အမ်း၊ ဇွန် ၁၆ ရက်။          ။ လွန်ခဲ့သည့်ရက်ပိုင်းအတွင်းက  ရခိုင်ပြည်နယ်အတွင်း မိုးသည်းသန်စွာရွာသွန်းမှုကြောင့် အမ်း-စစ်တွေလမ်းပိုင်း ကျောက်ဆည်တောင်အနီး မိုင်တိုင်အမှတ် ၂၈/ဝနေရာတွင် လမ်းမြေများ ပြိုကျပျက်စီးနေခြင်း ကြောင့် ခရီးသွားယာဉ်များနှင့် ခရီးသည်များအား အန္တရာယ်ကျရောက်နိုင်သော ကြောင့် ယာယီတံတား ဆောက်လုပ်လျက်ရှိကြောင်း သိရသည်။

အဆိုပါလမ်းပိုင်း မြေပြိုကျမှုကြောင့် ခရီးသွားယာဉ်များ သွားလာခြင်းအား ခေတ္တရပ်တန့်ထားခဲ့ကာ မိုးရွာသွန်းမှု အခြေအနေနှင့် ၎င်းလမ်းပိုင်းအခြေအနေတို့ကို စစ်ဆေးပြီးမှ  သွားလာခွင့်ပြုထားကြောင်း အမ်းမြို့နယ် အုပ်ချုပ်ရေးမှုက RiA သို့ပြောသည်။

“ဒီနေ့မနက်ကစပြီးတော့ တံတားဆောက်နေပါတယ်။ မနက် ၈ နာရီနောက်ပိုင်းမှာ ကားတွေကိုသွားလာခွင့် ရပ်လိုက်ပြီးတော့ တံတားတည်တောက်မှုတွေကို လုပ်နေကြပါတယ်။ မနက်ဖြန်လောက်ဆိုရင်တော့ သွားလာရေးတွေ ပြန်ကောင်းသွားမှာဖြစ်ပါတယ်” ဟု အမ်းမြို့နယ်အုပ်ချုပ်ရေးမှူး ဦးကိုကိုမြတ် က ဆိုသည်။

လက်ရှိအချိန်တွင် တံတားဆောက်လုပ်နေမှုကြောင့် ခရီးသွားယာဉ်များသွားလာမှုအား ခေတ္တရပ်နားထားကြောင်းနှင့် ယနေ့ညနေပိုင်းတွင် အပြီးသတ်လုပ်ဆောင်သွားဖြစ်ကြောင်းနှင့် ကားများကိုလည်း ညနေပိုင်းမှသာ ပြန်လည်သွားလာခွင့် ပေးမည်ဖြစ်ကြောင်း သိရသည်။

တံတားမှာ အရှည်ပေ ၉၀၊ အမြင့်ပေ ၄၀ နှင့် အကျယ်ပေ ၃၀ ရှိကြောင်းပြီး မူလလမ်းအကျယ်မှာ ပေ ၄၀ ရှိသော်လည်း မိုးရေတိုက်စားမှုကြောင့် ၁၂ ပေသာ ကျန်ရှိတော့ကြောင်းသိရသည်။