သံပရာပင်ရဲ့မူရင်းဒေသကတော့ မလေးရှားနိုင်ငံကပဲဖြစ်ပါတယ်။ သံပရာပင်ကိုတော့ အစေ့ကနေ တိုက်ရိုက်ချ စိုက်ပျိုးနိုင်သလို ကိုင်းကူးကိုင်းဆက်ပြီးတော့လည်း စိုက်ပျိုးနိုင်ပါတယ်။
နွေရာသီမှာရေလောင်းခြင်း၊ ရေသွင်းခြင်းမပြုလုပ်နိုင်ပါက အစေ့ကိုစိုက်တာဟာ အသင့်တော်ဆုံးပဲဖြစ်ပါတယ်။ ဒါ့အပြင် မြေသားထူတဲ့မြေမျိုးနဲ့ မိုးနဲဒေသတွေမှာလည်း အစေ့ကိုသာစိုက်ပျိုးသင့်ပါတယ်။ နွေရာသီမှာ ရေလောင်းရေသွင်းခြင်းပြုလုပ်နိုင်ရင်တော့ ကိုင်းကူးကိုင်းဆက်အပင်များကို စိုက်ပျိုးနိုင်ပါတယ်။ အစေ့ကနေပျိုးထောင်စိုက်ပျိုးမယ်ဆိုရင်တော့ ပျိုးဘောင်၊ ပျိုးသေတ္တာတွေမှာ အစေ့ကနေ လတ်လတ်ဆတ်ဆတ်ရတဲ့ အစေ့တွေကိုထုတ်ယူပြီး မျိုးစေ့ချပျိုးထားပေးရမှာဖြစ်ပါတယ်။ ပျိုးတန်းတစ်တန်းနဲ့ တစ်တန်းကိုတော့ ၃ လက်မခြားပြီး တစေ့နဲ့တစေ့ကိုတော့ ၂လက်မခန့်ခြားထားပေးရမှာ ဖြစ်ပါတယ်။
အပင်ပေါက်လေးများက ၃ လက်မခန့်မြင့်လာပြီဆိုရင်တော့ ဒုတိယပျိုးခင်းကို ပြောင်းရွှေ့ပေးရမှာဖြစ်ပြီး တစ်နှစ်ခန့်အကြာမှာ စိုက်ခင်းကို ပြောင်းရွှ့စိုက်ပျိုးပေးရမှာဖြစ်ပါတယ်။ ကိုင်းကူးကိုင်းဆက်အောင်မြင်ပြီးသားကိုင်းတွေကိုတော့ ပျိုးထုတ်ထဲမှာ ၃လ သို့မဟုတ် ၄လအထိ ပျိုးထောင်ထားပြီးမှ စိုက်ခင်းကိုရွှေ့ပြောင်းစိုက်ပျိုးပေးရမှာဖြစ်ပါတယ်။ စိုက်ခင်းမှာတော့ တစ်ပင်ကို ၈ပေခန့်ခြားထားပေးရမှာဖြစ်ပြီး တြိဂံပုံစနစ်နဲ့စိုက်ပျိုးပေးရမှာဖြစ်ပါတယ်။
ပေါင်းမြက်များကို ရှင်းလင်းပေးခြင်း၊ ရေသွင်းပေးခြင်း၊ အစိုဓတ်မပျက်အောင် အပင်ရင်းကို ကောက်ရိုး၊ မြက်ခြောက်များနဲ့ ဖုံးအုပ်ထားပေးရပါမယ်။ သဘာဝမြေသြဇာ၊ ဓတ်မြေသြဇာတို့ကို ၁ နှစ် ၂ကြိမ်ခန့် ကျွေးပေးရမှာဖြစ်ပါတယ်။ ကိုင်းကူးကိုင်းဆက်အပင်များရဲ့ ပတ်လည်ကို မြေဝိုင်းများတူးပြီး ရေသွင်းရေလောင်းခြင်း၊ ကိုင်းသိမ်ကိုင်းခြောက်များကို ရှင်းလင်းပေးခြင်း စတာတွေပြုလုပ်ပေးရမှာဖြစ်ပါတယ်ခင်ဗျာ။
