အီတလီ၊ ဇူလိုင် ၁၉ ။ ။ ဂျူဗင်တပ်စ်အသင်းသည် အာဆင်နယ်အသင်းမှ ပိုလန်လက်ရွေးစင်ဂိုးသမား ဆက်ဇီနီကို လေးနှစ်စာချုပ်ဖြင့် ၂၀၂၁ ခုနှစ်အထိ စာချုပ် ချုပ်ဆိုကာခေါ်ယူလိုက်ပြီ ဖြစ်သည်။
ထိုသတင်းကို ဂျူဗင်တပ်စ်အသင်းက အတည်ပြုခဲ့ပြီး ဆက်ဇီနီအား စာချုပ် ချုပ်ဆိုနေပုံများကို အသင်း၏ ၀က်ဆိုက်နှင့် လူမှုကွန်ရက်စာမျက်နှာများတွင် ဖော်ပြခဲ့သည်။
ဆက်ဇီနီသည် ပြီးခဲ့သည့်ရာသီနှစ်ခုက ရိုးမားတွင်အငှားလာရောက်ကစားနေသူဖြစ်ပြီး အာဆင်နယ်အသင်းနှင့် ၂၀၁၉ အထိ စာချုပ်သက်တမ်း ရှိနေသေးသူဖြစ်သည်။
ထိုလက်ကျန်စာချုပ်သက်တမ်းအတွက် ဂျူဗင်တပ်စ်အသင်းသည် အာဆင်နယ်အသင်းထံ ပြောင်းရွှေ့ကြေး ယူရို ၁၂.၂ သန်းပေးချေရမည် ဖြစ်သည်။ ထို့အပြင် ဆက်ဇီနီ၏စွမ်းဆောင်ရည်အပေါ်မူတည်ပြီး ယူရို ၃.၁ သန်းထပ်မံပေးချေရမည် ဖြစ်သည်။
လက်ရှိ ဂျူဗင်တပ်စ်ဂိုးသမားဘတ်ဖွန်သည် ၂၀၁၈ ကမ္ဘာ့ဖလားပြိုင်ပွဲအပြီးတွင် ကစားသမားဘဝမှအနားယူတော့မည်ဖြစ်သောကြောင့် ဆက်ဇီနီကိုခေါ်ယူခဲ့ခြင်းဖြစ်သည်။
ရည်ညွှန်း ဂျူဗင်တပ်စ်ဒေါ့ကွန်း