သြဂုတ် ၁၁ ။ ။ ယခုအချိန်ထိ အပစ်ရပ်လက်မှတ်မထိုးသေးတဲ့ တိုင်းရင်းသားလက်နက်ကိုင်အဖွဲ့တွေအနေနဲ့ လာမည့် ကာလအတွင်း NCA ငြိမ်းချမ်းရေးစာချုပ်မှာ ပါ၀င်လက်မှတ်ရေးထိုးလာလိမ့်မယ်လို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ခိုင်ခိုင်မာမာ ယုံကြည်ထားလျက်ရှိကြောင်း သိရပါတယ်။
မကြာမီကာလ တတိယမြောက် ၂၁ ရာစု ပင်လုံညီလာခံ အစည်းအဝေးကျင်းပချိန်မှာတော့ အဆိုပါ NCA လက်မှတ်မထိုးရသေးတဲ့ အဖွဲ့တွေလည်း ငြိမ်းချမ်းရေးစာချုပ်မှာ ပါ၀င်လက်မှတ်ထိုး လာကြလိမ့်မယ်လို့ ဒေါ်အောင်ဆန်းစုကြည်က ယုံကြည်နေလျက်ရှိတယ်ဆိုပြီး ငြိမ်းချမ်းရေးကော်မရှင်ဥက္ကဋ္ဌ ဒေါက်တာတင်မျိုးဝင်း က ပြောပါတယ်။
ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ UNFC က ကိုယ်စားလှယ်အဖြစ် စေလွှတ်တဲ့ နိုင်ငံရေးဆိုင်ရာ ဆွေးနွေးညှိနှိုင်းရေး ကိုယ်စားလှယ်အဖွဲ့ DPN နဲ့ ငြိမ်းချမ်းရေးကော်မရှင်တို့ သြဂုတ် ၁၀ ရက်က အမျိုးသားပြန်လည်သင့်မြတ်ရေးနဲ့ ငြိမ်းချမ်းရေး ဗဟိုဌာနမှာ တွေ့ဆုံဆွေးနွေးခဲ့ကြပါတယ်။
ညွှန့်ပေါင်းအဖွဲ့က တိုင်းရင်းသားအဖွဲ့ခေါင်းဆောင်တွေအနေနဲ့ ငြိမ်းချမ်းရေးဆီသို့ သွားရာ နောက်ဆုံးခြေလှမ်း ကို လှမ်းတက်လိုက်နိုင်မယ်လို့ ဒေါ်အောင်ဆန်းစုကြည်က ယုံကြည်နေလျက်ရှိကြောင်း ဒေါက်တာတင်မျိုးဝင်း က အဆိုပါ အစည်းအဝေးမှာ ထည့်သွင်းပြောကြားသွားပါတယ်။ အလားတူ ယခုတွေ့ဆုံတဲ့အစည်းအဝေးဟာ လည်း ဆွေးနွေးဖို့ ကျန်ရှိနေတဲ့ အချက်တွေကို အပြီးသတ်ဆွေးနွေးသွားဖို့ ရှိနေကြောင်းလည်း ၎င်းက ထပ်လောင်းပြောဆိုသွားပါတယ်။
