ရန်ကုန်၊ စက်တင်ဘာ ၂၀ ။ ။ ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည်ဖော်ဆောင်ရွက်ရေးကော်မတီ အနေဖြင့် ဒေသခံတိုင်းရင်းသားများအတွက် ပြန်လည်နေရာချထားမှုများကို ဦးစားပေးဆောင်ရွက်သွားမည် ဖြစ်ကြောင်း အဆိုပါကော်မတီ တွဲဖက်ဥက္ကဌဖြစ်သည့် ရခိုင်ပြည်နယ် ဝန်ကြီးချုပ် ဦးညီပုကပြောသည်။
စစ်တွေမြို့ရခိုင်ပြည်နယ် အစိုးရ ဧည့်ရိပ်သာခန်းမ၌ ယနေ့ (စက်တင်ဘာ ၂၀) ပြုလုပ်သည့် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီ လုပ်ငန်း ညှိနှိုင်းရေး ဆွေးနွေးပွဲတွင်ပြောဆိုခဲ့ခြင်းဖြစ်ကြောင်း ဦးညီပုက ၎င်း၏လူမှုကွန်ယက် မှတစ်ဆင့် ထုတ်ပြန်ခြင်းဖြစ်သည်။
အဆိုပါကိစ္စနှင့် ပတ်သက်ပြီး ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည်ဖော်ဆောင်ရွက်ရေးကော်မတီ၏ ဥက္ကဌ တစ်ဦးဖြစ်သည့် လူမှု့ဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စု ဝန်ကြီး ဒေါက်တာဝင်းမြတ်အေးက “အခုလောလောဆယ်မှာ ယာယီစခန်းတွေမှာထားရတယ်။
သူတို့အိမ်တွေလိုအပ်တဲ့နေရာတွေမှာပြန်ပြီး တော့ဆောက်မယ် ဒါမျိုးတွေရှိမယ်။ ဒါမျိုးတွေလုပ်မှာ။ မြေမြင်အခြေအနေ ကို သွားစစ်ဆေးတဲ့သူတွေက ၃ ရက်ကြာလုပ်ပြီးတော့ ဒီနေ့ ပြန်ရောက်မယ်။ နောက်ရက် သူတို့နဲ့အစည်းအဝေးတွေပြန်ခေါ်ပြီးတော့ ဒါတွေထွက်ပေါ်လာပါလိမ့်မယ် “ ဟု မဇ္ဈိမသို့ပြောကြားသည်။
ဒေသခံတိုင်းရင်းသားများ၏ စိတ်ခံစားမှု၊ နေထိုင်ရေး၊ ပြန်လည်နေရာချထားမှုများကို ဦးစားပေးဆောင်ရွက် သွားမည်ဖြစ်ကြောင်း ရခိုင်ပြည်နယ် ဝန်ကြီးချုပ်ကပြောသည်။
ထို့အပြင် နိုင်ငံတော်သမ္မတက တာဝန်ပေးထားသည့် အချက် ၁၈ ချက်နှင့် အဆိုပါကော်မတီက အကြံပြုထားသည့်အချက်များကို ပေါင်းစပ်ဆောင် ရွက်သွားမည်ဖြစ်ကြောင်း ပြည်နယ်ဝန်ကြီးချုပ် ဦးညီပုကပြောကြားခဲ့သည်။
ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရွက်ရေးကော်မတီ လုပ်ငန်းညှိနှိုင်းဆွေးနွေးပွဲကို စက်တင်ဘာ၂၂ရက်နေ့တွင် ထပ်မံပြုလုပ်မည် ဖြစ်ကြောင်းလည်း သိရသည်။
မစ္စတာကိုဖီအာနန်၏ ရခိုင်အကြံပေးကော်မရှင်နှင့် ဒုသမ္မတ (၁) ၏ရခိုင်ကော်မရှင်တို့၏တွေ့ရှိချက်များအပေါ် စီစစ်အကောင်အထည်ဖော်ရန် အကောင်အထည်ဖော်ဆောင်ရွက်ရေးကော်မတီကို နိုင်ငံတော်သမ္မတရုံးက ဖွဲ့စည်းပေးခဲ့ခြင်းဖြစ်သည်။
