အမျိုးသမီးဒါရိုက်တာများ ရှားပါးခြင်းက အဓိကပြသနာတစ်ရပ်ဖြစ်ကြောင်း သြစတြေးလျမင်းသမီး နစ်ကိုး ကစ်ဒ်မန်းက ကိန်းရုပ်ရှင်ပွဲတော်၌ ပြောကြားခဲ့သည်။
သူမက အမျိုးသမီးသရုပ်ဆောင်များသည် အမျိုးသမီးဒါရိုက်တာများကို သေချာပေါက် အားပေးကူညီရမည် ဖြစ်ကြောင်း ကိန်းရုပ်ရှင်ပွဲတော်၌ ပြသရန်စီစဉ်ထားသော ဆိုဖီယာကော့ပိုလာ၏ The Beguiled ဇာတ်ကားကို ထောက်ခံအားပေးရင်း ပြောကြားခဲ့သည်။
ထိုဇာတ်ကားထဲတွင် မင်းသား ကောလင်းဖာရဲလ်က အမေရိကန်ပြည်တွင်းစစ်အတွင်း အမျိုးသမီးကျောင်းသို့ ရောက်ရှိသွားသော ဒဏ်ရာရစစ်သားတစ်ဦးအဖြစ် ပါဝင်သရုပ်ဆောင်ထားသည်။
ထိုဇာတ်ကားသည် ၁၉၇၁ခုနှစ်က ထွက်ရှိခဲ့သော မင်းသားကလင့်အိစ်ဝုဒ်၏ ရုပ်ရှင်ကို ပြန်လည်ဆန်းသစ်ကာ ယခုရုပ်ရှင်တွင် အမျိုးသမီးဇာတ်ကောင်က ဇာတ်ကြောင်း ပြောပြသည့်ပုံစံဖြင့် ရိုက်ကူးထားခြင်းဖြစ်သည်။
ကစ်ဒ်မန်းက “ ၂၀၁၆ခုနှစ်မှာ အဓိကရုပ်ရှင်ဇာတ်ကားကြီးတွေကို ရိုက်ကူးတဲ့အမျိုးသမီး အရေအတွက်ဟာ ၄.၂% လောက်ပဲရှိပါတယ်။ ဒါဟာ ရုပ်ရှင်လောကထဲက အမျိုးသမီးအရေအတွက်ပေါ် မူတည်ပြီး ကိန်းဂဏန်း ထုတ်ထားခြင်းဖြစ်ပါတယ်။ တီဗီရုပ်သံဇာတ်လမ်း အပိုင်းပေါင်း ၄၀၀၀ ကျော်ထွက်ရှိခဲ့သော်လည်း ထိုအပိုင်း တွေကို ရိုက်ကူးခဲ့တဲ့ စုစုပေါင်း အမျိုးသမီးအရေအတွက်ဟာ ၁၈၃ ယောက်ပဲရှိပါတယ်” ဟု ပြောခဲ့သည်။
“ အချိန်ကြာမြင့်လာတာနဲ့အမျှ ပြောင်းလဲလာမယ်လို့ မျှော်လင့်ထားပါတယ်။ လူတွေကတော့ ဆက်ပြောနေဦး မှာပါပဲ။ အပြောင်းအလဲတွေ ဖြစ်လာတယ်လို့ပေါ့။ ဒါပေမယ့် တကယ်လည်း မပြောင်းလဲပါဘူး” ဟု နစ်ကိုးကစ်ဒ် မန်းက ပြောခဲ့သည်။
သူမပါဝင်သရုပ်ဆောင်ထားသည့် The Killing of a Sacred Deer ၊ Top of the Lake နှင့် How to Talk to Girls at Parties အစရှိသည့် ဇာတ်ကား ၃ကားစလုံးကို ကိန်းရုပ်ရှင်ပွဲတော်၌ ပြသမည်ဖြစ်သည်။