ယမန်နေ့ စက်တင်ဘာလ ၂၉ ရက်နေ့ ညနေခင်းက စစ်တွေမြို့ ပွိုင့်ကမ်းခြေတွင် အမျိုးသား လူသေ အလောင်းတစ်ခုအား တွေ့ရှိခဲ့သည်။
သေဆုံးမှုနှင့် ပတ်သက်၍ ဓမ္မတာအတိုင်း သေဆုံးခြင်း ဟုတ်မဟုတ် တာဝန်ရှိသူများက စုံစမ်းစစ်ဆေးနေပြီး လက်ရှိတွင် သေမှုသေခင်းဖြင့် စစ်တွေမြို့မ ရဲစခန်းမှ အမှုဖွင့် ဆောင်ရွက်ထားရှိကြောင်း သိရသည်။
သေဆုံးသူမှာ ပေါက်တောမြို့နယ် စိုင်းတုတ်ကျေးရွာနေ ဦးအောင်စောချေ ဖြစ်ပြီး ရေလုပ်ငန်းဖြင့် အသက်မွေးဝမ်းကြောင်းပြုနေသူ ဖြစ်ကြောင်း စစ်တွေမြို့မ အမှတ် (၁) ရဲစခန်းက အတည်ပြု ပြောကြားသည်။
“ လူသေအလောင်း တစ်လောင်းတွေ့တယ်ဆိုလို့ သွားပြီးစစ်ဆေးတာ။ မျက်နှာတွေက ပွပြီးတော့ အရုပ်တွေတောင် ပွနေပြီ။ သေတဲ့သူက ပေါက်တောနယ်ကပါ။ ဒီကို ငါးရောင်းဖို့အတွက် သူ့လူတွေနဲ့ လာတာမှာ လမ်းမှာ စက်လှေပေါ်က ပြုတ်ကျပြီးသေတာ။ အလောင်းကိုတော့ ၂၉ ရက်နေ့မှ တွေ့တာပါ။ ရိုးရိုးသေတာလားဆိုတာကို အမှုဖွင့် စစ်ဆေးနေပါတယ်။”ဟု စစ်တွေမြို့မ အမှတ် (၁) ရဲစခန်းမှ ဖုန်းလက်ခံဖြေဆိုသော အရာရှိက စက်တင်ဘာ ၃၀ ရက်နေ့ နေ့လည် ၁ နာရီ ၃၀ မိနစ်အချိန်ခန့်တွင် RiA သို့ ပြောသည်။
အဆိုပါ အရာရှိ၏ အမည်ကို မေးမြန်း၍ မရသလို တာဝန်ကျ အရာရှိဟုသာ သတင်းတွင် ထည့်ရေးဖို့လည်း ၎င်းက ပြောသည်။
သေဆုံးသူမှာ စက်တင်ဘာလ ၂၈ ရက်နေ့က စစ်တွေမြို့၊ မြို့လယ်ချောင်းတွင် စက်လှေပေါ်မှ ပြုတ်ကျခဲ့ခြင်း ဖြစ်ကြောင်းလည်း အဆိုပါ အရာရှိက ပြောသည်။
