နယူးဒေလီ၊ သြဂုတ် ၂၂ ။ ။ အစ္စလာမ်ဓလေ့ထုံးတမ်းတစ်ရပ်အရ လင်ယောက်ကျား အမျိုးသားများသည် ဇနီးဖြစ်သူအား ချက်ချင်းလက်ငင်း ကွာရှင်းနိုင်ခွင့် ရနေသည့် အငြင်းပွားဖွယ် ထုံးတမ်းစဉ်လာတစ်ရပ်အား အိန္ဒိယတရားရုံးချုပ်က သြဂုတ် ၂၂ ရက်တွင် ပိတ်ပင်လိုက်ပြီဖြစ်ရာ များစွာသော မွတ်စလင်အမျိုးသမီးများ ပြင်းပြင်းထန်ထန် ကန့်ကွက်နေသည့် ထုံးတမ်းစဉ်လာ အဆုံးသတ်ခြင်းပင် ဖြစ်သည်။
ခင်ပွန်းဖြစ်သူက ဇနီးသည်ကို ကွာရှင်းပြီဟု သုံးခွန်း ပြောရုံဖြင့် မယားဖြစ်သူကို ကွဲကွာနိုင်သည့် ဓလေ့ထုံးစံသည် အခြေခံဥပဒေနှင့်လည်း မကိုက်ညီသကဲ့သို့ အစ္စလာမ်အယူဝါဒလည်း မဟုတ်ကြောင်း တရားရုံးချုပ်က ဆုံးဖြတ်စီရင်ခဲ့ခြင်း ဖြစ်သည်။
ထိုသို့ စီရင်ချက် ချရန်အတွက် ၂၀၁၅ ခုနှစ်အတွင်းက ခင်ပွန်း၏ ကွာရှင်းစကား သုံးခွန်း ပြောကာဖြင့် ကွာရှင်းခံလိုက်ရသော ရှာယာရာဘာနိုအပါအဝင် ယင်းကဲ့သို့ပင် ယောက်ကျားဖြစ်သူများ၏ ကွာရှင်းထားရစ်ခံခဲ့ကြရသော အမျိုးသမီးများက တရားရုံးချုပ်သို့ ဦးတိုက်လျှောက်ထားလာကြခြင်းကြောင့်ပဲ ဖြစ်သည်။
အိန္ဒိယနိုင်ငံ၏ အကြီးဆုံးဘာသာကြီးငါးရပ်ဖြစ်သည့် ဟိန္ဒူ၊ ခရစ်ယာန်၊ အစ္စလာမ်၊ ဆစ်နှင့် ဇောရိုရာစတာ ခေါ် မာဇဒါ ဘာသာကြီးငါးရပ်မှ အမျိုးသား ဂျူရီတရားသူကြီး ငါးဦးက ခင်ပွန်းယောက်ကျား သုံးခွန်းပြောရုံဖြင့် ဇနီးမယားအား ကွာရှင်းနိုင်ခြင်းသည် ဘာသာရေးထုံးတမ်း မဟုတ်သကဲ့သို့ ဖွဲ့စည်းပုံကိုလည်း ချိုးဖောက်ရာ ရောက်ကြောင်း စီရင်ဆုံးဖြတ်ခဲ့ခြင်း ဖြစ်သည်။
အဆိုပါ ဓလေ့သည် အမျိုးသားများအတွက် မထင်ရင် မထင်သလို အိမ်ထောင်ရေးကို ဖြိုခွဲပစ်နိုင်သည့် တစ်ဖက်သတ်အခွင့်အာဏာ ရထားစေသည်မှာ လုံးလုံးရှင်းလင်းကြောင်း ဂျူရီအဖွဲ့က ပြောခဲ့သည်။
လင်ယောက်ကျား၏ စွန့်ပစ်ခံခဲ့ရသူ ဘာနိုက တရားရုံးချုပ်၏ စီရင်ချက်သည် မွတ်စလင်အမျိုးသမီးများအတွက် သမိုင်းဖြစ်စဉ်ပဲ ဖြစ်သည်ဟု ပြောသည်။
"ကျွန်မ လူတွေအားလုံးကို မေတ္တာရပ်ခံလိုတာက ဒီကိစ္စဟာ နိုင်ငံရေးသဘော မပါပါဘူး။ သုံးခွန်းပြောရုံနဲ့ လင်ယောက်ကျားက စွန့်ပစ်ထားနိုင်တဲ့ ထုံးတမ်းစဉ်လာအပေါ်မှာ တရားရုံးချုပ်ရဲ့ ခုစီရင်ချက်ကို လက်ခံပေးကြပါ။"ဟု ၎င်းက ပြောခဲ့သည်။
