ရန်ကုန် ၊ စက်တင်ဘာ ၂၂ ။ ။ မြန်မာ-ဘင်္ဂလားဒေ့ရှ် နယ်စပ်ခြံစည်ရိုးကာရံရန် အမျိုးဘာသာသာသနာ စောင့်ရှောက်ရေး ဗုဒ္ဓဓမ္မပရဟိတအသင်း (ယခင် မဘသ အဖွဲ့အစည်း) မှ ကျပ် သိန်းနှစ်ထောင် လှူဒါန်းခဲ့သည်ဟု ဗဟိုဦးဆောင်ဆရာတော် ဒေါက်တာ အရှင်သောပါက က မဇ္ဈိမသို့ မိန့်ကြားသည်။
"အကြမ်းဖက်ဘင်္ဂါလီတွေရဲ့ဒဏ်ကြောင့် ထွက်ပြေးတိမ်းရှောင်နေတဲ့တိုင်းရင်းသားတွေ၊ တိုက်ခိုက်မှုဒဏ် ကြောင့် သေဆုံးသွားတဲ့ ဝန်ထမ်းတွေ ၊ ရဲတို့၊ တပ်မတော်သားတို့ ရဲ့ မိသားစုတွေ ၊ခြံစည်းရိုးကာရံတာတွေ အဲ့ခေါင်းစဉ်အောက်မှာ ဦးဇင်းတို့က သိန်းနှစ်ထောင် လှူဒါန်းတာပေါ့" ဟု ဗဟိုဦးဆောင်ဆရာတော် ဒေါက်တာ အရှင်သောပါက က မိန့်သည်။
အဆိုပါ လှူဒါန်းငွေများကို ယမန်နေ့က ရခိုင်ပြည်နယ်စစ်တွေမြို့ရှိ ဦးဥတ္တမခန်းမ၌ ပြုလုပ်သည့် လှူဒါန်းပွဲ အခမ်းအနားတွင် လှူဒါန်းခဲ့ခြင်းဖြစ်ပြီး တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်လည်း တက်ရောက်ခဲ့သည်။
လှူဒါန်းငွေများအနေဖြင့် အမျိုးဘာသာသာသနာ စောင့်ရှောက်ရေး ဗုဒ္ဓဓမ္မပရဟိတအသင်း (ယခင် မဘသ အဖွဲ့အစည်း) မှ သိန်း ၂၀၀၀ ၊ နယ်စပ်ခြံစည်းရိုး နှစ်မိုင် ကာရံရန် ဧရာဝတီဖောင်ဒေးရှင်းမှ ငွေကျပ် ၁၂၆၇၆ သိန်း ၊ ရွှေသံလွင် Sky Net မှ သိန်း ၃၀၀၀၊ ဒုတိယသမ္မတဦးမြင့်ဆွေ မိသားစုမှ ၂၅ သိန်း အပါအဝင် လှူဒါန်းခဲ့ပြီး ငွေကျပ်သိန်းပေါင်း ၂၂၇၇၈ သိန်း ရရှိခဲ့ကြောင်း သိရသည်။
နယ်စပ်ခြံစည်းရိုးကာရံခြင်းနှင့်ပတ်သက်ပြီး အမျိုးဘာသာသာသနာ စောင့်ရှောက်ရေး ဗုဒ္ဓဓမ္မပရဟိတအသင်း (ယခင် မဘသ အဖွဲ့အစည်း) မှ သီးသန့်လှူဒါန်းသွားရန် အစီအစဉ် ရှိနေသည်ဟုလည်း ဒေါက်တာ အရှင်သောပါက က ဆက်လက်မိန့်ကြားသည်။
