ပိုလန်တွင် တရားရုံးစနစ်ပြုပြင်ပြောင်းလဲမှုကို ဆန့်ကျင်ကာ လူထောင်ပေါင်းများစွာ ဆန္ဒပြ

ပိုလန်တွင် တရားရုံးစနစ်ပြုပြင်ပြောင်းလဲမှုကို ဆန့်ကျင်ကာ လူထောင်ပေါင်းများစွာ ဆန္ဒပြ

ဝါဆော၊ ဇူလိုင် ၁၇ ။                   ။ ပိုလန်နိုင်ငံတွင် တရားရုံးစနစ် ပြုပြင်ပြောင်းလဲမှုက တရားစီရင်ရေး၏ လွတ်လပ်ခွင့်ကို ထိပါးလိမ့်မည်ဆိုကာ မြို့တော်ဝါဆောအတွင်း ဇူလိုင် ၁၆ ရက်က လူထောင်ပေါင်းများစွာသည် ဒီမိုကရေစီကြွေးကြော်သံများ ဟစ်ကြွေးကာ စုရုံးဆန္ဒပြကြသည်။

ဆန္ဒပြသူများက အီးယူနှင့် ပိုလန်အလံတို့ကို ဝှေ့ယမ်းကာ “ဒီမိုကရေစီကို ကာကွယ်စို့။”ဟူသော ကြွေးကြော်သံများဖြင့် ပါလီမန်ရှေ့တွင် နေ့လယ်ပိုင်းက စုရုံး ဆန္ဒပြကြခြင်းဖြစ်သည်။

ပါလီမန်က တရားရုံးစနစ်ပြုပြင်ပြောင်းလဲမှု ဥပဒေကြမ်းကို ခွင့်ပြုလိုက်ရာ ဝေဖန်သူများက အာဏာရပါတီ Law and Justice PiS ပါတီအား တရားရုံးများအပေါ် အာဏာပိုသက်ရောက်စေလိမ့်မည်ဟု   ဝေဖန်ကြသည်။

PiS ခေါင်းဆောင် ယာရိုစလော့ကာတွန်စကီသည် အာဏာရှင်ဆန်ကြောင်း ပြောကြပြီး ဒီမိုကရေစီကြွေးကြော်သံများကို ဟစ်ကြွေးသည်။

ဆန္ဒပြလူအုပ်သည် အင်အား ၄၅၀၀ ခန့်ရှိကြောင်း ရဲက ခန့်မှန်းထုတ်ပြန်သော်လည်း မြို့အာဏာပိုင်များက အင်အား တစ်သောင်းကျော်ထက်မနည်းရှိနသည်ဟု ပြောသည်။

အစိုးရ၏ တရားရုံးစနစ်တွင် ကွန်ဆာဗေးတစ်ပေါ်လစီများ ကျင့်သုံးခြင်းကို ဝေဖန်သလို မီဒီယာနှင့် ပညာရေးနယ်ပယ်များကဲ့သို့သော အခြားနယ်ပယ်များတွင်လည်း အစိုးရကို ဝေဖန်လျက်ရှိသည် ဒီမိုကရေစီထောက်ခံလှုပ်ရှားမှု KOD က ယခု ဆန္ဒပြမှုအား ဦးဆောင်ကျင်းပခဲ့ခြင်းဖြစ်သည်။

ဇူလိုင် ၁၆ ရက်နှောင်းပိုင်းတွင်လည်း တရားရုံးချုပ်ရှေ့တွင် ပိုလန်တရားသူကြီးများ အသင်းအဖွဲ့က သီးခြား ဆန္ဒပြရာ အင်အား ၁၇၀၀၀ ကျော်ရှိပြီး တရားရုံးများ လွတ်လပ်ခွင့်ကို တောင်းဆိုခဲ့ကြသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly