တက္ကသိုလ်ဝင်တန်း စာမေးပွဲရမှတ်စာရင်းများကို ထုတ်ယူနိုင်ပြီ

တက္ကသိုလ်ဝင်တန်း စာမေးပွဲရမှတ်စာရင်းများကို ထုတ်ယူနိုင်ပြီ

ရန်ကုန်၊ ဇွန် ၁၉ ။             ။ ၂၀၁၆ -၂၀၁၇ ပညာသင်နှစ်အတွက် တက္ကသိုလ်ဝင်စာမေးပွဲ ရမှတ်စာရင်းကို ဇွန်လ ၁၉ ရက်နေ့မှစပြီး ရုံးချိန်အတိုင်း နေ့ချင်းပြီး ထုတ်ယူနိုင်ပြီ ဖြစ်ကြောင်းသိရသည်။

လျှောက်လွှာကို ကျောင်းသားကျောင်းသူ ကိုယ်တိုင် သို့မဟုတ် ကိုယ်စား ထုတ်ယူနိုင်မည် ဖြစ်ပြီး ဦးစွာ အမှတ်စာရင်းတောင်းခံလွှာကို ဝယ်ယူရမည် ဖြစ်သည်။ အဆိုပါလျှောက်လွှာတွင်   ကျောင်းသားကျောင်းသူ၏  အမည်၊ အဖအမည်၊ ဝင်ရောက်ဖြေဆိုခဲ့သည့် စာစစ်ဌာန၊ ခုံအမှတ်၊ ဖြေဆိုခဲ့သည့် ခုနှစ်၊ ထုတ်ယူသူ၏ လက်မှတ် နှင့် အောင်သည်/ရှုံးသည် ကို တိကျမှန်ကန်အောင် ဖြည့်စွက်ရမည် ဖြစ်ပြီး ၂၀၀ကျပ်တန် ပညာရေးဝန်ကြီးဌာန၏ တံဆိပ်ခေါင်း ကပ်ထားရမည် ဖြစ်သည်။

ပြည့်စုံမှန်ကန်မှု မရှိသည့် လျှောက်လွှာများကို အရေးယူဆောင်ရွက်ပေးမည် မဟုတ်ကြောင်း မြန်မာနိုင်ငံ စာစစ်ဦးစီးဌာနက တရားဝင်ထုတ်ပြန်ထားသည်။

ရန်ကုန်တိုင်းဒေသကြီးတွင် ဖြေဆိုခဲ့သူများအနေနှင့် ရန်ကုန်မြို့ မြန်မာနိုင်ငံ စာစစ်ဦးစီးဌာန ရှိ ဇွဲကပင်ဆောင်တွင်လည်းကောင်း၊ ရန်ကုန်တိုင်းဒေသကြီးအပ အခြားပြည်နယ်နှင့် တိုင်းဒေသကြီးများတွင်   ဖြေဆိုထားသူများအနေနှင့် မေခဆောင်တွင်လည်းကောင်း  လျှောက်လွှာဝယ်ယူကာ နေ့ချင်းပြီး ထုတ်ယူနိုင်ပြီ ဖြစ်သည်။ ထို့အပြင် နေပြည်တော်ရှိ မြန်မာနိုင်ငံ စာစစ်ဦးစီးဌာန ရုံးချုပ်တွင်လည်း ထုတ်ယူနိုင်ပြီ ဖြစ်ကြောင်း သိရသည်။ အမှတ်စာရင်းများကို တနလာၤနေ့မှ သောကြာနေ့ထိ မနက် ၉နာရီမှ ညနေ ၅နာရီအတွင်း ထုတ်ယူနိုင်ပြီ ဖြစ်ပြီး လျှောက်လွှာများကို နေ့လည် ၂နာရီအထိ ဝယ်ယူနိုင်မည် ဖြစ်သည်။

အခြားတိုင်းဒေသကြီး နှင့် ပြည်နယ်များတွင် ဖြေဆိုသူများအတွက် အမှတ်စာရင်းကို ပိုမို လွယ်ကူစွာ ထုတ်ယူနိုင်ရန် မြန်မာနိုင်ငံ စာစစ်ဦးစီးဌာန အနေနဲ့ mobile team ဖွဲ့နိုင်ရန် ကြိုးပမ်းမည်ဟု ပညာရေးဝန်ကြီးဌာနက ထုတ်ပြန်ထားသည်။

၂၀၁၆ - ၂၀၁၇ ပညာသင်နှစ်အတွက် တက္ကသိုလ်ဝင်တန်း အောင်စာရင်းများကို ဇွန်လ ၁၇ ရက်နေ့က ထုတ်ပြန်ကြေညာပေးခဲ့ပြီး တစ်နိုင်ငံလုံး အတိုင်းအတာအနေနှင့် အောင်ချက်မှာ ၃၃ ဒသမ ၈၉ ရာခိုင်နှုန်းသာ ရှိကြောင်း ပညာရေးဝန်ကြီးဌာန၏ အချက်အလက်များအရ သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly