အောင်လအန်ဆန် နှင့် ထိုးသတ်ရမည့် ဘစ်ဒက်ရှ်က ပြိုင်ဘက်မြေတွင် ထိုးသတ်ရမည်ကို မမှုဟုပြော

အောင်လအန်ဆန် နှင့် ထိုးသတ်ရမည့် ဘစ်ဒက်ရှ်က ပြိုင်ဘက်မြေတွင် ထိုးသတ်ရမည်ကို မမှုဟုပြော

ဇွန်လ ၃၀ရက်တွင် ရန်ကုန်၌ကျင်းပမည့် ONE: LIGHT OF A NATION ပွဲတွင် အောင်လအန်ဆန်နှင့် ထိုးသတ်ရမည့် ဘစ်ဒက်ရှ်က ပြိုင်ဖက်၏  ဇာတိမြေပေါ်တွင် ထိုးသတ်ရမည်ဖြစ်သော်လည်း   ကြောက်ရွံ့ခြင်းမရှိကြောင်း ပြောကြားလိုက်သည်။

 “အောင်လအန်ဆန်ကို သူ့နိုင်ငံကလူတွေ အားပေးကြမှာပါ။ ဒါပေမယ့် ကျွန်တော်က တကယ့်ချန်ပီယံအစစ်ဆိုတာကို သူတို့သိအောင် ပြပါမယ်။” ဟု ဘစ်ဒက်ရှ်က ဆိုသည်။

ရှုံးပွဲမရှိစံချိန်တင်ထားသည့် ဗစ်တာလီဘစ်ဒက်ရှ်နှင့် မြန်မာ့စပါးကြီးမြွေ အောင်လအန်ဆန်တို့၏ ဒုတိယအကြိမ် မကျေပွဲကြီးကို ONE: LIGHT OF A NATION ပွဲ အဓိကတွဲဆိုင်းအဖြစ် ဇွန် ၃၀ ရက်နေ့တွင် ရန်ကုန်မြို့ရှိ သုဝဏ္ဏမိုးလုံလေလုံအားကစားကွင်း၌ ကျင်းပပြုလုပ်သွားမည်ဖြစ်သည်။
 
“အိမ်ရှင်နိုင်ငံဘက်က ဆုံးဖြတ်ချက်တွေကြောင့် စိုးရိမ်စိတ်မဖြစ်ပါဘူး။ ကျွန်တော်တို့နှစ်ယောက်ရဲ့ ဒုတိယအကြိမ် ကမ္ဘာ့ချန်ပီယံလုပွဲက မျှတတဲ့ပြိုင်ပွဲတစ်ပွဲ ဖြစ်လာလိမ့်မယ်လို့ ယုံကြည်နေပါတယ်” ဟု ဘစ်ဒက်ရှ်က ဆိုသည်။
 
၎င်းတို့ နှစ်ဦးမှာ လွန်ခဲ့သည့် ဇန်နဝါရီလက ကျင်းပသော ONE Middleweight World Championship ပြိုင်ပွဲတွင် ပထမဆုံးအကြိမ် စိန်ခေါ်ထိုးသတ်ခဲ့ကြပြီး ၎င်းပွဲတွင် အောင်လအန်ဆန် ရှုံးနိမ့်ခဲ့သည်။
 
ပြိုင်ပွဲညတွင် အောင်လကို အားပေးနေကြမည့် မြန်မာ့လက်ဝှေ့ပရိတ်သတ်များကြောင့်လည်း စိတ်အနှောင့်အယှက်ဖြစ်မည်မဟုတ်ကြောင်း ဘစ်ဒက်ရှ်က ယခုကဲ့သို့ ဆိုသည်။

“ကျွန်တော့်အနေနဲ့ ပွဲကိုပဲ အပြည့်အဝ အာရုံစိုက်သွားမှာပါ။ သူတို့ ကျွန်တော့်ကို အားပေးသည်ဖြစ်စေ၊ လှောင်ပြောင်သည်ဖြစ်စေ၊ ဒါတွေဟာ ကျွန်တော့်အတွက် ခွန်အားတွေချည်းပါပဲ။ သူတို့ပြိုင်ပွဲအပေါ် ပိုပြီး စိတ်ပါဝင်စားလေလေ ကျွန်တော့်က ပိုပြီး အားတက်လေလေပါပဲ”ဟု ပြောသည်။
 
ဘစ်ဒက်ရှ်သည် အနိုင်ရရှိခဲ့သည့် ရှစ်ပွဲအနက် လေးကြိမ်ကိုအလဲထိုးပြီး ကျန်လေးကြိမ်ကို ဒိုင်အဆုံးအဖြတ်ဖြင့် အနိုင်ရရှိထားသောကြောင့် ယခုတစ်ကြိမ် အောင်လနှင့် ONE Championship ကြိုးဝိုင်းထဲတွင် ပြန်လည်ရင်ဆိုင်ရာတွင် ပြတ်သားသည့် အနိုင်ရလဒ်ရရှိရန် လိုလားလျှက်ရှိကြောင်း သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required