မြန်မာသို့ ကန်ဒေါ်လာ တစ်ဘီလီယံကျော် ထပ်မံထောက်ပံ့ရန် ကမ္ဘာ့ဘဏ် လျာထား

မြန်မာသို့ ကန်ဒေါ်လာ တစ်ဘီလီယံကျော် ထပ်မံထောက်ပံ့ရန် ကမ္ဘာ့ဘဏ် လျာထား

မြန်မာနိုင်ငံဖွံ့ဖြိုးရေးအတွက် လာမည့်နှစ်နှစ်အတွင်း ကမ္ဘာ့ဘဏ်အုပ်စုက အမေရိကန်ဒေါ်လာ တစ်ဘီလီယံကျော် ထပ်မံထောက်ပံ့ရန်လျာထားကြောင်း ကမ္ဘာ့ဘဏ်၏ မြန်မာနိုင်ငံဌာနေကိုယ်စားလှယ် အဗ္ဗဒူလာရေဆက်က ပြောကြားလိုက်သည်။

ကမ္ဘာ့ဘဏ်၏ မြန်မာနိုင်ငံဆိုင်ရာပူးပေါင်းဆောင်ရွက်မှုမူဘောင်ကို ၂၀၁၉ ခုနစ်အထိ သက်တမ်းတိုးလိုက်ပြီး ယင်းကာလအတွင်း အစိုးရကို ဒေါ်လာ ၁ ဒသမ ၂ ဘီလီယံ ထပ်တိုးထောက်ပံ့ရန် စီစဉ်ထားကြောင်း ဇွန်လ ၂၃ ရက်နေ့က ရန်ကုန်မြို့တွင်ကျင်းပသည့်ဆွေးနွေးပွဲတွင် ၎င်းက ပြောကြားခဲ့ခြင်းဖြစ်သည်။

“နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် အစိုးရတာဝန်ရှိသူတွေနဲ့ တွေ့ဆုံဆွေးနွေးပြီးတော့ ပူးပေါင်းဆောင်ရွက်မှု မူဘောင်ကို သက်တမ်းတိုးတာဖြစ်ပါတယ်”ဟု မြန်မာနိုင်ငံဌာနေ ကိုယ်စားလှယ် အဗ္ဗဒူလာရေဆက်က ပြောဆိုသည်။

ပူးပေါင်းဆောင်ရွက်မှုမူဘောင်တိုးမြှင့်လိုက်သည့် သက်တမ်းအတွင်း ကမ္ဘာ့ဘဏ်က မြန်မာနိုင်ငံ၏ ကျေးလက်ဒေသ ဆင်းရဲမွဲတေမှုလျှော့ချရေး၊ ပြည်သူများအတွက် အထောက်အကူပြုသည့် အဖွဲ့အစည်းများ ပေါ်ပေါက်လာရေးနှင့် အလုပ်အကိုင် အခွင့်အလမ်းဖော်ထုတ်နိုင်ရေးအတွက် ပုဂ္ဂလိကကဏ္ဍကို ထောက်ပံ့ရေးကို ဦးစားပေးလုပ်ဆောင်ရန် ရည်မှန်းထားသည်။

“စိုက်ပျိုးရေး၊ ပညာရေး၊ ကျန်းမာရေး စတာတွေကို နောက်နှစ်နှစ်မှာ ပိုပြီးဖွံ့ဖြိုးအောင်လုပ်ဖို့အတွက် ဆွေးနွေးခဲ့တယ်။ နောက်ထပ်မရှိမဖြစ်အရေးပါတဲ့ အာဟာရဖြည့်တင်းရေးကဏ္ဍနဲ့ လျှပ်စစ်မီးရရှိရေးကိစ္စကိုလည်း ပိုပြီးအရေးကြီးတဲ့ကဏ္ဍတွေနဲ့ ဆောင်ရွက်သွားဖို့ရှိပါတယ်” ဟု အဗ္ဗဒူလာရေဆက်က ရှင်းပြသည်။

ကမ္ဘာ့ဘဏ်သည် မြန်မာနိုင်ငံဆိုင်ရာပူးပေါင်းဆောင်ရွက်မှုမူဘောင်(CPF)ကို မူလက ၂၀၁၅ ခုနစ်မှ ၂၀၁၇ အထိ သတ်မှတ်ထားခဲ့ပြီး ယင်းမူဘောင်အရ ဖွံ့ဖြိုးရေးချေးငွေများအပါအဝင် မြန်မာနိုင်ငံကို အမေရိကန်ဒေါ်လာ ၁ ဒသမ ၇ ဘီလီယံကျော် ထောက်ပံ့ထားသည်။

ထို့ပြင် ကမ္ဘာ့ဘဏ်အုပ်စုလက်အောက်ရှိ အပြည်ဆိုင်ရာဘဏ္ဍာရေးကော်ပိုရေးရှင်း(IFC) နှင့် MIGA အဖွဲ့တို့၏ ပုဂ္ဂလိကကဏ္ဍသို့ ထောက်ပံ့ထားသည်များ ပါဝင်ပါက ကမ္ဘာ့ဘဏ်၏ မြန်မာနိုင်ငံသို့ ထောက်ပံ့မှုမှာ ကန်ဒေါ်လာ ၃ ဘီလီယံကျော်ရှိသည်။

Mizzima Weekly