ရန်ကုန်၊ဇူလိုင်၂၄ ။ ။ မြန်မာနိုင်ငံတွင် ယခုနှစ် ဇူလိုင်လအတွင်း မြစ်ရေကြီးမှုများကြောင့် ပြည်နယ်တိုင်း ၉ ခုတွင် ရေဘေးသင့်ပြည်သူပေါင်း တစ်သိန်းကျော်ရှိနေကြောင်း လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၏ ဇူလိုင်၁ရက်နေ့မှ ဇူလိုင်၂၃အထိကောက်ခံရရှိသော စာရင်းများအရ သိရသည်။
ဇူလိုင်လအတွင်း စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ပဲခူတိုင်းဒေသကြီး၊ ကရင်ပြည်နယ်၊ ဧရာဝတီတိုင်းဒေသကြီး၊ ရခိုင်ပြည်နယ်၊ ပဲခူးတိုင်းဒေသကြီးနှင့် မန္တလေးတိုင်းဒေသကြီးမှ နေပြည်တော်ကောင်စီနယ်မြေတို့တွင် ရေကြီးမှုများ ဖြစ်ပွားခဲ့သည်။
"ပြည်နယ်တိုင်း ၈ခုပေါ့ ။ ချင်းကတော့ လူတစ်ယောက်သေထားတာရှိတယ် ။ ချင်းပါထည့်မယ်ဆိုရင်ပြည်နယ်နှင့်တိုင်း ၉ ခုပေါ့ ။ ချင်းကတော့ အိမ်တွေဘာတွေပြောင်းတာရွှေ့တာတွေ ၊ အဲဒီလိုစခန်းတွေတော့မဟုတ်ဘူး"ဟု လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနမှ ညွှန်ကြားရေးမှူးဒေါ်ဖြူလဲ့လဲ့ထွန်းက ပြောသည်။
စစ်ကိုင်းတိုင်းဒေသကြီးတွင် ရေဘေးသင့်အိမ်ထောင်စုပေါင်း(၅၀၈၁)ရှိပြီး ပြောင်းရွှေ့ခဲ့ရသည့်အိမ်ထောင်စု(၅၀၈၁)နှင့် လူဦးရေ(၂၃၀၄၉)ရှိခဲ့သည်။ မကွေးတိုင်းဒေသကြီးတွင် အိမ်ထောင်စုပေါင်း (၂၀၂၇၅)နှင့် လူဦးရေ (၈၁၆၆၀) ဦး ရေဘေးသင့်ခဲ့သည်။ ပဲခူးတိုင်းဒေသကြီးတွင် အိမ်ထောင်စု (၂၁၁၀)နှင့် လူဦးရေ(၇၆၈၃) ဦး ရေဘေးသင့်ဒဏ်ကို ခံခဲ့ရသည်။
ကရင်ပြည်နယ်တွင် ယခုဇူလိုင်လ၁၉ရက်နေ့၌ စတင်ရေဘေးသင့်ခဲ့ပြီး အိမ်ထောင်စု(၄၉)စုနှင့် လူဦးရေ(၂၄၀)ရေဘေးသင့်ခဲ့သည်။
"ဧရာဝတီတိုင်းမှာဆိုရင် ၂၀ က စဖြစ်တာ အိမ်ထောင်စု(၁၂၇) လူဦးရေ(၄၇၀)။ ဒါပေမယ့် ဧရာဝတီက အခုတိုးတယ်။ တိုးတဲ့စာရင်းကျွန်မတို့ လုပ်နေတုန်းပါ "ဟု လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနမှ ညွှန်ကြားရေးမှူးဒေါ်ဖြူလဲ့လဲ့ထွန်းက ပြောသည်။
မွန်ပြည်နယ်တွင် ရေဘေးသင့်အိမ်ထောင်စု(၃၁)နှင့် လူဦးရေ(၃၀၇၉)ဦးရှိနေပြီး နေပြည်တော်ကောင်စီနယ်မြေတွင် ဇူလိုင်၂၁ရက်နေ့မှစ၍ ရေကြီးရေလျှံမှု ဖြစ်ပွားခဲ့ရာရေဘေးသင့်အိမ်ထောင်စု(၇၁)စုနှင့် လူဦးရေ ၃၁၈ ဦးတို့ ရှိနေသည်။ ရခိုင်ပြည်နယ် သံတွဲမြို့တွင် ဇူလိုင်၂၃ရက်နေ့မှ ရေကြီးရေလျှံမှုစတင်ဖြစ်ပွားခဲ့သည်။
ထို့ကြောင့် ဇူလိုင်လအတွင်း ပြည်နယ်နှင့်တိုင်း၈ခုတွင် ရေဘေးသင့်ပြည်သူပေါင်း ၁၁၆,၄၉၉ ဦးရှိနေပြီး ရေဘေးသင့် အိမ်ထောင်စုပေါင်း ၂၇,၇၄၄ ရှိနေသည်။
