စစ်တွေ ။ ။ ရခိုင်ပြည်နယ်တွင် ရေကြီးရေလျှံမှုများကြောင့် လမ်းတွင် ရေများလျှံနေပြီး တံတားများလည်း ပျက်စီးသွားခြင်းကြောင့် ရန်ကုန်- စစ်တွေ ပြေးဆွဲနေသော လူစီးကားနှင့် ကုန်တင်ကား အစီး ၂၀၀ ခန့်မှာ သွားလို့မရဘဲ ပိတ်မိလျက်ရှိသည်။
ဇူလိုင်လ ၂၆ ရက်နေ့က သြဂုတ်လ ၂ ရက်နေ့ထိ မိုးအဆက်မပြတ်ရွာသွန်းခဲ့မှုကြောင့် ရေလွှမ်းမိုးမှုများဖြစ်ပြီး အဝေးပြေးကားများမှာ လုံးဝသွားမရဘဲ လမ်းတွင်ပိတ်မိနေပြီး ခရီးသည်များလည်း အခက်တွေ့နေသည်ဟု စစ်တွေ မ.ထ.သ ဥက္ကဋ္ဌ ဦးချမ်းအေးက ပြောသည်။
“ ၃၀ ရက်နေ့ထိပဲ ကားတွေ သွားလာလို့ ရတယ်။ မြောက်ဦးထိပဲ သွားလို့ရတယ်။ ဟိုဘက်မှာက ရေကြီးနေလို့ ရန်ကုန်သွားလို့ မရဘူး။ ကားတွေ ပိတ်မိနေတာက စစ်တွေမြို့မှာ ကုန်ကားရယ်၊ လူစီးကားတွေဆိုရင် အစီး ၁၀၀ ကျော်လောက်ရှိပါတယ်။ မြောက်ဦးမှာ ၂၀ ကျော်ရှိတယ်။ မြောက်ဦးနဲ့ မင်းပြားဆိုရင် အစီး ၁၀ ကျော်ရှိတယ်။ ရန်ကုန်ဘက်က တံတားနဲ့ မြို့ပေါ်မှာ ကားအစီး ၁၀၀ နီးပါးလောက်ရှိတယ်။ ” ဟု ပြောသည်။
ကားဒရိုင်ဘာများမှာလည်း ကားရပ်ထားရာ နေရာနှင့် ထမင်းဆိုင်နှင့်ဝေးနေပြီး ထမင်းဆိုင်နှင့်နီးလျှင်လည်း ထမင်းဆိုင်ဖွင့်ထားခြင်းမရှိသည့်အတွက် ထမင်းစားဖို့ အခက်အခဲ ဖြစ်နေကြောင်း သူကဆိုသည်။
“ရေကြီးသွားတာကြောင့် ကားဒရိုင်ဘာတွေ ဘယ်ဆိုင်မှာမှ ထမင်းဝင်စားလို့မရဘူး။ အခုဆိုရင် နှစ်ရက်သုံးရက်လောက်ရှိပြီ။ ထမင်းမစားရသေးဘူး။ ရွာနဲ့နီးတဲ့ဆိုင်တွေမှာ အဲလောက်ထိ မလုံလောက်ဘူးလေ။ ပြီးတော့ အခုလို ကားပိတ်နေတော့ ထမင်းစားစရိတ်တွေ ကုန်တာပေါ့။ လူတစ်ယောက် တစ်ရက်ဆို ၅ ထောင်ကုန်တယ်။ တချို့ကားတွေဆိုရင် နှစ်ယောက်ပါတာရှိတယ်။ သုံးယောက်ပါတာရှိတယ်။ ” ဟု ပြောသည်။
လူစီးကားများတွင် လိုက်ပါလာသော ခရီသည် ၅၀၀ ကျော်မှာလည်း အခက်အခဲဖြစ်နေကြပြီး၊ နီးစပ်ရာ ကျေးရွာနှင့် မြို့များတွင် ခိုလှုံနေရကြောင်း သိရသည်။
ယင်းရေကြီးမှုကြောင့် ရခိုင်ပြည်နယ်မှာ ရေလမ်းရော၊ ကုန်းလမ်းပါ ဆက်သွယ်ရေး ပြတ်တောက်သွားခဲ့ပြီး ရေလမ်းကို သြဂုတ်လ ၂ ရက်နေ့ ရှပ်ပြေးများ ပြေးဆွဲနေပြီး ကုန်လမ်းမှာ လမ်းနှင့်တံတားပျက်စီးနေသောကြောင့် သွားလို့မဘဲ နောက် တစ်ပတ်လောက် ကြာအုံးမည်ဟု ဦးချမ်းအေးက ဆိုသည်။