အောက်တိုဘာ ၁၊ အင်္ဂလန် ။ ။ တိုက်စစ်မှူးမိုရာတာ၏ဒဏ်ရာမှာ မစိုးရိမ်ရကြောင်း ချယ်လ်ဆီးနည်းပြကွန်တီက ပြောဆိုလိုက်သည်။ မိုရာတာသည် မန်စီးတီးနှင့်ပွဲစဉ်တွင် ပွဲချိန် ၃၅ မိနစ်၌ ၎င်း၏ဘယ်ဘက်တံကောက်ကြောကို ကိုင်ကာ ကွင်းအတွင်းမှ ထွက်ခွာသွားခဲ့သည်။
စပိန်တိုက်စစ်မှူးသည် ချယ်လ်ဆီးအသင်းအတွက် ၈ ပွဲတွင် ၇ ဂိုးသွင်းယူပေးထားသူ ဖြစ်သည်။ ပြီးခဲ့သည့် အက်သလက်နှင့်ချန်ပီယံလိဂ်ပွဲစဉ်တွင်လည်း ၁ ဂိုးသွင်းယူပေးခဲ့သည်။
"ကြွက်သားဒဏ်ရာ ပြဿနာပါ။ အရမ်းကြီးဆိုးရွားတယ်လို့ မထင်ပါဘူး။ ဘာဖြစ်လို့လဲဆိုတော့ ဒဏ်ရာအရမ်း မဆိုးခင်မှာပဲ မိုရာတာက ကစားတာကို ရပ်လိုက်လို့ပါ။ အသင်းဆရာဝန်က သူ့ကိုဆေးစစ်နေပါတယ်။ နိုင်ငံတကာပွဲတွေ ကစားနိုင်မယ်လို့တော့ ကျွန်တော်မထင်ပါဘူး။
ပြိုင်ဆိုင်မှုပြင်းထန်တဲ့ ပွဲစဉ်သုံးပွဲလောက် ဆက်တိုက်ကစားပြီးသွားရင် ဒီလိုခံစားရတာက ပုံမှန်ပါပဲ။ မိုရာတာက ကျွန်တော်တို့အသင်းအတွက် အရေးကြီးတဲ့တိုက်စစ်မှူးဖြစ်လို့ စွန့်စားပြီး အသုံးမပြုချင်ပါဘူး" ဟု ကွန်တီက ပြောဆိုခဲ့သည်။
