ဧရာဝတီမြစ်ရေ မြင့်တက်မှုကြောင့် ရေဝင်ရောက်လာသော မန္တလေးမြို့ရပ်ကွက်အချို့တွင် သဲအိတ်များချနေ

.

ဧရာဝတီမြစ်ရေမြင့်တက်မှုကြောင့် မန္တလေးမြို့ ရပ်ကွက်အချို့တွင် ရေဝင်ရောက်လျက်ရှိရာ ရေဝင်ရောက်မှု ကာကွယ်တားဆီးနိုင်ရန်အတွက် မန္တလေးမြို့တော်စည်ပင်သာယာရေးကော်မတီမှ သဲအိတ်ချခြင်း လုပ်ငန်းများကို ဆောင်ရွက်ပေးလျက်ရှိကြောင်း သိရသည်။

''ရေကြီးတာတွေက မနှစ်ကလောက် မဟုတ်သေးပေမယ့် မိုးရွာမှုကြောင့် မထင်မှတ်ပဲ ရေဝင်ရောက်မှုတွေရှိလာတာပါ၊ စည်ပင်အနေနဲ့ သဲအိတ်တွေနဲ့ တာတွေ မကျိုးအောင် ကာကွယ်တဲ့အပိုင်းတွေ တချို့ရွာတွေမှာ သောက်သုံးရေ ဖြန့်ဝေပေးနေပါတယ်၊ ရွေ့လျား အိမ်သာတွေ ချပေးတယ်၊ တတ်နိုင်တဲ့ဖက်က ဖြည့်ဆည်းပေးသွားမှာပါ၊ ရေဝင်ရောက်နေတဲ့ ရပ်ကွက်တွေကိုလဲ ရေစုပ်ထုတ်ပေးသွားမှာပါ'' ဟု မန္တလေးမြို့ ဒုတိယမြို့တော်ဝန် ဦးရဲမွန်က ပြောသည်။

တောင်သမန် တာရိုးသည် (၂၀၁၇)ခုနှစ် သြဂုတ်(၂၂)ရက် နံနက်ပိုင်းမှစတင်၍ တာဘောင်ရေကျော်ပြီး ရပ်ကွက်များအတွင်းသို့ ရေဝင်ရောက်လျက်ရှိရာ ညနေပိုင်းတွင် မန္တလေးမြို့တော်စည်ပင်သာယာရေးကော်မတီမှ သဲအိတ်(၅၀၀၀)ကျော် လာရောက် ချထားပေးလျက်ရှိပြီး အခြေအနေ နေ့ည စောင့်ကြည့်၍ လိုအပ်သည်များ ပြုလုပ်ပေးသွားမည်ဖြစ်သည်။

လက်ရှိ မန္တလေးမြို့တွင် အောင်မြေသာစံမြို့နယ် ညောင်ကွဲရပ်၊ အမရပူရမြို့နယ် တောင်သမန်အနီးရှိ ရပ်ကွက်များ၊ စစ်ကိုင်း-မန္တလေးလမ်းဘေးရှိ ရပ်ကွက်များ၊ ရွှေကြက်ယက်အနီးဝန်းကျင် ရပ်ကွက်များ၊ ရှမ်းလေးကျွန်း နှင့် တောင်သမန်အင်းအနီးရှိ ရပ်ကွက်များတွင် (၂၀၁၇)ခုနှစ် သြဂုတ်(၁၈)ရက်မှစတင်၍ ရေဝင်ရောက်လျက်ရှိနေသည်။