နိုင်ရိုဘီ၊ သြဂုတ် ၁၂ ။ ။ မဲမသမာမှုများ ရှိသည်ဟု အတိုက်အခံများက စွဲဆိုပြောဆိုနေသည့်ကြား ကင်ညာရွေးကောက်ပွဲကော်မရှင်သည် သြဂုတ် ၁၁ ရက်တွင် ယခုသီတင်းပတ်အတွင်း ကျင်းပခဲ့သော ရွေးကောက်ပွဲ၌ လက်ရှိသမ္မတ အူဟူရူကင်ယတ်တာက နိုင်ငံ၏ သမ္မတအဖြစ် ဒုတိယသက်တမ်း အနိုင်ရရွေးကောက်ခံရကြောင်း ကြေညာသည်။
မဲရလဒ်တွင် ကင်ယတ်တာက ၅၄ ဒဿမ ၂၇ ရာခိုင်နှုန်းဖြင့် ၄၄ ဒဿမ ရ၄ ရာခိုင်နှုန်း ရရှိသော ရေရှည်အတိုက်အခံပြု ရပ်တည်နေသည့် ရေးလားအိုဒင်ဂါကို အနိုင်ရခြင်းဖြစ်သည်ဟု ကော်မရှင်က ကြေညာသည်။
အမျိုးသားအထူးမဟာမိတ်များ NASA အတိုက်အခံညွန့်ပေါင်းအဖွဲ့က မဲရလဒ်ကို လက်ခံမည်မဟုတ်ကြောင်း အရိပ်အမြွတ်များ ပြပြီး မဲရေတွက်မှုကို သပိတ်မှောက်ကာ လာရောက်ခြင်း မရှိရာ မဲရလဒ် နောက်ဆုံးကြေညာမှုသည် ခုနစ်နာရီကြာ နှောင်းနှေးနောက်ကျခဲ့ခြင်းလည်း ဖြစ်သည်။
ရွေးကောက်ပွဲ တက်ရောက်မဲပေးသူဦးရေသည် ယခုအကြိမ်တွင် ရ၈ ဒဿမ ၉၁ ရာခိုင်နှုန်း ရှိရာ ၂၀၁၃ ခုနှစ်က ၈၅ ရာခိုင်နှုန်းထက် နည်းပါးခဲ့သည်။ ယခုရွေးကောက်ပွဲသည် လက်ခံနိုင်ပြီး မျှတစွာ ငြိမ်းငြိမ်းချမ်းချမ်း ပြီးစီးကြောင်း ရွေးကောက်ပွဲကော်မရှင် ဥက္ကဌ ဝါဖူလာက ဆိုသည်။
ရွေးကောက်ပွဲ မဲပေးမှုစနစ်တွင် ဟက်ကာတိုက်ခိုက်ပြီး အာဏာရ ပါတီ အရေးသာအောင် ကုလားဖန်ထိုးခံရသည်ဟု အတိုက်အခံညွန့်ပေါင်းအုပ်စုများက စွပ်စွဲထားခဲ့သည်။
ယင်းစွပ်စွဲချက်အား ရွေးကောက်ပွဲကော်မရှင်က သြဂုတ် ၉ ရက်တွင် ငြင်းဆန်ပြီး “မဲမပေးခင်ရော၊ မဲပေးပြီးရော မဲပေးစနစ်ကို ပြည်တွင်း၊ ပြည်ပကနေ ကြားဝင်ကဖျက်ကယက်လုပ်တဲ့ ဟက်ကာတိုက်ခိုက်တာမျိုး မရှိခဲ့ဘူး။”ဟု ပြောခဲ့သည်။
ထိုသို့ အတိုက်အခံများဖက်က ရွေးကောက်ပွဲအပေါ် လက်မခံသည့် ပြောဆိုမှုများကြောင့် ဆူပူဆန္ဒပြမှု တစ်ချို့ဖြစ်ပွားခဲ့သည်။
