ရန်ကုန် ၊ ဇူလိုင် ၁၆ ။ ။ ရခိုင်ပြည်နယ် နယ်ခြားစောင့်ရဲစခန်းများ တိုက်ခိုက်မှုဖြစ်စဉ်အတွင်း ပါဝင်ခဲ့သည့် တရားခံပြေး အမျိုးသား ၆ ဦးကို ဖမ်းဆီးရမိခဲ့သည်ဟု နိုင်ငံတော်အတိုင်ပင်ခံရုံး သတင်းထုတ်ပြန်ရေး ကော်မတီမှ ဇူလိုင်လ ၁၆ ရက်တွင် ထုတ်ပြန်ထားသည်။
အဆိုပါ တရားခံပြေး ၆ ဦးသည် ပြီးခဲ့သည့်နှစ်က ဖြစ်ပွားခဲ့သည့် ငါးခူရ ရဲစခန်းတိုက်ခိုက်ခံရမှု ဖြစ်စဉ်တွင် ပါဝင်ခဲ့သူများ ဖြစ်သည်ဟု ယင်းထုတ်ပြန်ချက်တွင် ဖော်ပြထားသည်။
မောင်တောမြို့နယ် ၊ နယ်မြေ ၅ အောက်ပြူးမကျေးရွာ၌ တရားခံပြေးများ ရောက်ရှိနေသည်ဟု သတင်းရရှိခြင်းကြောင့် လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က စစ်ဆေးခဲ့ရာ ငါးခူရ ရဲစခန်းအား အကြမ်းဖက်တိုက်ခိုက်မှုဖြစ်စဉ် အမှုမှတရားခံပြေး မော်လဝီအီခရစ် ၃၈ နှစ် ပါ အမျိုးသား ၆ ဦးကို ဖမ်းဆီးရမိသည်ဟု သိရသည်။
ပြီးခဲ့သည့်နှစ် အောက်တိုဘာလ ၉ ရက်နေ့တွင် နယ်ခြားစောင့် ရဲတပ်ဖွဲ့စခန်းများ တိုက်ခိုက်ခံရမှု ဖြစ်ပွားခဲ့ပြီး လက်ရှိ အချိန်အထိ တည်ငြိမ်မှုရရှိရန် အစိုးရက ကြိုးစားနေရဆဲဖြစ်ပြီး လက်ရှိအချိန်ထိ အဆိုပါနယ်မြေများတွင် ပုဒ်မ ၁၄၄ ထုတ်ပြန်ထားဆဲဖြစ်သည်။
အဆိုပါ အကြမ်းဖက်မှုဖြစ်စဉ်အပြီး အစိုးရမှ တည်ငြိမ်မှုရရှိရန် ဆောင်ရွက်မှုများတွင် လူ့အခွင့်အရေးချိုးဖောက်မှုများ ရှိခဲ့သည်ဟု နိုင်ငံတကာမီဒီယာအသိုင်းအဝန်းများ ဝေဖန်ပြောဆိုမှုများလည်း ရှိနေခဲ့သည်။