အောက်တိုဘာ ၁၃၊ အင်္ဂလန် ။           ။ စက်တင်ဘာလအတွက် ပရီးမီးယားလိဂ်အကောင်းဆုံးကစားသမားဆုကို စပါးတိုက်စစ်မှူး ဟယ်ရီကိန်းက ရရှိခဲ့ပြီး အကောင်းဆုံးနည်းပြဆုကို မန်စီးတီးနည်းပြ ဂွါဒီယိုလာက ဆွတ်ခူးရရှိသွားခဲ့သည်။

ဟယ်ရီကိန်းသည် စက်တင်ဘာလအတွင်း စပါးအသင်းအတွက် လေးပွဲကစားခဲ့ရာတွင် ခြောက်ဂိုးအထိသွင်းယူနိုင်ခဲ့သည်။ ထို့ကြောင့် မန်ယူတိုက်စစ်မှူးလူကာကူ၊ ချယ်လ်ဆီးတိုက်စစ်မှူး မိုရာတာတို့ကို ဖြတ်ကျော်ပြီး အကောင်းဆုံးကစားသမားအဖြစ် ရွေးချယ်ခံခဲ့ရသည်။

ဟယ်ရီကိန်းအတွက် ယခုအကြိမ် တစ်လတာအကောင်းဆုံးဆုရခြင်းသည် ငါးကြိမ်မြောက်ဖြစ်သည်။ ရွန်နီ၊ ဗန်ပါစီတို့နှင့် အကြိမ်အရေအတွက် တူညီသွားခဲ့ပြီး ၆ ကြိမ်ရရှိထားသည့် ဂျရတ်ကို လိုက်မီရန် တစ်ကြိမ်သာ လိုအပ်တော့သည်။

မန်စီးတီးနည်းပြ ဂွါဒီယိုလာမှာမူ စက်တင်ဘာလအတွင်း မန်စီးတီးအသင်း ၄ ပွဲစလုံးအနိုင်ရခဲ့သည့်အတွက် အကောင်းဆုံးနည်းပြဆုရခဲ့ခြင်းဖြစ်သည်။ မန်စီးတီးအသင်းသည် လီဗာပူးလ်၊ ဝက်ဖို့ဒ်၊ ခရစ္စတယ်ပဲလေ့စ်၊ ချယ်လ်ဆီးတို့နှင့် ပွဲစဉ်အားလုံးကို အနိုင်ရရှိခဲ့ပြီး ထိုလေးပွဲတွင် ၁၇ ဂိုးအထိသွင်းယူနိုင်ခဲ့ကာ ပေးဂိုးမရှိခဲ့ပေ။

ဂွါဒီယိုလာသည် ပြိုင်ဘက်နည်းပြများဖြစ်သော မန်ယူနည်းပြမော်ရင်ဟို၊ စပါးနည်းပြပိုချက်တီနိုနှင့် အာဆင်နယ်နည်းပြ အာစင်ဝင်းဂါးတို့ကို ကျော်ဖြတ်ပြီး ဆုရခဲ့ခြင်း ဖြစ်သည်။

ရည်ညွှန်း ပရီးမီးယားလိဂ်