ခန္ဓာကိုယ်ကို ရရှိဖို့ စီရော်နယ်ဒို ဘယ်လိုလေ့ကျင့်ခဲ့ရသလဲ ဘယ်လိုကြိုးစားခဲ့သလဲဆိုတာ ဒီဗီဒီယိုဖိုင်မှာ တွေ့ရမှာ ဖြစ်သလို သူ့ရဲ့ အကြံ့ပေးမှုတွေကိုလည်း အောက်မှာ ဖတ်ရှုနိုင်ပါတယ်။

၁။ ကိုယ်ခန္ဓာကြံ့ခိုင်ဖို့ လေ့ကျင့်သလို စိတ်ဓာတ်ကြံ့ခိုင်ဖို့လည်း လေ့ကျင့်ပါ။ စိတ်ဓာတ်ကြံ့ခိုင်တာက ကိုယ်ခန္ဓာကြံ့ခိုင်သလို အရေးကြီးပါတယ်။ ဒါက ကိုယ်လိုချင်တဲ့ ရည်မှန်းချက်တွေကိုရောက်အောင် ကူညီပါလိမ့်မယ်။

၂။ ကိုယ်ပိုင်စည်းကမ်းတွေ ချမှတ်ထားပါ။ ကိုယ့်ကိုကိုယ်စိတ်အားတက်ကြွအောင် အမြဲလုပ်ပြီး ပုံမှန်လေ့ကျင့်ခန်းလုပ်တာက အရေးကြီးပါတယ်။ ကျွန်တော်ကတော့ ကျွန်တော့်ရဲ့စည်းကမ်းတွေကို တိတိကျကျ လိုက်နာပါတယ်။

၃။ လေ့ကျင့်ဖော်တစ်ယောက်နဲ့အတူ လေ့ကျင့်ပါ။ အဲ့ဒါက နည်းလမ်းကောင်းတစ်ခုဖြစ်ပါတယ်။ အကူအညီလည်းရသလို တစ်ယောက်ကို တစ်ယောက်တွန်းအားလည်း ဖြစ်စေပါတယ်။

၄။ အိပ်ပါ။ အိပ်စက်ခြင်းက အမှန်တကယ်ကို အရေးကြီးပါတယ်။ ကျွန်တော်ဆို စောစောအိပ်ယာဝင်လေ့ရှိပြီး စောစောထပါတယ်။ အထူးသဖြင့် ပွဲကစားဖို့ရှိတဲ့ ရက်တွေမှာပေါ့။ အိပ်စက်ခြင်းက ကြွက်သားတွေကို recover ပြန်ဖြစ်စေပါတယ်။

၅။ အချိန်မှန်မှန်စားပါ။ မှန်မှန်လေ့ကျင့်တာက အရေးကြီးသလို မှန်မှန်စားတာကလည်း အရေးကြီးပါတယ်။ မြင့်မားတဲ့ စွမ်းအင်နဲ့ ကောင်းမွန်တဲ့စွမ်းဆောင်မှုကို ရဖို့ စားပါ။ ကျွန်တော်ဆို တစ်ခါတစ်လေ တစ်နေ့ကို ခြောက်ကြိမ်လောက် စားပါတယ်။

၆။ သွေးပူလေ့ကျင့်ပါ။ သွေးပူလေ့ကျင့်တာက ဒဏ်ရာရရှိမှုကို တားဆီးပေးနိုင်ပါတယ်။ ကျွန်တော်တို့ဆို လေ့ကျင့်ရေးမစခင် အကြောလျှော့ပြီး ကွင်းကို အနည်းငယ်ပတ်ပြေးကြပါတယ်။ gym မှာဆိုရင်လည်း စက်ဘီးစီးတာ ဒါမှမဟုတ် အပြေးစက်ပေါ်မှာ ပြေးတာ လုပ်ပါတယ်။

၇။ ပစ္စည်းလွတ်ကစားပါ။ ဝိတ်ပစ္စည်းတွေမပါပဲ အလွတ်ကစားတာက ခန္ဓာကိုယ်ကြံ့ခိုင်မှုနဲ့ သက်လုံကောင်းမှုအတွက် အဓိက ကျပါတယ်။ မိနစ် ၃၀ လောက် ကြိုးစားကစားပြီး တဖြည်းဖြည်းတိုးသွားသင့်ပါတယ်။ ဝိတ်ကစားတာနဲ့ပစ္စည်းလွတ်ကစားတာကို ရောပြီး လေ့ကျင့်တာကလည်း စိတ်ဝင်စားဖို့ကောင်းပါတယ်။

၈။ ပြင်းပြင်းထန်ထန်လေ့ကျင့်ပါ။ ပြင်းပြင်းထန်ထန်လေ့ကျင့်တာက သွေးလည်ပတ်မှုကို ကောင်းစေသလို သက်လုံကိုလည်း ပိုကောင်းစေပါတယ်။ ကျွန်တော်ဆို အပြေးစက်ပေါ်မှာ ပြင်းပြင်းထန်ထန်ပြေးပါတယ်။ gym ထဲမှာ လုပ်နိုင်သလို အပြင်မှာလည်း လုပ်လို့ ရပါတယ်။

၉။ ရေသောက်ပါ။ ရေဓာတ်ပြည့်ဝနေဖို့ ရေသောက်တာက အရေးကြီးပါတယ်။ ဒါကြောင့် ကျွန်တော် အယ်လ်ကိုဟောကို ရှောင်ပါတယ်။

၁၀။ သီချင်းနားထောင်ပါ။ ကောင်းမွန်တဲ့ သီချင်းတွေကို ကျွန်တော်အမြဲနားထောင်ပါတယ်။ Music က စိတ်ဓာတ်တက်ကြွလာအောင် လုပ်ပေးနိုင်ပါတယ်။ ဟစ်ဟော့နဲ့ ရက်ဂေးသီချင်းတွေ နားထောင်ရတာကို ကျွန်တော်ကြိုက်ပါတယ်။

၁၁။ အနားယူပါ။ လေ့ကျင့်ခန်းဆင်းတာနဲ့ ခန္ဓာကိုယ်ကြံ့ခိုင်မှုအတွက် ကစားတာက အရေးကြီးပါတယ်။ ဒါပေမဲ့ လွတ်လပ်ပေါ့ပါးတဲ့ ဘဝစတိုင်နဲ့အနားယူမှုက စိတ်ပိုင်းနဲ့ရုပ်ပိုင်းကို အကောင်းဆုံးဖြစ်စေဖို့ ကူညီပေးပါတယ်။ ကျွန်တော့်ရဲ့ အားလပ်ချိန်တွေမှာ မိသားစု၊ သူငယ်ချင်းတွေနဲ့ အချိန်ဖြန်းလေ့ရှိပါတယ်။ ဒါက ကျွန်တော့်ကို အနားရစေသလို အကောင်းမြင်စိတ်ကိုလည်း ဖြစ်ပေါ်စေပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required