အနာဂတ်အလုပ်အကိုင်အခွင့်အလမ်းများကို ဦးတည်ဆွေးနွေးမည့် Human Library

အနာဂတ်အလုပ်အကိုင်အခွင့်အလမ်းများကို ဦးတည်ဆွေးနွေးမည့် Human Library

ရန်ကုန်၊သြဂုတ် ၁၆ ။            ။ ကျောင်းသားလူငယ်များအတွက် အလုပ်အကိုင်အခွင့်အလမ်းများနှင့် ပတ်သတ်ပြီး အဓိကထား ဆွေးနွေးသွားမည့် Human Library အမည်ရ ဆွေးနွေးပွဲကို သြဂုတ်လ (၁၉)ရက်နေ့မှာ ဟင်္သာ Business Center တွင် ကျင်းပပေးသွားမည် ဖြစ်သည်။

အဆိုပါပွဲကို Wyneemyanmar ပရဟိတလူငယ်များနှင့် M-Link လူငယ်အဖွဲ့အစည်းမှ ဦးစီးကျင်းပတာဖြစ်ပြီး ကျောင်းသားကျောင်းသူများ တက္ကသိုလ်ကျောင်းသားဘဝဖြစ်တည်မှုနှင့် မှန်ကန်တဲ့ အနာဂတ်လမ်းကြောင်း ရွေးချယ်မှုကို စတင်အကောင်အထည် ဖော်နိုင်မှုတို့အတွက် ဆွေးနွေးနိုင်ရန် ရည်ရွယ်ကျင်းပခြင်း ဖြစ်ကြောင်း Wyneemyanmar တည်ထောင်သူ မဂျက်စီကာသီရိအောင် ကဆိုသည်။

“တက်ရောက်လာတဲ့ ကျောင်းသားသိလိုသမျှမေးခွန်းတွေကို ဒီပွဲမှာ မေးမြန်းနိုင်တဲ့အပြင် တက်ရောက် ဆွေးနွေးတဲ့ ပညာရှင်တွေကလည်း ဒီမေးခွန်းတွေကို ဖြေကြားပေးသွားမှာပါ။   ကျောင်းသားကျောင်းသူတွေ အနေနဲ့ ကျွမ်းကျင်ပညာရှင်တွေ၊ စီးပွားရေးလုပ်ငန်းရှင်တို့နဲ့ စိတ်ကြိုက်နှီးနှောဖလှယ်နိုင်မှာ ဖြစ်ပါတယ်” ဟု Wyneemyanmar ကို တည်ထောင်သူ မဂျက်စီကာ သီရိအောင်က ပြောသည်။

၄င်းဆွေးနွေးပွဲတွင် ပညာရေး၊ ကွန်ပျူတာနည်းပညာ၊ စီးပွားရေးတို့ပါ၀င်သည့် အခန်းကဏ္ဍ ခုနှစ်ခုမှ ကျွမ်းကျင်ပညာရှင်များနှင့် လုပ်ငန်းရှင်များက ဦးဆောင်ဆွေးနွေးသွားမည် ဖြစ်ကြောင်း သိရသည်။

ရန်ကုန်နိုင်ငံခြားဘာသာစကားတက္ကသိုလ်မှ နိုင်ငံတကာကျောင်းသားများနှင့် မြန်မာကျောင်းသားများ ပူးပေါင်းတည်ထောင်ထားသည့် M-Linkအဖွဲ့ကHuman Libraryဆွေးနွေးပွဲကို ကျင်းပခြင်းသည် စီးပွားရေးလုပ်ငန်းရှင်များနှင့် အနာဂတ်လူငယ်များကို ချိတ်ဆက်ပေးလိုက်သဖွယ် ရှိလာနိုင်မည်ဖြစ်ကြောင်း ဆိုသည်။

M-Link အဖွဲ့ကို တည်ထောင်သူ မြန်မာဘာသာအထူးပြုကျောင်းသား အာကီရာဆာတို က “ကျောင်းသား ကျောင်းသူတွေနဲ့ စီးပွားရေးလုပ်ငန်းရှင်တွေကြား ဆွေးနွေးဖလှယ်နိုင်မှုဟာ မြန်မာပြည်မှာ မတွေ့ဖူးသလောက် ရှားပါးပါတယ်။စီးပွားရေးလုပ်ငန်းရှင်များနဲ့ ကျောင်းသားကျောင်းသူများအကြား ထိတွေ့ဆက်ဆံမှုကို ဖန်တီးလိုက်ခြင်းက မြန်မာနိုင်ငံရဲ့ အနာဂတ်လူငယ်လူရွယ်တွေအတွက် အလွန်အရေးကြီးပါတယ်။ Human Library က ဒီလိုဆက်နွယ်မှုကို ဖန်တီးပေးနိုင်မယ်လို့ မျှော်လင့်မိပါတယ်”ဟု ပြောသည်။

အဆိုပါဆွေးနွေးပွဲကို တက်ရောက်လိုသူများအနေနှင့် သြဂုတ်လ ၁၆ ရက်နေ့ နောက်ဆုံးထားပြီး Wyneemyanmar သို့ စာရင်းပေးသွင်းနိုင်ကြောင်း သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required