လူငယ်လေးတွေပဲ ပါ၀င်တဲ့၊ ကောင်မလေးတွေ သည်းသည်းလှုပ် အားပေးကြတဲ့ Project K အဖွဲ့နဲ့ တွေ့ဆုံပြီး သူတို့အကြောင်း မဇ္ဈိမကနေ မေးမြန်းတင်ဆက်ထားတဲ့ အပိုင်း(၂) ကို တင်ဆက်ပေးလိုက်ပါတယ်။

မဇ္စျိမ -Project K အခုလက်ရှိလှုပ်ရှားဖြစ်နေတဲ့ အကြောင်းလေးတွေနဲ့ သင်တန်းတွေဖွင့်ထားရင်လည်း ပြောပြပေးပါဦး။

ဟိန်းရာ - သင်တန်းက မရှိဘူး။ ကျွန်တော်တို့ သင်တန်းတော့ ဖွင့်မထားဘူး။

ဝီလျံထွန်း - ကျွန်တော်တို့ ကိုယ်တိုင်တော့ မသင်ဘူး။ ဒီမှာ မန်နေဂျာ ကိုဂျင်မီတော့ ဖွင့်ထားတယ်။ တခြားနိုင်ငံခြားက Workshop တွေ ဘာတွေလည်း လာပေးတယ်။ ပြီးတော့ Street Dance သမားတွေနဲ့လည်း သေသေချာချာ သင်ပေးတယ်။

မဇ္စျိမ - ပြီးတော့ Project K အနေနဲ့ ပွဲတစ်ပွဲလက်ခံတဲ့အခါမှာ ကကွက်တွေထွင်တဲ့ အခါမှာရော ဘယ်လိုမျိုး တိုင်ပင်ပြီးထွင်လေ့ရှိလဲ။

ဟိန်းရာ - ကျွန်တော်တို့ ဘယ်လိုမျိုးတွေထွင်လဲဆိုရင် သီချင်းတစ်ပုဒ် ကကွက်ထွင်တော့မယ်ဆိုရင် အရင်ဆုံး သူ့အပိုင်းနဲ့သူ စဉ်းစားတာပေါ့နော်။ ပေါင်းထွင်ကြတာများပါတယ် အဲဒီလိုမျိုး။ ကိုယ်သန်ရာ သန်ရာပေါ့။ ပြီးတော့မှ ပြန်ညှိပြီးတော့မှ မကြိုက်ရင် မထည့်ဘူး။ စုပြီးတော့ပဲ ထွင်ကြတာများပါတယ်။

မဇ္စျိမ -နောက်ပြီးတော့ မြန်မာသံစဉ်ကို အကထွင်တာနဲ့ ပတ်သက်ပြီးတော့ Project K အနေနဲ့ ဘာတွေဆက်လုပ်ဖို့ရှိလဲ။

ချမ်းမြေ့ဦး - ကျွန်တော်တို့ ကိုရီးယားမှာ သွားပြိုင်ခဲ့တာကတော့ မြန်မာသံစဉ်နဲ့ပေါ့။ အဲဒီတစ်ခုနဲ့ ပြိုင်ခဲ့တယ်။ ဒါတော့ လူတိုင်းသိပြီးသား သီချင်းတစ်ပုဒ်ပါ။ ဒီနောက်ပိုင်းမှာတော့ ထပ်ပြီးလုပ်ဖို့ရှိတာက ကိုချမ်းအေးဝင်းပေါ့နော် ။ သူတီးခတ်ထားတဲ့ မြန်မာသံစဉ်နဲ့ အနောက်တိုင်း မြူးဇစ်ကို ပေါင်းစပ်ဖန်တီးထားတဲ့ Never Fall Down ဆိုတဲ့ သီချင်းကိုတော့ သီချင်းချည်းပဲကို အမြည်းအနေနဲ့ တင်ထားပြီးသွားပြီ။ အဲဒီသီချင်းအတွက် Music Video ရိုက်ဖို့ကိုလည်း ကျွန်တော်တို့ ဘန်ကောက်က ဒါရိုက်တာတွေနဲ့လည်း ချိတ်ဆက်ပြီးပြီ။ ပြီးရင် မြန်မာအကကိုလည်း သေချာလေး ။ ကျွန်တော်တို့က အနောက်တိုင်းအကကိုပဲ ကနေကျဆိုတော့ မြန်မာအကတော့ ကျွမ်းကျွမ်းကျင်ကျင် မကတတ်ဘူးပေါ့နော်။ အဲဒါကြောင့် နည်းစနစ်တကျနဲ့ မြန်မာ့ရိုးရာလည်း မပျက်ရအောင် ကိုတင်မောင်ဆန်းမင်းဝင်းနဲ့ မြန်မာအကကိုလည်း သေချာလေး သင်နေကြတယ်။ သင်ပြီးရင် ကိုတင်မောင်ဆန်းမင်းဝင်းသင်ပေးတဲ့ မြန်မာအကရယ် ကျွန်တော်တို့တတ်မြောက်ထားတဲ့ အနောက်တိုင်း အကတွေရယ် ပေါင်းစပ်ပြီးတော့ ဒီ Never Fall Down ဆိုတဲ့ သီချင်းကို မကြာခင် ပရိသတ်တွေကို ချပြနိုင်အောင် ကြိုးစားနေကြပါတယ်ဗျ။

မဇ္စျိမ - ဟုတ်ကဲ့ပါ။ Project K ကို အားပေးနေတဲ့ ပရိသတ်တွေကို တစ်ယောက်ချင်းဆီကနေ ဘာတွေပြောချင်လဲ။

ချမ်းမြေ့ဦး - အားလုံးကို တကယ်ပဲ ရင်ထဲကနေ လှိုက်လှိုက်လှဲလှဲကို ကျေးဇူးတင်ပါတယ်လို့။ ဘာဖြစ်လို့လဲဆိုတော့ လှိုက်လှိုက်လှဲလှဲ ပြောနေကျစကားအတိုင်းပါပဲ ။ Project K ဆိုတာ ပရိသတ်ရဲ့ အားပေးမှုကြောင့်သာ ဖြစ်လာတာပါလို့။ ကိုယ့်ဟာကိုယ်ဆိုရင် ပရိသတ်သာ အားမပေးဘူးဆိုရင် ကိုယ်စီကိုယ်စီက ကိုယ့်အလုပ်ကိုယ်ပြန်လုပ်ပြီးတော့ ဒီ Project K ဆိုတာလည်း ဖြစ်လာစရာ အကြောင်းမရှိဘူး။ ဒီလိုဖြစ်လာတယ်ဆိုတာ ပရိသတ်ကြောင့်ပါ။ အားလုံးကို တကယ်ရင်ထဲက လှိုက်လှိုက်လှဲလှဲ ကျေးဇူးတင်ပါတယ်လို့။ ပွဲတိုင်း ပွဲတိုင်းဗျာ ကျွန်တော်တို့တွေ ဘယ်ပွဲမဆို မျက်နှာမငယ်ရဘူး။ မျက်နှာမငယ်ရဘူးဆိုတာ များသောအားဖြင့် ဒီနိုင်ငံမှာ Dancer တွေဆိုရင် နှိမ်ချင်ကြတယ်။ များသောအားဖြင့် နှိမ်ချင်ကြပေမယ့်လည်း တစ်ချို့ တစ်ချို့ပွဲတွေမှာဆိုပေါ့နော် ။ Dancer တွေဆို နှိမ်ချင်ကြတယ်။ ဒါပေမယ့် အခု Project K ဖြစ်သွားတဲ့ အချိန်မှာကြတော့ တစ်ခြားအနုပညာရှင်တွေထက်တောင် ပရိသတ်ရဲ့ အားပေးမှုက ပိုနေကြတယ်။ အဲဒီအခါကြတော့ တစ်ချို့နိုင်ငံခြားကုမ္ပဏီတွေဆို ဟာ သူတို့က Dancer ပေမယ့် ဒီလောက်အရမ်းအားပေးကြတာလဲဆိုပြီး အဲဒီလိုတောင်ဖြစ်သွားကြတယ်ပေါ့နော်။ တစ်ချို့တွေဆိုရင်လည်း ဒီနိုင်ငံက Dancer ကို ဒီလိုမျိုးအားပေးတယ်ပေါ့ အဲဒီလိုမျိုး နိုင်ငံခြားကုမ္ပဏီတွေရှေ့မှာပါ ဂုဏ်ယူဝင့်ကြွားစွာနဲ့ ကျွန်တော်တို့နိုင်ငံက အားပေးတယ်ဆိုတာကြီးက ဖြစ်သွားတယ်ဗျာ။ ဆိုတော့ အဲဒီအတွက်ကို အရမ်းလည်းကျေးဇူးတင်တယ်။ ပြီးတော့ အရမ်းလည်းဝမ်းသာတယ်။ ပြီးတော့ ကျွန်တော်တို့လည်း ဒီ့ထက်ဒီ့ထက် ပရိသတ်ရဲ့ အားပေးမှုနဲ့ အတူ ဒီ့ထက်ကောင်းမွန်တဲ့ အနုပညာဖန်တီးမှုတွေ ဖြစ်အောင်ကြိုးစားနေပါတယ်။ အဲဒီ ကြိုးစားမှုနဲ့ ပတ်သက်ပြီးတော့ လိုအပ်တာရှိရင်သော်လည်းကောင်း အမှားအယွင်းပဲရှိခဲ့သော်လည်းကောင်း ကျွန်တော်တို့ကို ခွင့်လွှတ်နားလည်ပေးကြပါလို့။ ဘာဖြစ်လို့လဲဆိုတော့ ကျွန်တော်တို့လည်း အခုမှ ကြိုးစားဆဲလူတွေဖြစ်တယ် သင်ယူနေဆဲလူတွေဖြစ်တယ်။ အရာရာတော့ ကျွန်တော်တို့က Perfect တော့ မဖြစ်နိုင်သေးဘူးပေါ့နော်။ အဲဒီအတွက်ကို ဘာပဲဖြစ်ဖြစ်နားလည်ပေးကြပါလို့။ ဟုတ်။

မဇ္စျိမ - တစ်ယောက်ချင်းဆီက နည်းနည်းလောက်ပြောပြပေးကြပါလို့။

ဘုန်းနေမင်း - တကယ်တော့သူပြောတာ ကုန်လည်းကုန်သွားပြီ။ ကျန်တဲ့သူတွေ ပြောစရာမရှိတော့ဘူး။ ကျွန်တော်တို့အဖွဲ့ကို အားပေးတဲ့အတွက် အများကြီး ကျေးဇူးတင်ပါတယ်။ ကျွန်တော်တို့အဖွဲ့ရဲ့ အားလုံးမှာ တစ်ယောက်ချင်းဆီတိုင်းမှာ လိုအပ်ချက်တွေ အများကြီးရှိပါတယ်။ အဲဒီလိုအပ်ချက်တွေအားလုံးကို အတတ်နိုင်ဆုံး အကောင်းဆုံးနဲ့ အားလုံးဖြည့်ဆည်းပြီးတော့ ပရိသတ်တွေအတွက် ကျွန်တော်တို့ချစ်တဲ့ Gum လေးတွေအတွက် ကျွန်တေ်ာတို့အားလုံး အားလုံး အတက်နိုင်ဆုံး အနုပညာဖန်တီးမှုတွေနဲ့ အားလုံးကို ချစ်သွားပါ့မယ်လို့ ပြောချင်ပါတယ်။ ဟုတ်။

ဘုန်းနေလင်း - အင်း။ ကျွန်တော်တို့အဖွဲ့ တစ်နှစ်ပြည့်ပြီးသွားပြီပေါ့နော်။ တစ်နှစ်ကျော်သွားပြီ။ အခုအချိန်အထိ ကျွန်တော်တို့ကို အားပေးနေတယ်။ အချိန်ကုန် ငွေကုန် လူပင်ပန်းခံ အိမ်အဆူခံပြီးတော့ လာအားပေးကြတယ်။ အဲဒီအတွက် ကျွန်တော်တို့ အရမ်းကျေးဇူးတင်ပါတယ်။ ဝမ်းလည်းသာပါတယ်။ ကျွန်တော်တို့ကို မျက်နှာမငယ်ရအောင် ချစ်ပေးတဲ့ ပရိသတ်တွေအတွက် ကျွန်တော်တို့ကလည်း မျက်နှာမငယ်ရအောင် အကောင်းဆုံး ထပ်ပြီးတော့ ကြိုးစားသွားပါ့မယ်ဗျ။ ကျေးဇူးတင်ပါတယ်။

ဝီလျံထွန်း - ကျွန်တော်တို့ အမှန်အတိုင်းပြောရင် ဒီလိုအချိန်တိုလေးအတွင်းမှာ ဒီလောက်ထိ အားပေးမှုရတယ်ဆိုတာကြီးက ပြောမယ်ဆိုရင် ပြန်စဉ်းစားကြည့်လိုက်တော့ အိပ်မက်လိုပဲ။ အဲဒီတော့ ဒီဟာကလည်း အဓိက,က ပရိသတ်တွေရဲ့ လက်ခံအားပေးမှုကြောင့်ပါပဲ။ အဲဒီတော့ သူတို့အားပေးတာနဲ့ တန်အောင်၊ သူတို့အားပေးရကျိုးနပ်အောင် ကျွန်တော်တို့အများကြီး ကြိုးစားသွားပါ့မယ်လို့။ အနုပညာပိုင်းတွေရော အစစအရာရာ အများကြီး အများကြီး ပိုပြီးတော့ ကြိုးစားသွားပါ့မယ်လို့ ပြောချင်ပါတယ်။ ကျေးဇူးအများကြီးတင်ပါတယ်။

မင်းခန့်ဟိန်း - ကိုဝီပြောပြီးမှ ကျွန်တော်ပြောပါ့မယ်ခင်ဗျ။ တစ်ယောက်ချင်းစီတိုင်းကို တကယ်ပဲ လှိုက်လှိုက်လှဲလှဲ ရင်ထဲက ကျေးဇူးတင်ပါတယ်။ ဘယ်လိုပဲဖြစ်ဖြစ်ပြောရမယ်ဆို ပရိသတ်တွေက ကျွန်တော်တို့ အတွက် ကျေးဇူးရှင်လိုပဲ။ ကျေးဇူးရှင် အဲဒီတော့ တကယ် စိတ်ထဲက အရမ်းကျေးဇူးတင်တယ်။ ပြီးတော့ နောက်ပိုင်းလဲ အခု ကျွန်တော်တို့ ခုနှစ်ယောက်စလုံးက အကောင်းဆုံးတွေ အကောင်းဆုံးဆိုတဲ့ အရာတွေကိုပဲ ချပြသွားမှာပါ။ အဲဒီတော့ ဆက်လက်ပြီး အားပေးပါဦးလို့ အားလုံးကို ကျေးဇူးတင်ပါတယ်။

လင်းရာ - အင်း။ ဒါပါပဲ။  Dream ပေါ့နော် ။ ဖြစ်လာတာ။

လင်းရာ - မဖြစ်နိုင်တဲ့ အိပ်မက်ပေါ့နော်။ အဲဒီလောက်အားပေးတာ မြင်လည်း မမြင်ဖူးဘူး။ အရမ်း ကျေးဇူးတင်ပါတယ်။ တစ်ယောက်ချင်းဆီတိုင်းကို ပြီးတော့ အိမ်အဆူခံ ကျောင်းတွေ အလုပ်တွေပျက် ပိုက်ဆံ အကုန်အကျခံ ပြီးတော့ သူတို့ကလည်း ပွဲတိုင်းကို ဒီအတိုင်းလာကြည့်တာမဟုတ်ဘူး။ Gum တွေ တော်တော်များများကလေ ။ သူတို့တတ်နိုင်တဲ့ ဟန်းမိတ်လေးတွေပါတယ်။ ကိုယ့် Idol ကိုပေးချင်တဲ့ လက်ဆောင်ပစ္စည်းလေးတွေပေါ့နော်။ လာပေးကြ။ တချို့ဆို မပေးလိုက်ရဘူး ပြန်သွားတယ်။ အရမ်းတိုးနေရတော့လေ။ ဘယ်လိုပြောရမလဲ။ ကျေးဇူးတင်ပါတယ်လို့။ ငွေအကုန်အကျခံပြီး ပေးရတာဆိုတော့လေ။ ဘယ်လိုပြောရမလဲ။ အဲဒီလိုမျိုး မပေးကြပါနဲ့လို့။ သူတို့စုထားတဲ့ ပိုက်ဆံလေးတွေ ကုန်သွားမှာစိုးလို့။ ကျွန်တော်တို့ ပြန်ပြီးတော့ချပြနိုင်တာကကျတော့ အနုပညာပဲဆိုတော့ နောက်ထပ်လည်း အများကြီးကြိုးစားသွားဖို့ရှိပါတယ်လို့။ ကျေးဇူးတင်ပါတယ်။

မဇ္စျိမ - နောက်တစ်ခုကကျတော့ Project K တစ်ဖွဲ့လုံးအနေနဲ့ ကိုယ့်ကိုယ်ကို အားနည်းတယ်လို့ ထင်တဲ့ အပိုင်းကဘယ်အပိုင်းဖြစ်မလဲ။

ဝီလျံထွန်း - ဘယ်လိုလဲဆိုတော့ ကျွန်တော်တို့ အမြဲ ပျော်ပျော်ပါးပါးပဲနေတော့ တစ်ခါတစ်လေ အားသာချက်ရှိသလို တစ်ခါတစ်လေကျတော့ အားနည်းချက်လေးတွေရှိတယ်။ တစ်ချို့အရာလေးတွေပေါ့နော်။ တစ်ခါတစ်လေ ပျော်တာများတော့ အလုပ်လုပ်တဲ့အချိန်မှာ အရမ်းကြီးအပျော်လွန်သွားတာ။ အရှိန်မသတ်နိုင်ဘူး အပျော်က အဲဒါတော့ အားနည်းချက်ပေါ့။ အဲဒါလေးပါပဲ။ ကျန်တာ ထွေထွေထူးထူးတော့မရှိပါဘူး။ ပြီးတော့ အကုန်လုံးအားနည်းတာကတော့ ရုပ်ချောပြီး စိတ်ရင်းကောင်းကြတာပါပဲ။

မဇ္စျိမ - ဟုတ်ကဲ့ပါ။ အခုထိ ဖျော်ဖြေတဲ့ ပွဲတွေထဲမှာ Project K အဖွဲ့အနေနဲ့ အမှတ်တရတွေရှိရင်လည်း ပြောပြပေးပါဦး။

လင်းရာ - အမှတ်တရဆိုလို့ ကိုရီးယားသွားတုန်းက ဂွပြဲတာအမှတ်တရပေါ့နော်။ ကျွန်တော့်ဘောင်းဘီ ဂွပြဲသွားတာ။ ဒါကနောက်တစ်ရက် ပြန်ဖျော်ဖြေတဲ့ အချိန်မှာပေါ့နော်။ အဲဒါကျွန်တော့်အတွက်အမှတ်တရ။ အဖွဲ့လိုက်ဆိုရင်တော့ အမှတ်တရ။

မင်းခန့်ဟိန်း - ကျွန်တော်တို့ နောက်ဆုံးပိတ်မှာ ရှူးဒိုင်းဖောက်မှာလေ။ အလက် အလက်တွေလေ။ ဖောက်ဖို့ အင်း။ သူက စတိတ်ကလည်းမဆင်ထားတော့ ကျွန်တော်တို့ ဒီမြန်မာနိုင်ငံက ဝယ်လာတဲ့ဟာလေးတွေနဲ့ ဖောက်ကြမယ်ပေါ့။ ဒီကဝယ်သွားကြတာ လေးချောင်းတည်း။ နောက်မှာထားထားကြတယ် စီပြီးတော့။ ဒါငါ့ဟာဆိုပြီးတော့။ ကိုဖိုးချမ်း၊ကိုအကြီး၊ကိုအဝီ၊ ပြီးတော့ ကိုသော်ပေါ့။ ပြီးတော့ အဲဒီနေ့က လေကတော်တော်တိုက်တယ်။ လေတိုက်တာ ကျွန်တော့်နဖူးတောင် မဖုံးနိုင်ဘူး(ရယ်လျက်)။ လေက တော်တော်တိုက်တော့ အဲဒီအချောင်းတွေက ရွေ့ကုန်တယ်။ ပွဲလုပ်တဲ့သူတွေကလည်း တော်တော်ကောင်းတယ်။ သူတို့တတ်နိုင်သလောက် လိုက် လိုက်စီပေးတယ်။ မရလည်းမရရော နောက်ဆုံးဖောက်ရတော့မယ်လည်းဆိုရော အနောက်လှည့်ပြီးတော့ ပြေးယူကြတာပေါ့။ ပြေးလည်းယူရော သူ့နေရာသူမရှိဘူး။ ကိုဖိုးချမ်းနေရာမှာ ကိုအကြီး အချောင်းကရောက်နေတယ်။ ရောက်နေတော့ နှစ်ယောက်သားလုကြတာ။

မင်းခန့်ဟိန်း - ပြိုင်ပွဲကြီးမှာနော် (ရယ်လျက်) အဲဒါကတော့ တကယ့်အမှတ်တရပဲ။

ဘုန်းနေလင်း - ဗွီဒီယိုထဲမှာလည်းပါတယ်။ လုနေကြတာ (ရယ်လျက်)

ဘုန်းနေမင်း - ကျွန်တော်အလျော့ပေးလိုက်ပါတယ်။

လင်းရာ - ဒီကောင်က ဘယ်တော့မှမလျော့ဘူး။ ခုံတုန်းကလည်းအဲဒီလိုပဲ။ မင်းတို့ ခုံလုတာလေကွာ။ (ဝီလျံထွန်းကိုလှမ်းပြော)

မဇ္စျိမ - ပြည်တွင်းပွဲတွေမှာရော အမှတ်တရတွေရှိမှာပဲ။ ပြောပြပေးပါဦး။

ဝီလျံထွန်း - ပြည်တွင်းပွဲ အမှတ်တရတော့ Fan Meeting ပဲပေါ့နော်။ ကျွန်တော်တို့အတွက် အမှတ်တရ အကြီးကြီးတစ်ခုပါပဲ။ ပရိသတ်တွေလည်း အရမ်း အများကြီးအားပေးတယ်။ ပြီးရင်လည်း ပိုထူးခြားသွားတာက ကျွန်တော်တို့က သူတို့အတွက် Performance တင်မဟုတ်ဘဲနဲ့ ဂိမ်းတွေဆော့ပြီး သူတို့ပျော်အောင်ထားပေးတယ်။

ဘုန်းနေမင်း - ဖျော်ဖြေတာတင်မဟုတ်တော့ဘဲနဲ့ သူတို့ပျော်အောင် ဂိမ်းတွေပါလျောက်ဆော့နေတာ။ အားလုံးပျော်ကြတယ်။ အဲဒါတော့ မှတ်မှတ်ရရလေးပါပဲ။

မဇ္စျိမ - ဟုတ်ကဲ့ပါ ဒီနေ့အစီအစဉ်ကနေ နောက်ဆုံးအနေနဲ့ ပရိသတ်ကြီးကို ဘာတွေများ ထပ်ပြောချင်သေးလဲဗျ။

ဝီလျံထွန်း - ဟိုဟာ အများကြီးအားပေးကြပါလို့။ ကျွန်တော်တို့ အတက်နိုင်ဆုံး ကြိုးစားနေတယ်။ အားနည်းချက်လေးတွေရှိပေမယ့်လည်း အပြစ်မမြင်ဘဲ အားပေးကြပါ။ အမှားအယွင်းများရှိရင်လည်း တောင်းပန်ပါတယ်လို့။ နောက်ပြီး ထပ်ပြီးတော့ အနုပညာအလုပ်တွေကို ကြိုးစားသွားမှာပါလို့။ ကျွန်တော်တို့ကို အများကြီးချစ်ပေးတဲ့ အများကြီးအားပေးတဲ့ ပရိသတ်တွေအားလုံး အများကြီးကျေးဇူးတင်ပါတယ်လို့။ ကျွန်တော်တို့ရဲ့ အားနည်းချက်တွေကိုလည်း အကောင်းမြင်တဲ့ စိတ်လေးနဲ့ ကြည့်ပေးကြပါလို့။ အကုန်လုံးကတော့ အကောင်းမြင်ပါတယ် သိပြီးသားပါ။ ဒါပေမယ့် အမှားအယွင်းများရှိရင်လည်း ကျွန်တော်တို့ ကြိုးစားနေပါတယ်လို့။ အားပေးကြပါလို့။

မဇ္စျိမ -ဟုတ်ကဲ့ပါ။ ကျွန်တော်တို့ရဲ့ Mizzima Exclusive အစီအစဉ်မှာ မအားတဲ့ကြားက အချိန်ပေးပြီး ဖြေကြားပေးတဲ့ Project K အဖွဲ့ကိုလည်း ကျေးဇူးတင်ပါတယ်။ ပြီးတော့ အရမ်းလည်းပျော်ဖို့ကောင်းပါတယ်။ နောက်ထပ် အခါအခွင့်သင့်ရင်လည်းကူညီပေးကြပါဦးလို့။

လင်းရာ - ဟုတ်ကဲ့ပါ။

မဇ္စျိမ - Project K အဖွဲ့ကြီးလည်း အခုတစ်နှစ်ကျော်ကနေ နောက်ဆယ်နှစ် နှစ်တစ်ရာ ဒီ့ထက်နုပျိုပြီး အောင်မြင်မှုတွေအများကြီးရပါစေလို့ ဆုမွန်ကောင်းတောင်းပေးပါတယ်။

ဝီလျံထွန်း - ကျွန်တော်တို့ကို ပရိသတ်တွေနဲ့ ထိတွေ့ခွင့်ပေးတဲ့ မဇ္စျိမ မီဒီယာကိုလည်း ကျေးဇူးအများကြီးတင်ပါတယ်။

အပိုင်း ( ၁) ကို အောက်ပါလင့်တွင် ဖတ်ရှုနိုင်ပါသည် - http://www.mizzimaburmese.com/article/29606