နာနတ်ပင် စိုက်ပျိုးခြင်း

29 June 2017
နာနတ်ပင် စိုက်ပျိုးခြင်း

နာနတ်ပင်ရဲ့ မူရင်းဒေသကတော့ ဘရာဇီးနိုင်ငံကပဲ ဖြစ်ပါတယ်။ နာနတ်သီးကိုတော့ အလုံးကြီးမျိုး၊ အလုံးလတ်မျိုး၊ အလုံးသေးမျိုးဆိုပြီး အရွယ်အစားကိုလိုက်ပြီး သုံးမျိုးခွဲခြားနိုင်ပါတယ်။

နာနတ်ပင်တွေဟာ ပူအိုက်စွတ်စိုတဲ့ရာသီ ဥတုကို ကြိုက်နှစ်သက်ပါတယ်။ ရွှံ့မြေကိုတော့ မကြိုက်နှစ်သက်ပါဘူး၊ ရေစီးရေလာကောင်းမွန်တဲ့ မြေတိုင်းမှာ စိုက်ပျိုးလို့ရနိုင်ပါတယ်။

မိုးရေချိန် လက်မ ၂၀ကနေ မိုးရေချိန် လက်မ ၈၀အတွင်း ကောင်းစွာ ဖြစ်ထွန်းပါတယ်။ နာနတ်ပင် ကို စိုက်ပျိုးရာမှာတော့ အသီးထိပ်ပိုင်း၊ အသီးထိပ်မှ ထွက်တဲ့အတက်၊ အသီးရင်းမှ ထွက်တဲ့အတက်၊ မြေပေါ်အတက် မြေအောက်အတက်တို့ကို စိုက်ပျိုးနိုင်ပါတယ်။

အသီးထိပ်ပိုင်းကို စိုက်ပျိုးပါက ၂ နှစ်ကြာမှ အသီးသီးမှာဖြစ်ပြီး၊ ခေါင်းတက်နဲ့ အသီးရင်းမှ ထွက်တဲ့ အတက်ကို စိုက်ပျိုးပါက ၁၅ လကြာမှ သီးမှာဖြစ်ပါတယ်။ မြေပေါ်အတက်နဲ့ မြေအောက်အတက်ကို စိုက်ပျိုးမယ် ဆိုပါက ၁ နှစ် အတွင်း အသီးသီးမှာ ဖြစ်ပါတယ်။

နာနတ်ပင်တွေကိုတော့ စိုက်ဘောင်များနှင့်သော်လည်းကောင်း စိုက်ကျင်းများနှင့်သော်လည်း အတန်းလိုက် စိုက်ပျိုးနိုင်ပါတယ်။ တစ်ပင်နဲ့ တစ်ပင်ကို ၂ ပေ နှင့် တစ်တန်းနဲ့ တစ်တန်းကို ၄ ပေ ခွာ စိုက်ပျိုးပေးရမှာ ဖြစ်ပါတယ်။

၁ ဧက ကို နွားချေးတင်း ၂၀ ချထားပေးရမှာ ဖြစ်ပါတယ်။ အပင်က ၄လက်မလောက် တက်လာပြီဆိုရင်တော့ ၁ ဧကကို ယူရီးယား ၇ ပိဿာ တီဆူပါ ၃၀ပိဿာ၊ ပိုတက်၁၅ပိဿာတို့ကို ၂ ခါခွဲပြီး ထည့်ပေးရမှာ ဖြစ်ပါတယ်။

နာနတ်ကတော့ စိုက်ပြီး ၆လအကြာမှ ၈ လကြာတဲ့ အခါမှာ ပန်းများဖူးပွင့်ပြီး ၁ နှစ်အကြာမှာ အသီးများကို ဆွတ်ခူးနိုင်မှာ ဖြစ်ပါတယ်။

နာနတ်ပင်မှာ ကျရောက်တတ်တဲ့ ဖျက်ပိုးတွေကတော့ ဒက်ပိုးဖြစ်ပြီး အသီးပေါ်မှာ အစုလိုက် အပြုံလိုက် ကျရောက်တတ်ပြီး အပင်ရည်ကို စုပ်စားခြင်းပဲ ဖြစ်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly