မနီလာ၊ စက်တင်ဘာ ၁၃ ။ ။ ဖိလစ်ပိုင်နိုင်ငံတွင် မုန်တိုင်းတိုက်ခတ်၍ မနီလာမြို့တော်ဝန်းကျင်အနှံ့ ရေကြီးမှုများ ဖြစ်ပွားရာ လူလေးဦး သေဆုံးပြီး ခြောက်ဦး ပျောက်ဆုံးနေလျက် စာသင်ကျောင်းများ၊ အစိုးရရုံးများနှင့် စီးပွားရေးလုပ်ငန်းများ ပိတ်ထားရသည။်
သေဆုံးသူများတွင် မိုးရေကြောင့် ဒီရေမြင့်တက်သည့် မနီလာမြို့ပြင်က မြစ်အတွင်း အသက် ၁၂ နှစ်အရွယ် မိန်းကလေးတစ်ဦး ရေနစ်သေဆုံးခြင်းနှင့် မြို့တော်အရှေ့တောင်ပိုင်းတွင် ဖြစ်ပွားသော မြေပြိုမှုတစ်ရပ်အတွင်း သုံးလသားအရွယ် ကလေးတစ်ဦး သေဆုံးခြင်းတို့ ပါဝင်သည်။
သေဆုံးသူနှင့် ပျောက်ဆုံးသူအများစုသည် မုန်တိုင်းကြောင့် ဘေးများဖြစ်ပေါ်နိုင်သည်ဟု အစိုးရက သတိပေးထားသော အန္တရာယ်ဇုန်အတွင်း နေထိုင်နေရသူများဖြစ်ကြသည်။
“ကျွန်တော်တို့ ဒေသအာဏာပိုင်တွေက သူတို့ကို မပြတ်သတိပေးနေတာဖြစ်တယ်။ သူတို့နေရာက မြေပြိုမှုတွေ ဖြစ်နိုင်တယ်ဆိုပြီး အကြိမ်ကြိမ်သတိပေးပေမယ့် သူတို့က ပြောင်းရွှေ့ခြင်း မရှိတာဖြစ်တယ်။”ဟု အရပ်ဖက်ကာကွယ်ရေးရုံး တာဝန်ရှိသူ ရိုနေးမာတီယိုက ပြောသည်။
မနီလာအရှေ့ပိုင်းတွင်လည်း မိုးရေကြောင့် ရေကြီးမှုဖြစ်ရာ ဆယ်ကျော်သက်အရွယ် ညီအစ်ကိုနှစ်ဦး မြေကြီးပိ သေဆုံးသည်။
နှစ်တစ်နှစ်လျှင် မုန်တိုင်း ၂၀ နီးပါး ကြုံတွေ့လေ့ရှိသော အရှေ့တောင်အာရှ ဖိလစ်ပိုင်ကျွန်းသို့ နောက်ဆုံး တိုက်ခတ်သော ယခု အပူပိုင်မုန်တိုင်းကြောင့် မြို့တော်အပြင်တွင် ရင်ဘတ်လောက်အထိ ရေကြီးမှုများ ဖြစ်ပွားသည်။
မာရင်းဟုခေါ်သော အဆိုပါ မုန်တိုင်းသည် အရှေ့ပိုင်း မူဘန်းမြို့သို့ ဝင်ရောက်ကာ လူဇွန်ကျွန်းမကြီး အနောက်မြောက်ပိုင်းအနှံ့ တိုက်ခတ်ပြီး မနီလာမြို့ဘေးမှ ဖြတ်သန်းတိုက်ခတ်သွားကြောင်း အစိုးရ မိုးလေဝသဌာနက ပြောသည်။