ရန်ကုန်၊ ဇူလိုင် ၁၂ ။ ။ ကုလသမဂ္ဂ၏ မြန်မာနိုင်ငံလူ့အခွင့်အရေး အခြေအနေဆိုင်ရာ အထူးအစီရင်ခံစာတင်သွင်းသူ မစ္စယန်ဟီလီကို ရခိုင်ပြည်နယ် စစ်တွေလေဆိပ်တွင် ဒေသခံ ၄၀၀ ကျော်က အလိုမရှိကြောင်းဆန္ဒပြခဲ့ကြသည်။ မနက် ၇ နာရီခန့်မှစတင်ပြီး နေ့လည်ပိုင်းအထိ ဒေသခံ ၄၀၀ ကျော်လောက်က ကိုင်ဆောင်သည့် ဆိုင်းဘုတ်စာသားများကို ကြွေးကြော် ဆန္ဒထုတ်ဖော်ခဲ့ကြကြောင်း သိရသည်။
“ ကျွန်မတို့တင်ထားတာတော့ လူက ၂၀၀ ပါ ။ဒါပေမယ့် လူအင်အားက ၄၀၀ လောက်ရောက်ပါတယ်။ စစ်တွေလေဆိပ်အဝင်၀ အလိုတော်ပြည် ဘုန်းတော်ကြီးကျောင်းရှေ့မှာပါ” ဟု ဆန္ဒထုတ်ဖော်ရာတွင် ပါဝင်သည့် စစ်တွေဒေသခံ ဒေါ်ကျော့မေက မဇ္ဈိမသို့ပြောသည်။
ဇူလိုင်လ ၁၂ ရက် တွင်လာရောက်သည့် မစ္စယန်ဟီးလီ၏ ရခိုင်ပြည်နယ်ခရီးစဉ်အတွင်း စစ်တွေဒေသခံများက ” မြန်မာနိုင်ငံသား ဥပဒေကိုလေးစားပါ “ ၊ “ Get Out ယန်ဟီးလီ “၊ “No ယန်ဟီးလီ “ စသည့် ဆိုင်းဘုတ်များအပါအဝင် ဆိုင်းဘုတ် ၅ မျိုးကိုင်ဆောင် ဆန္ဒထုတ်ဖော်ခဲ့ကြခြင်းလည်းဖြစ်သည်။
မစ္စယန်ဟီးလီ လာရောက်သည့် ယနေ့ ဇူလိုင် ၁၂ ရက်နေ့အပြင် ရခိုင်ပြည်နယ်မှ ပြန်လည်ထွက်ခွာသည့်နေ့တွင်ပါ ဆန္ဒပြ ရန် စစ်တွေဒေသခံများက စီစဉ်ထားသော်လည်း ရခိုင်ပြည်နယ်အစိုးရက ယနေ့ တစ်ရက်သာခွင့်ပြုခဲ့ခြင်းဖြစ်ကြောင်း ဒေါ်ကျော့မေကပြောသည်။
ရခိုင်ပြည်နယ် ကျောက်ဖြူမြို့မှ စစ်တွေမြို့သို့ ယနေ့ နံနက် ၁၀ နာရီလေယာဉ်ဖြင့် ရောက်ရှိခဲ့သည့် မစ္စယန်ဟီလီသည် ရခိုင်ပြည်နယ် စစ်တွေမြို့နယ်ရှိ အစိုးရအဖွဲ့ဝင်များနှင့်ယနေ့ တွေ့ဆုံခဲ့သည်။
မစ္စယန်ဟီလီ၏ယခုခရီးစဉ်တွင် အကြမ်းဖက်မှုဖြစ်စဉ်များ ဖြစ်ပွားခဲ့သည့် ဘူးသီးတောင်မြို့နှင့် မောင်တော ဒေသသို့ သွားရောက်မည်ဖြစ်ကြောင်း သိရသည်။
