တရုတ်နိုင်ငံတွင် နှစ်စဉ်ကျင်းပနေကြဖြစ်သော ရွှေကြက်ဖနှင့်ပန်းတစ်ရာ ရုပ်ရှင်ထူးချွန်ဆုပေးပွဲ၌ မျိုးချစ် စိတ်ဓာတ်ကို ဖော်ကျူးသော တရုတ်အက်ရှင်ဇာတ်ကား “Operation Mekong” က အကောင်းဆုံးရုပ်ရှင်ဆုကို ဆွတ်ခူးရရှိခဲ့သည်။
ဒါ့အပြင် “I am not Madame Bovary” ဇာတ်ကားကလည်း ထူးချွန်ဆု ၃ ဆုရရှိခဲ့ပြီး ထိုကား၏ ခေါင်းဆောင် မင်းသမီး ဖန်ဘင်းဘင်းနှင့် ဒါရိုက်တာဖန်ရှောင်ဂန်းတို့က ဆုများအသီးသီး ဆွတ်ခူးခဲ့ကြကြောင်း ဒေသတွင်း မီဒီယာများက ဖော်ပြခဲ့ကြသည်။
ရွှေကြက်ဖနှင့်ပန်းတစ်ရာ ရုပ်ရှင်ထူးချွန်ဆုပေးပွဲသည် တရုတ်နိုင်ငံ၏ ဂုဏ်သိက္ခာအကြီးမားဆုံးနှင့် သက်တမ်း အရှည်ဆုံး ရုပ်ရှင်ဆုပေးပွဲတစ်ခုဖြစ်ပြီး နှစ်စဉ်နှစ်တိုင်း နေရာပြောင်း၍ ကျင်းပလေ့ရှိသည်။ ယခုနှစ်ဆုပေးပွဲကို မွန်ဂိုလီးယားဒေသအတွင်းရှိ ဟိုဟော့မြို့၌ ကျင်းပခဲ့သည်။
ဇာတ်ဆောင်မင်းသားဆုကို Deng Chao က “Dead End” ရုပ်ရှင်နှင့် ဆွတ်ခူးခဲ့ပြီး အကောင်းဆုံး ဇာတ်ပို့မင်း သမီးဆုကို ဝူရန်ရှုက “Relocat” ရုပ်ရှင်တွင် ပါဝင်သော သူမ၏ဇာတ်ရုပ်အတွက် ဆွတ်ခူးရရှိခဲ့သည်။ယခုနှစ်၏ အကောင်းဆုံး ဇာတ်ပို့မင်းသားဆုကို “Saving Mr.Wu” ရုပ်ရှင်မှ Wang Qianyuan နှင့် “Madame Bovary” ရုပ်ရှင်မှ Yu Hewei တို့က ပူးတွဲရရှိခဲ့သည်။