ထိုင်းနှင့် တောင်ကိုရီးယားတို့ ပူးပေါင်းကာ အမျိုးသမီးများအား ပြည့်တန်ဆာ ခိုင်းစားနေသည့် ဂိုဏ်းအား ဖြိုခွင်း

ထိုင်းနှင့် တောင်ကိုရီးယားတို့ ပူးပေါင်းကာ အမျိုးသမီးများအား ပြည့်တန်ဆာ ခိုင်းစားနေသည့် ဂိုဏ်းအား ဖြိုခွင်း

ဘန်ကောက်၊ သြဂုတ် ၁၉ ။             ။ ထိုင်းနိုင်ငံနှင့် တောင်ကိုရီးယားနိုင်ငံတို့၏ ပြည့်တန်ဆာမှောင်ခိုဂိုဏ်း ဖြိုခွင်းရေး ပူးပေါင်းဆောင်ရွက်မှုတစ်ရပ်တွင် ထိုင်းအမျိုးသမီး ၂၀ ကျော်ကို   သွေးဆောင်လှည့်ဖျားပြီး ပြည့်တန်ဆာအဖြစ် တောင်ကိုရီးယားသို့ တင်ပို့စေခိုင်းသော အမှုဖြင့် တောင်ကိုရီးယား အမျိုးသားတစ်ဦးကို ဘန်ကောက်၌ ဖမ်းဆီးရမိထားကြောင်း တာဝန်ရှိသူတစ်ဦးက သြဂုတ် ၁၉ ရက်၌ ဆိုသည်။

အသက် ၃၉ နှစ်ရှိ ကင်ဟောင်ဂျွန်းဆိုသူသည် ထိုင်းအမျိုးသမီးများအား တောင်ကိုရီးယားသို့ ခေါ်သွင်းကာ ပြည့်တန်ဆာအဖြစ် လိင်ကုန်ကူးနေသော နိုင်ငံတကာဂိုဏ်းကြီးတစ်ဂိုဏ်းတွင် ပါဝင်နေသူဖြစ်နိုင်ခြင်းကြောင့် ဖမ်းဆီးခဲ့ခြင်း ဖြစ်သည်။

တောင်ကိုရီးယားတွင် အနှိပ်ခန်းများမှာ အလုပ်လုပ်ရမည်ဟု ကင်ဟောင်ဂျွန်းက ထိုင်းအမျိုးသမီးများအား လှည့်ဖျားစည်းရုံးပြီး တောင်ကိုရီးယားသို့ ခေါ်သွင်းခဲ့ခြင်းဖြစ်ကြောင်း ထိုင်းရဲတပ်ဖွဲ့က ပြောသည်။

သို့သော် ၎င်းအမျိုးသမီးများ တောင်ကိုရီးယားသို့ ရောက်ရှိသည့်အခါ ပြည့်တန်ဆာခေါင်းက ၎င်းတို့၏ ပတ်စ်ပို့များကို သိမ်းယူပြီး ထွက်မပြေးနိုင်အောင် ပိတ်ပင်ထားလျက် ပြည့်တန်ဆာအဖြစ် အတင်းစေခိုင်းခဲ့ခြင်း ဖြစ်သည်။

"ပြီးခဲ့တဲ့ နှစ်နှစ်၊ သုံးနှစ်အတွင်းမှာ ဒီဂိုဏ်းက အမျိုးသမီး ၂၀ ကျော်ကို သွေးဆောင်လှည့်ဖျားပြီး ပြည့်တန်ဆာအဖြစ်  စေခိုင်းခဲ့ပါတယ်။"ဟု ထိုင်းအထူးစုံစမ်းရေးဌာန DSI မှ လက်ထောက်ညွှန်ကြားရေးမှူး ဆွန်ဆက်က ပြောသည်။

"ပြည့်တန်ဆာအဖြစ် ဘဝပျက်ခဲ့ရသူအများစုက အသက် ၂၀ နဲ့ ၄၀ ကြားတွေ ဖြစ်ပါတယ်။ ပြည့်တန်ဆာခေါင်းတွေက သူတို့ကို အချိန်ပြည့် စောင့်ကြည့်နေတာပါ။"ဟု ၎င်းက ဆိုသည်။

ကင်ဟောင်ဂျွန်းအား သြဂုတ် ၁၇ ရက်က ဘန်ကောက်ရှိ ၎င်း၏ တိုက်ခန်းတွင် ဖမ်းဆီးရမိခြင်း ဖြစ်သည်။

ထိုင်းနှင့် တောင်ကိုရီးယားအာဏာပိုင်များ ပူးပေါင်းကာ ကင်ဟောင်ဂျွန်းနှင့် တွဲလုပ်ကိုင်နေသည့် ထိုင်းဖက်က အမျိုးသမီးတစ်ဦးကို ခြေရာခံလိုက်လံခဲ့ခြင်း ဖြစ်သည်။ ၎င်းအမျိုးသမီးက အိမ်နီးချင်းနိုင်ငံတစ်ခုသို့ ထွက်ပြေးသွားသည်။

ဖေဖော်ဝါရီလအတွင်းကလည်း တောင်ကိုရီးယားရဲများ သံသယရှိသူ ရှစ်ဦးကို ဖမ်းဆီးရမိကာ ပြည့်တန်ဆာ အတင်းစေခိုင်းခံရသူ ထိုင်းအမျိုးသမီးတစ်ချို့အား ကယ်တင်နိုင်ခဲ့သည်။

ထိုင်းနိုင်ငံသည် အားနည်းသော အမျိုးသမီးများ၊ အမျိုးသားများနှင့် ကလေးသူငယ်များကို လိင်အလုပ်စေခိုင်းခြင်းနှင့် အခြားသော အတင်းအဓမ္မ ကျွန်ပြုစေခိုင်းခြင်းများအတွက် လူမှောင်ခိုလုပ်ငန်းများ၏ ဆုံမှတ်၊ အကူးအပြောင်းအချက်အချာနေရာနှင့် နာမည်ဆိုးရှိနေသော ရင်းမြစ်နိုင်ငံတစ်နိုင်ငံ ဖြစ်သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly