ရန်ကုန်၊သြဂုတ် ၁၅ ။ ။ ရှမ်းပြည်နယ်ကျောက်မဲခရိုင်အတွင်း၌ Seasonal Influenza A(H1N1)pdm09 ရောဂါပိုးအား ကလေးနှစ်ဦးတွင် သြဂုတ်လ ၁၃ ရက်နေ့က တွေ့ရှိခဲ့သည်။
တုပ်ကွေးလက္ခဏာတွေ့ရှိရသည့် ကလေးငယ်များရှိရာ ရှမ်းပြည်နယ် (မြောက်ပိုင်း)၊ကျောက်မဲခရိုင်အတွင်းရှိ တော့ဆန်ကျေးရွာအုပ်စု၊ ပါခါးကျေးရွာသို့ ကျောက်မဲခရိုင်ပြည်သူ့ကျန်းမာရေးဦးစီးဌာနမှ ကွင်းဆင်းစစ်ဆေးခဲ့သည်။
ထို့နောက် သံသယရောဂါတွေ့ရှိသည့်ကလေးများထံမှ ကလေးငယ်နှစ်ဦး၏ နှာခေါင်းတို့ဖတ် နမူနာရယူကာ သြဂုတ်လ(၁၀)ရက်နေ့၌ ရန်ကုန်အမျိုးသားဓာတ်ခွဲခန်းသို့ ပို့ဆောင်ခဲ့သည်။
ရန်ကုန်အမျိုးသားဓာတ်ခွဲခန်းမှ အဆိုပါကလေး(၂)ဦးတွင် Seasonal Influenza A(H1N1)pdm09 တွေ့ရှိရကြောင်း သြဂုတ်(၁၃)ရက်နေ့၌ အတည်ပြုခဲ့သည်။
ဇူလိုင်လ (၂၁)ရက်နေ့မှ သြဂုတ်(၁၄)ရက်နေ့အထိ H1N1 ပိုးတွေ့လူနာစုစုပေါင်း (၂၃၅) ဦးရှိခဲ့ပြီးတစ်နိုင်ငံလုံး၌ ယနေ့အထိ ရာသီတုပ်ကွေးရောဂါ Seasonal Influenza A(H1N1)pdm09 ဖြင့် သေဆုံးသူစုစုပေါင်း (၂၃)ဦးရှိသည်။
H1N1ရောဂါပိုးတွေ့ရှိနိုင်သည့် လတ်တလောပြင်းထန်အဆုပ်ရောင်အသက်ရှုလမ်းကြောင်းရောဂါလက္ခဏာတွေ့ရှိသူများကို နီးစပ်သည့် ဆေးရုံ၊ဆေးခန်းများသို့ အမြန်ဆုံးပို့ဆောင်ပြီး အခမဲ့ စစ်ဆေးကုသမှုခံယူနိုင်ကြောင်း ပြည်သူ့ကျန်းမာရေးဌာနမှ ဒုတိယညွှန်ကြားရေးမှူး ဦသန်းထွန်းအောင်က ပြောသည်။