ရန်ကုန်၊သြဂုတ်၁၆ ။ ။ ဖားကန့်မြို့နယ်အတွင်း ယနေ့သြဂုတ်(၁၆)မနက်ပိုင်းက မီးလောင်မှုဖြစ်ပွားခဲ့ပြီး မီးသတ်ယာဉ် ၂၁ စီးဖြင့် (၂)နာရီကြာ ငြှိမ်းသတ်ခဲ့ရကြောင်း မြန်မာနိုင်ငံမီးသတ်တပ်ဖွဲ့၏ ထုတ်ပြန်ချက်မှ သိရသည်။
မီးလောင်မှုမှာ မိုးညှင်းခရိုင်၊ဖားကန့်မြို့နယ်၊ဆိုင်းတောင်ကျေးရွာ၊(၂)ရပ်ကွက်တွင် ယနေ့သြဂုတ်လ ၁၆ ရက်၊မနက်(၅)နာရီခွဲ၌စတင်ဖြစ်ပွားခဲ့ပြီး (၇)နာရီခွဲအချိန်၌ မီးငြိမ်းသတ်နိုင်ခဲ့ပြီး အချိန် ၂ နာရီကျော် ကြာမြင့်ခဲ့သည်။
ဖားကန့်မြို့နယ်မီးသတ်စခန်းမှ မီးငြှိမ်းသတ်ယာဉ်(၃)စီး၊ဆိပ်မူအရန်မီးသတ်စခန်းမှ မီးငြှိမ်းသတ်ယာဉ်(၃)စီး၊ လုံးခင်းနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ ရေသယ်ယာဉ် (၁) စီး၊ မမုံအရန်မီးသတ်စခန်းမှ မီးငြှိမ်းသတ်ယာဉ်(၂)စီး၊ မှော်ဆီဇာအရန်မီးသတ်စခန်းမှ မီးငြှိမ်းသတ်ယာဉ်(၂)စီး၊ နမ့်မဖြစ်အရန်မီးသတ်စခန်းမှ မီးငြှိမ်းသတ်ယာဉ်(၁)စီး၊ ကုမ္ပဏီများမှ ရေသယ်ယာဉ်(၈)စီး စုစုပေါင်း ယာဉ်အစီးရေ(၂၁)စီးဖြင့် သွားရောက်ငြှိမ်းသတ်ခဲ့ရသည်။
အဆိုပါမီးလောင်မှုတွင် အုတ်ညှပ်အိမ်များ၊ ပျဉ်ကာအိမ်များ၊ စုစုပေါင်း(၁၁)လုံး မီးလောင်ဆုံးရှံုးခဲ့ရသည်။