ပေါင်မြို့နယ်တွင် သီးနှံဖျက်ခရုများလာ၍ စုပေါင်းနှိမ်နှင်းလျှက်ရှိ

ပေါင်မြို့နယ်တွင် သီးနှံဖျက်ခရုများလာ၍ စုပေါင်းနှိမ်နှင်းလျှက်ရှိ

ပေါင်၊ ဇူလိုင်၊ ၃၀ ။          ။ ​မွန်ပြည်နယ်၊ ပေါင်မြို့နယ်၊ သဲကုန်းကျေးရွာအတွင် ယခုနှစ်မိုးရာသီတွင် သီးနှံဖျက်ခရုများလာ၍ ဒေသ အခေါ်အဝေါ် (ရွှေခရု)များ ဖျက်ဆီးစားသောက်ခံရနေသဖြင့်   တောင်သူများနှင့် ဌာနဆိုင်ရာများမှ ပူးပေါင်း နှိမ်နင်းလျှက်ရှိကြောင်း ဒေသခံလယ်သမားများထံက သိရသည်။

​ပေါင်မြို့နယ်အတွင်းရှိ ခရုဝင်ရောက်မှု (၁၀)နှစ်ခန့်ရှိပြီးဖြစ်သော်လည်း၊ လွန်ခဲ့သည့် ၂၀၀၈ခုနှစ် မြန်မာနိုင်ငံကို နာဂစ်မုန်တိုင်းဝင်ရောက်ခဲ့စဉ် ရေများနှင့်လိုက်ပါလာ၍ ပေါင်မြို့နယ်အတွင်းသို့ စပါးဖျက်ခရု ရောက်ရှိလာခဲ့ခြင်းဖြစ်ပြီး၊ ယခုကျေးရွာများရှိ စပါးပျိုးပင်များကို ဖျက်ဆီးစားသောက်ခဲ့ကြသဖြင့် လယ်သမားများမှာ နှစ်စဉ်မျိုးစပါးအခက်အခဲများနှင့် ကြုံတွေ့ခဲ့ရကြောင်း   ဒေသခံများ၏   ပြောကြားချက်အရ သိရသည်။

​ရွှေခရုများသည် ဘဟက်ဖြင့် အသက်ရှင်နိုင်သလို အဆုပ်ဖြင့်လည်း အသက်ရှင်နိုင်ကြောင်း၊ ၎င်းခရုများ အား ကောက်ယူကာ နင်းချေ ၊ ထုချေဖျက်ဆီးပြီး မြေမြှပ်မှသာ သေဆုံးနိုင်မည်ဖြစ်ပြီး   ချောင်း၊ မြောင်းများတွင် ပြန်လွှတ်မည်ဆိုပါက သေဆုံးနိုင်မည် မဟုတ်ကြောင်း ခရိုင် စိုက်ပျိုးရေးဌာနမှ သိရသည်။

​သဲကုန်းကျေးရွာဒေသခံ လယ်သမားတစ်ဥိီးဖြစ်သူ ဦးမောင်အေးက " ကျွန်တော်လယ်စိုက်လာတာ နှစ်(၂၀) ကျော်ပြီ။ မနှစ်ကနည်းနည်းပဲ ဖြစ်တယ်။ ဒီနှစ်မှ ပိုဆိုးလာတာပါ။ ဒီစပါးက ဒုတိယအကြိမ် ပြန်စိုက်ထားတာပါ။ ပထမ အကြိမ်စိုက်တဲ့စပါးက ခရုတွေ ကိုက်ဖျက်လို့ကုန်ပြီ။ ခရုကောက်ဖို့အတွက် တစ်အိတ်၂၀၀၀ နှုန်းပေးပြီး ကောက်တာတောင် မကောက်နိုင်ကြတော့လို့ စိုက်ပျိုးရေးဌာနကိုအကြောင်းကြားတော့ သူတို့တွေစုပြီး လာကောက်ပေးကြတာပါ" ဟု ပြောသည်။

​ဥများကိုဖျက်စီးရာတွင် တစ်ဧက ပိသာ ၁၅၀ သို့မဟုတ် (၉)ပိသာဝင် ထုံး (၁၆)အိတ်ကို သတ်မှတ်သော နှုန်းထားပြည့်အောင် ဖျန်းမှသာလျှင် ၎င်းရွှေခရုများကို နှိမ်နှင်းနိုင်မှာဖြစ်ပြီး ရွှေခရုများ၏ သက်တမ်းမှာ (၆)နှစ်မှ (၁၀)နှစ်အထိရှိ နေခြင်းကြောင့် စုပေါင်းကောက်ယူသည့်နည်းဖြင့်နှိမ်နင်းမှသာ ထိရောက်မှုရှိနိုင်သည်ဟု သထုံခရိုင် စိုက်ပျိုးရေး ဦးစီးဌာနရုံး မှ သိရသည်

​စပါးခင်းများအတွင်း ဝင်ရောက်ဖျက်ဆီးနေသည့် ခရုများအား စုပေါင်း၍ရွှေခရုနှိမ်နင်းပွဲကို သထုံခရိုင်၌ ဇူလိုင်လအတွင်း ကျိုက်ထိုမြို့နယ်၊ ဘီးလင်းမြို့နယ်နှင့် ပေါင်မြို့နယ်တို့တွင်ပြုလုပ်ခဲ့ပြီး သထုံမြို့နယ်တွင် ဆက်လက်ပြုလုပ်သွားမည်ဖြစ်ကြောင်း သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly