တစ်ချိန်က နာမည်ကျော်ကြားခဲ့သော မင်းသားကြီး ကလင့်အိစ်ဝုဒ်သည် အခြားအမေရိကန်ကလေးငယ်များ ကဲ့သို့ ၁၉၃၀ နှင့် ၁၉၄၀ ခုနှစ်များတွင် ကောင်းဘွိုင်ဇာတ်ကားများဖြင့် ကြီးပြင်းလာခဲ့သူဖြစ်ပြီး ကိန်းရုပ်ရှင်ပွဲ တော်၌ ပြုလုပ်ခဲ့သော နှီးနှောဖလှယ်ပွဲတွင် သူမည်ကဲ့သို့ ရုပ်ရှင်ကြယ်ပွင့် ဖြစ်လာသလဲဆိုတာကို အသေးစိတ် ပြောပြခဲ့သည်။
“ကလေးငယ်တိုင်းရဲ့ အိပ်မက်ဟာ ကောင်းဘွိုင်ဇာတ်လမ်းတွေထဲမှာ ပါဝင်ချင်ကြတာဖြစ်ပြီး ကလေးတိုင်းဟာ သေနတ်ပစ်၊ မြင်းစီးချင်ခဲ့ကြပါတယ်။ ဒါကြောင့် ကလေးတစ်ယောက်အနေနဲ့ ကောင်းဘွိုင်ဇာတ်ကားတွေကို ကျနော်အရမ်း ကြိုက်နှစ်သက်ခဲ့ပါတယ်” ဟု ကောင်းဘွိုင်ရုပ်ရှင်များဖြင့် နာမည်ကျော်ကြားခဲ့သော အသက် ၈၆နှစ်အရွယ်ရှိ ကလင့်အိစ်ဝုဒ်က ပြောခဲ့သည်။
ဒါရိုက်တာဆာဂျီယိုလီယွန်နေး၏ ၁၉၆၆ ခုနှစ်က ရိုက်ကူးခဲ့သော The Good, The Bad and The Ugly ကောင်းဘွိုင်ရုပ်ရှင်ထဲတွင် ကလင့်အိစ်ဝုဒ်သည် အမည်မဲ့သေနတ်သမား ဇာတ်ကောင်နေရာမှ ပါဝင်သရုပ် ဆောင်ခဲ့သည်။
ထို့နောက်တွင်သူသည် Dirty Harry ရုပ်ရှင်ဇာတ်လမ်းတွင် စည်းမျဉ်းများကို ချိုးဖောက်သော ရဲတစ်ဦး၏ နေရာမှ သရုပ်ဆောင်ခဲ့သည်။ “လူအများအပြားက ဒီဇာတ်ကားဟာ နိုင်ငံရေးအရ မှားယွင်းတယ်လို့ ထင်မြင် ခဲ့ကြပါတယ်” ဟု ၁၉၇၁ ခုနှစ်က ထွက်ရှိခဲ့သော ထိုဇာတ်လမ်းအပေါ် လူအများ၏ မှတ်ချက်ကို ပြန်လည် ပြောပြခဲ့သည်။
“ဘာပဲဖြစ်ဖြစ်ပါ။ ကျနော်လုပ်နိုင်ခဲ့ပါတယ်။ စိတ်ဝင်စားဖို့လည်းကောင်းပါတယ်။ မိုက်မိုက်ကန်းကန်းနဲ့ ရဲဝံ့စွန့်စား ရတာမျိုးကို နှစ်သက်တာကြောင့် အဲ့လိုသရုပ်ဆောင်ခဲ့တာပါ။ သေနတ်ပစ်ခန်းတွေဟာ ကလေးဘ၀ တုန်းက အဆုံးစွန်သော စိတ်ကူးအိပ်မက်ဖြစ်ခဲ့ပါတယ်” ဟု ကလင့်အိစ်ဝုဒ်က ပြောခဲ့သည်။
